Read Tarifit 1 Timutawus 3 Bible Online

1 Timutawus 3 - Tarifit bible

1 Timutawus 3

¹Aqa ijjen n wawaȓ ḏayes ttiqeṯ iƹni wenni irezzun aḏ yiȓi ḏ arrayes n jmaƹeṯ qa irezzu ijjen n ṯmesȓayṯ ḏ ṯaṣebḥant.

²Fa arrayes n jmaƹeṯ maci am yijjen n bnaḏem iy tƹeyyaben yiwḏan. U labud aɣares ṯiȓi ijjen n ṯemɣarṯ waha. U labud aḏ iḥkem x yixef nnes aḏayes yiȓi lmaƹqul ḏ lʼiḥtiram aḏ itreḥḥab zeg inewjiwen aɣares ṯiȓi ṯzemmar aḏ iseȓmeḏ iwḏan.

³Itxeṣṣa war itegg ca lmadla n ssekra, war icciṯ ca aḏ yiȓi trankiȓ. Itxeṣṣa war itmenɣi ca s wawaȓ, war iḍemmeƹ ca ḏi tmenyaṯ.

⁴Aḏ yiȓi ḏ ijjen n bnaḏem ig iḥekkmen x ṯeddarṯ nnes mliḥ, tṭaƹan-as iḥenjiren nnes tseḏḥan-ṯ.

⁵Iwa bnaḏem-a meȓa war issin ca aḏ iḥkem x ṯeddarṯ nnes, mammec iy ɣa igg aḏ itraya x jmaƹeṯ n ȓmuminin n Arebbi?

⁶Arrayes-a, maci yallah iy isȓem aḏ yuff s ttakebbur x ȓxeḏmeṯ-a aḏ iwḍa ḏi lƹuquba nni n Ibȓis.

⁷U labud ƹaweḏ aṯ weqqaren yinni iǧan n barra war iǧin ca ḏ ȓmuminin bac war xas tƹeyyiben ca yiwḏan war iweṭṭi ca ḏi ṯexcebṯ nni n Ibȓis.

⁸Amenni ƹaweḏ imsexxaren u labud aḏ iȓin mweqqerin aɣarsen yiȓi wawaȓ, ataf war sessen ca aṭṭas n ccreb war ḍemmƹen ca ḏi ȓewsex n ddunect-a.

⁹Imsexxaren-a itxeṣṣa u labud aḏ ṭṭfen ḏi ȓmaƹna inuffaren n lʼiman s yijjen n ḍḍamir iṣfa.

¹⁰Ḏ amezwaru aḏ twajarrben. Meȓa war ḏinni can n ṯmesȓayṯ ḍed nsen, ataf aḏ ḏewȓen ḏ imsexxaren.

¹¹Amenni ƹaweḏ ṯimɣarin itxeṣṣa aḏ iȓint mweqqerint war ḏaysent tiȓi ca nnamima aḏ ḥekkment x yixef nsent aḏaysent ṯiȓi ttiqeṯ ḏi marra ṯimesȓayin.

¹²Imsexxaren itxeṣṣa u labud aḏ iȓin ḏ iryazen n yijjen n ṯemɣarṯ waha, aḏ ḥekkmen x iḥenjiren ḏ ṯuḏrin nsen mliḥ.

¹³Aqa imsexxaren ig ixeddmen mliḥ aḏ rebḥen i yixef nsen ijjen n ddaraja ḏ ṯaṣebḥant ḏ yijjen n ttiqeṯ ḏi lʼiman nsen ig iǧan ḏi Ƹisa Lmasiḥ.

¹⁴Ṯimesȓayin-a tariɣ-ṯent-id i cek, nec tmenniɣ aɣarec d aseɣ ḏeɣya.

¹⁵Meȓa ṭewwleɣ aṭṭas war ḏinni d usiɣ ca, ataf aḏ tessneḏ cek mamc iy ɣa suguren yiwḏan ixef nsen ḏi ṯeddarṯ n Arebbi iƹni jmaƹeṯ n ȓmuminin n Arebbi iddaren ḏ nettaṯ iy iǧan ḏ apilar ḏ dsas n lḥaqiqa.

¹⁶U bȓa ccekk mecḥaȓ ṯeǧa ḏ ṯameqqrant ȓmaƹna inuffaren n lʼiman: Netta, ḏ bnaḏem iy d imeḍharen, ḏ Arruḥ iy xas icehḏen. Netta, ḏ lmalaʼikaṯ iy ḏayes ixzaren, ḏ ȓegnus iy zzayes itwabeccaren. Netta, ḏi ddunect-a yinni iy zzayes yumnen, ḏ lƹaḍama n ujenna iy ṯ iqebȓen.