Read Tarifit 1 Timutawus 5 Bible Online

1 Timutawus 5 - Tarifit bible

1 Timutawus 5

¹War nehha ca ijjen n uwessar s ȓeqsaḥeṯ; Lla, siweȓ akiḏes am babac. Iḥenjiren egg-iṯen am ayṯmac.

²Ṯiwessura egg-iṯent am yemmaṯac. Ṯiḥenjirin egg-iṯent am suyṯmac s yijjen n wuȓ iṣfa.

³Weqqar ṯajjaȓin ig iǧan ḏ ṯajjaȓin ḏ ṣṣaḥ.[2]

⁴Cuf, ṯajjaȓṯ nni meȓa ɣares iḥenjiren niɣ ḏ ayyawen ataf ḏ niṯni iy t ɣa iƹawnen aḏ ȓemḏen ḏ amezwaru aḏ sxeddmen lʼiman nsen ak lƹaʼila nsen aḏ arren ȓxir i lwalidin nsen. Aqa manaya yarḍa xas Arebbi.

⁵Qa ṯajjaȓṯ n ṣṣaḥ ṯenni war ɣar iǧi ḥadd aqa ḏ nettaṯ iteggen lʼamal nnes ḏi Arebbi tɣima tedƹa Arebbi tettar-as ǧiȓeṯ ḏ nhar.

⁶Walakin ṯenni itƹicen ḏi ccehweṯ waha, qa nettaṯ ṯemmuṯ waxxa ṯeddar.

⁷Ṯimesȓayin-a tweṣṣa-ṯent baƹda cek bac aḏ qqimen yiwḏan bȓa ȓƹib.

⁸Cuf, wenni war itḏebbiren x ȓeḥbab nnes xaṣṣatan x lƹaʼila nnes ataf netta inkar lʼiman, wenni war yuminen qaƹ ataf ḥsen zzayes.

⁹War tejja uȓa ḏ icten aḏ tsejjel ak ṯajjaȓin ɣar lmuƹawana illa meȓa ɣares zi settin iseggwusa aȓ ṯsawent, illa meȓa tuɣa ɣares ijjen n uryaz waha.

¹⁰Labud aḏ tiȓi maƹrufa s lḥasanaṯ nnes iƹni meȓa ṯrebba ṯarwa nnes, treḥḥab s inewjiwen, ṯsiȓiḏ iḍaren n ṣṣaliḥin, tƹawan yinni itzeyyaren, ṯḏeffar marra ṯimesȓayin ṯiṣebḥanin.

¹¹Fa ṯajjaȓin ṯimezyanin war ṯent tsejjal ca ƹlaḥsab lmuƹawana. Niṯenti xmi ɣa ṯeḏfarent ccehawaṯ nsent ktar zi Lmasiḥ ataf rezzunt aḏ meȓcent.

¹²Ammu aḏ twaḥekment minzi semḥent ḏi lwaƹeḏ nsent iy ggint ḏ amezwaru.

¹³Ƹaweḏ aḏ dewȓent ḏ ṯimeƹgazin ggurent zi ṯaddarṯ ɣar ṯeddarṯ teggent farq-ccɣeȓ. Maci ḏ ṯimeƹgazin waha, tƹawaḏent ȓexburaṯ taḏfent ḏi ccɣuȓaṯ n midden qqarent ṯimesȓayin war itxeṣṣa ca aḏ twannant.

¹⁴Iḏen, xseɣ ṯajjaȓin ṯimezyanin aḏ meȓcent aḏ d jjent iḥenjiren aḏ sugurent ṯaddarṯ nsent mliḥ war tejjint bu can lfurṣa i ȓaƹḏu axasent issiweȓ s ȓƹib.

¹⁵Minzi ḏinni ȓebƹaḍ ṣafi ffɣent abriḏ ḏfarent Cciṭan.

¹⁶Tamɣarṯ ḏ ȓmumna meȓa tiȓint akiḏes can ṯajjaȓin aḏaysent thilla u labud akiḏes qqiment axasent ṯḏebbar. Ṯina, maci ḏ jmaƹeṯ n ȓmuminin axasent tarbu; Lla, aḏ tarbu ɣir x ṯinni iǧan ḏ ṯajjaȓin ḥḏajent ḏ ṣṣaḥ.

¹⁷Imeqqranen n jmaƹeṯ n ȓmuminin yinni iteḥkamen mliḥ u labud aṯen tweqqarem ḏ ḍubli, xaṣṣatan yinni ixeddmen aṭṭas ḏeg uḥeddeṯ ḏ useȓmeḏ.

¹⁸Aqa Lkitab iqqar: War ḏas tegg bu ṯacmant i ufunas nni itṣarwaṯen. Aqa ƹaweḏ axeddam ɣares ȓḥaqq aḏ itxaȓes.

¹⁹War qebbeȓ ca ttuhmeṯ ḍed i umeqqran n jmaƹeṯ n ȓmuminin illa meȓa ḏinni ṯnayen niɣ ṯȓaṯa n ȓechuḏ tahamen-ṯ.

²⁰Imeqqranen ig iƹeṣṣan nha-ṯen cek zzaṯ i marra iwḏan bac yinni inneɣni aḏ ggwḏen baƹda.

²¹Aqa ƹeȓmeɣ-ac zzaṯ i Arebbi ḏ Ƹisa Lmasiḥ ḏ lmalaʼikaṯ itwaxḍaren qa labud aḏ teggeḏ ṯimesȓayin-a bȓa ma aḏ teggeḏ ȓfarz ak can ḥadd bȓa ma aḏ teggeḏ ƹaweḏ s wuḏemawen.

²²Ifassen nnec war tqeǧiq ca aṯen tserseḏ x can ḥadd,[3] war carrec ca ḏi ȓmuƹṣiyaṯ n midden. Qqim cek ṯeṣfiḏ.

²³War sess ca aman waha, sew ƹaweḏ ḏrus n waman uḍiȓ ƹlaḥsab ṯakrict nnec ḏ ȓehracaṯ iy c iȓeqqfen.

²⁴Ca n ȓmuƹṣiyaṯ n iryazen twameḍharent-id tizwarent-id i lƹiqab nsen, walakin ȓmuƹṣiyaṯ n iryazen nneɣni axasen d xeḍȓent menbaƹd.

²⁵Ammu ƹaweḏ can n lḥasanaṯ twameḍharent-id, ƹaḏ can n lḥasanaṯ nneɣni war zemmarent ca aḏ qqiment twanuffarent.