Read Tarifit 1 Timutawus 6 Bible Online

1 Timutawus 6 - Tarifit bible

1 Timutawus 6

¹Marra yinni iǧan ḏ isemɣan ṯḏeqqeȓ xasen ṯzayȓut nni[4] wa labud aḏ fekkaren belli ayṯbab nsen sḏaheǧen marra min iǧan ḏ aweqqar bac iwḏan war tƹeyyiben ca isem n Arebbi ḏ ttaƹlim nneɣ.

²Isemɣan umi ɣar iǧa ayṯbab nsen ḏ ȓmuminin wa labud aḏasen tṣennaṭen i ayṯbab nsen maci aḏasen agin aḏasen inin lla qa neccin ḏ awmaṯen. Lla, aḏasen xeḏmen ktar liʼanna ayṯbab nsen ḏ niṯni iy ɣa irebḥen zi ȓxeḏmeṯ nni u niṯni tamnen twaƹizzen. Ṯimesȓayin-a seȓmaḏ-iṯent cek, zeyyar xasent.

³Meȓa can uryaz iseȓmeḏ can ȓḥajeṯ nneɣni war itifiq ca ak wawaȓen nican n Siḏiṯneɣ Ƹisa Lmasiḥ ḏ ttaƹlim x lʼiman,

⁴ataf netta yuff s ttakebbur war ifehhem walu qaƹ. Ihȓec irezzu ɣir amxarwaḍ ḏ umnaqar x wawaȓen iy zi d itas ȓeḥseḏ ḏ umenɣi ḏ ȓbaṭeȓ ḏ lʼafkar ḏ ṯiƹeffanin.

⁵Iryazen-a thewwaȓen jarasen s ȓaƹquȓaṯ nsen iƹewwjen ṯweddar-asen lḥaqiqa. Tfekkaren belli lʼiman ḏ ijjen n ubriḏ bac aḏ rebḥen tmenyaṯ.

⁶Fa lʼiman iy ḏi ṯeǧa ȓeqnaƹeṯ netta ḏ ijjen n arbaḥ ḏ ameqqran.

⁷Ȓaḥeqqac neccin war d nuwi walu i ddunect-a, war nzemmar azzayes niysi walu.

⁸Falihaḏa neccin nejjiwen s min ɣa necc ḏ min ɣa nareḍ ḏ arruḍ u ṣafi.

⁹Yinni irezzun aḏ iȓin ḏ twajar ataf aḏ twaɣarran aḏ wḍan ḏeg yijjen n ṯexcebṯ ḏ waṭṭas n ccehawaṯ ig isbuhȓuyen ig isefcaḏen ig isɣerraqen iryazen ḏi arrwina ḏ ȓefna.

¹⁰Liʼanna ȓemḥibbeṯ n tmenyaṯ netta ḏ lʼaṣel n waṭṭas n lʼanwaƹ n ccarr. Ȓebƹaḍ n yiwḏan ig itexsen tmenyaṯ aqa ffɣen abriḏ snuqquben ixef nsen s waṭṭas n ȓeḥriqaṯ.

¹¹Fa cek ay aryaz n Arebbi, arweȓ zi marra manaya ḏfar min iǧan nican ḏ min ḏas iteƹjiben i Arebbi ḏ lʼiman ḏ ȓemḥibbeṯ ḏ ttasiƹ n ȓxaḍar ḏ ttawaḍuƹ.

¹²Mneɣ amenɣi nni aṣebḥan n lʼiman, ṭṭef ḏi ṯuḏarṯ nni war ifennin ca aȓ ḏac d iȓaɣa Arebbi wami ṯcehḏeḏ chaḏeṯ nni ṯaṣebḥant zzaṯ i waṭṭas n ȓechuḏ.

¹³Tweṣṣiɣ-cek zzaṯ i Arebbi wenni iseddaren qaƹ ṯimesȓayin u zzaṯ i Ƹisa Lmasiḥ wenni icehḏen chaḏeṯ nni ṯaṣebḥant zzaṯ i lḥakem Bunṭus Bilaṭus.

¹⁴Tegg s ȓuṣiyeṯ-a bȓa ȓƹib bȓa ca n uxciw aȓ d ɣa imeḍhar Siḏiṯneɣ Ƹisa Lmasiḥ.

¹⁵Aṯiḏ ismeḍhar Arebbi ḏi ȓweqṯ iy ḏi ixes netta iƹni Arebbi ḏ wenni ig itwabarken ḏ wenni ig iteḥkamen waḥḏes netta ḏ Azeǧiḏ n izeǧiḏen ḏ Mawlana n lmawlanaṯ.

¹⁶Ḏ netta waḥḏes iy war itmettin ƹemmarṣ, izeddeɣ ḏeg yijjen n nnur iy war izemmar ḥadd aɣares d iqarreb iƹni wenni umi ƹemmarṣ war ṯ iẓri bnaḏem war izemmar aṯ iẓer. Ḏ netta iy ɣa yiȓi uweqqar ḏ jjheḏ i ȓebda. Amin.

¹⁷Yinni ig iǧan ḏ twajar ḏi ddunect-a iy ḏi neǧa tweṣṣa-ṯen bac war ḏaysen itiȓi ca ttakebbur bac war teggen ca lʼamal nsen ḏeg wagȓa ḏi war ṯeǧi bu ttiqeṯ. Lla, aḏ yiȓi lʼamal nsen ḏi Arebbi wenni iy ḏaneɣ itḏebbaren marra ṯimesȓayin s ȓxir azzaysent nfareḥ.

¹⁸Tweṣṣa-ṯen aḏ ggen ȓxir aḏ iȓin ḏ twajar ƹlaḥsab lḥasanaṯ aḏ iȓin ṣaxiyin aḏ iȓin wejḏen bac aḏ ṣeddqen aḏ ḏebbaren.

¹⁹Amenni iy ɣa xemȓen agȓa i yixef nsen am yijjen n dsas ijehḏen i ṯuḏarṯ iy d ɣa yasen bac aḏ ṭṭfen mliḥ ḏi ṯuḏarṯ nni iy iǧan ḏ ṯuḏarṯ n ṣṣaḥ.

²⁰A Timutawus, ḥḍa minxef tkellafeḏ qbeȓ. Awggwej zi min tperpiren yinni war yuminen ca ḏ lʼafkar nni iy ḏaneɣ itƹarraḍen qqaren-as Lƹarfaniya[5] walakin manayenni ḏ ixarriqen waha.

²¹Ḏinni ȓebƹaḍ ḏfaren Lƹarfaniya-ya zaƹma menbaƹd ffɣen abriḏ n lʼiman. Aɣarwem yiȓi arḍa i kenniw.