Read Tarifit 2 Timutawus 1 Bible Online

2 Timutawus 1 - Tarifit bible

2 Timutawus 1

¹Nec ḏ Bulus ḏ ijjen n arrasul n Ƹisa Lmasiḥ s ȓxaḍar n Arebbi ƹlaḥsab lwaƹeḏ nni iy ḏaneɣ iwƹeḏ x ṯuḏarṯ nni iǧan ḏi Ƹisa Lmasiḥ.

²Tariɣ ṯabrat-a i Timutawus wenni iy iǧan am memmi iƹizzen xafi. Akiḏec yiȓi arḍa ḏ ȓehna ḏ arraḥmeṯ zi Arebbi Babaṯneɣ ḏ Ƹisa Lmasiḥ Siḏiṯneɣ.

³Tcekkareɣ Arebbi wenni ƹebbḏeɣ zi ȓejḏuḏ inu s yijjen n ḍḍamir iṣfan. Tettareɣ-as i Arebbi xac ǧiȓeṯ ḏ nhar bȓa ma aḏ beddeɣ.

⁴Xmi tfekkareɣ ḏeg imeṭṭawen nnec iteṭṭef-ayi-d ijjen n mezȓi ac ẓreɣ ḥima aḏ ƹemmareɣ s ȓefraḥeṯ.

⁵Ƹeqȓeɣ x lʼiman nnec bȓa nnifaq wenni iǧan ḏ amezwaru ḏi ḥennac Lwiza ḏ yemmac Anisa. Ȓexxu teyyqeɣ ḏ ṣṣaḥ belli aqaṯ ḏayec uȓa ḏ cek.

⁶X manaya ac fekkareɣ bac aḏ tsenhezzeḏ lqudra nni iy ḏayec iǧan zi Arebbi ƹlaḥsab wami xac serseɣ ifassen inu.

⁷Aqa Arebbi war ḏaneɣ yuci ca ijjen n arruḥ n ṯiggwḏi; Lla, qa yuca-aneɣ-d ijjen arruḥ n jjheḏ ḏ ȓemḥibbeṯ ḏ ȓeḥkam x yixef nneɣ s ȓaƹqeȓ.

⁸Iḏen war tseḏḥa ca aḏ tcehḏeḏ x Siḏiṯneɣ niɣ xafi nec iy iǧan ḏ ameḥbus ƹlaḥsab netta; Lla, qebbeȓ aƹeddeb nni iǧan ƹlaḥsab Lʼinjil, s jjheḏ n Arebbi.

⁹Isenjem-aneɣ iȓaɣa-yaneɣ-d s yijjen n uȓaɣi muqeddes. War ḏaneɣ d iȓaɣi ca ƹlaḥsab lḥasanaṯ nneɣ; Lla, iȓaɣa-yaneɣ-d ƹlaḥsab lɣaraḍ nnes netta ḏ arḍa nnes iy ḏaneɣ d yuca ḏi Ƹisa Lmasiḥ qbeȓ ma aḏ tebḏa ȓweqṯ n ddunect-a qaƹ.

¹⁰Arḍa-ya qa imeḍhar-d ȓexxu wami d imeḍhar Ƹisa Lmasiḥ wenni iy ḏaneɣ isenjamen wenni isbeṭṭȓen ȓmewṯ. Ȓexxu s ufus n Lʼinjil yuwi-d ṯuḏarṯ ɣar nnur ḏ ṯenni war ifennin ca.

¹¹Ƹlaḥsab Lʼinjil-a twaxḍareɣ nec aḏ beccareɣ aḏ iȓiɣ ḏ arrasul ḏ ijjen n umseȓmaḏ.

¹²X ssabab-a nec qa tƹeddabeɣ x marra ṯimesȓayin-a ṯina walakin war tseḏḥiɣ ca, nec ssneɣ wenni iy zi umneɣ. Teyyqeɣ netta izemmar aḏ iḥḍa lʼamana nni iy kiḏes jjiɣ ḥetta aȓ Nhar nni aneggaru.

¹³Meṯṯel ttaƹlim nni nican iy ṯesȓiḏ zzayi, akiḏes iy ɣa yiȓi ijjen n lʼiman ḏ yijjen n ȓemḥibbeṯ iy iǧan ḏi Ƹisa Lmasiḥ.

¹⁴Ḥḍa ṯamesȓayṯ nni iy ḏac ijja ḏ lʼamana, ḥḍa-t s Arruḥ iqeddsen iy ḏayneɣ izeddɣen.

¹⁵Cek ṯessneḏ belli marra yinni iǧan ḏi lʼiqlim n Asya semḥen ḏayi uȓa ḏ Fixulus ḏ Hirmujinus.

¹⁶Aḏ ibarek Siḏi Arebbi ȓeḥbab n umaṯneɣ Wanisfur, aṭṭas n ṯwaȓaṯin isertaḥ-ayi war iseḏḥi ca x snaseȓ inu.

¹⁷Lla, netta wami iǧa ḏi ṯendint n Ruma irezzu xafi aṭṭas aȓ wami iy ḏayi yufa.

¹⁸Aṯ ijj Siḏiṯneɣ ḥima aḏ yaf arraḥmeṯ zi Siḏi Arebbi ḏi Nhar nni aneggaru. Cek ƹaweḏ ṯessneḏ mecḥaȓ n ṯwaȓaṯin iy ḏayi iƹawen ḏi ṯendint n Ufasus.