Read Tarifit 2 Timutawus 3 Bible Online

2 Timutawus 3 - Tarifit bible

2 Timutawus 3

¹Fa labud itxeṣṣa aḏ tfehmeḏ belli ussan ineggura aḏ iȓin qeṣḥen.

²Qa iwḏan aḏ texsen ixef nsen, aḏ texsen tmenyaṯ, aḏaysen yiȓi ttakebbur, aḏ semɣaren ixef nsen, aḏ ssiwȓen awaȓ war iḥȓin x Arebbi. War tṭiƹin ca i lwalidin nsen, war tcekkaren ḥadd, war tiȓin ca ṣfan,

³war ḏaysen tiȓi ȓemḥibbeṯ, war semmḥen ca i yiwḏan, aḏ qqaren ȓbaṭeȓ, war ḥekkmen ca x yixef nsen, aḏ menɣen am ȓuḥuc, war tḥibbin ca min iǧan ḏ aṣebḥan,

⁴aḏ zzenzen ayṯmaṯsen, aḏ ggen ṯimesȓayin bȓa ȓaƹqeȓ, aḏ uffen s nfaxeṯ, aḏ ḥibben ccehweṯ nsen war tḥibbin ca Arebbi,

⁵aḏ ggen ixef nsen ƹebbḏen Arebbi walakin nekkaren jjheḏ nnes. Iwḏan-a, awggwej xasen.

⁶Iryazen-a ḏ yina iy d isnuquben ṯuḏrin am ibbuƹen taḏfen bac aḏ sayṭaren x ṯemɣarin iy ḏi ṯeǧa niyyeṯ tƹemmarent s ȓmuƹṣiyaṯ twacemmaṯent s waṭṭas n lʼanwaƹ n ccahawaṯ.

⁷Ȓebda tesȓant ɣar ttaƹlim walakin ƹemmarṣ aḏ awḍent aḏ ssnent lḥaqiqa.

⁸Mammec Yanis ḏ Yampris nni tƹarraḍen i Musa, amenni ƹaweḏ uȓa ḏ iryazen-a tƹarraḍen i lḥaqiqa. Ȓaƹquȓaṯ nsen ƹewwjen, lʼiman nsen ixwa.

⁹Walakin iryazen-a war tiwḍen ca mani. Qa aḏasen ṯewqeƹ mamc ḏasen ṯewqeƹ i Yanis ḏ Yampris nni, ṯubuhȓiya n iryazen-a aḏ d tmeḍhar i marra iwḏan.

¹⁰Walakin cek ṯessneḏ mliḥ ttaƹlim inu ḏ ubriḏ n ṯuḏarṯ inu ḏ lɣaraḍ inu ḏ lʼiman inu ḏ ttasiƹ n ȓxaḍar inu ḏ ȓemḥibbeṯ inu ḏ ṣṣbar inu

¹¹ḏ uƹeddeb inu ḏ tamara inu. Ṯessneḏ min ḏayi iweqƹen ḏi ṯendint n Wanṭakya ḏ Ikunya ḏ Listra ḏ min twaƹeddbeɣ ḏeg imucan nni. Innama, isefȓeṯ-ayi-d Siḏiṯneɣ zi marra manayenni.

¹²Ḏ ṣṣaḥ, marra wenni iy irezzun aḏ iƹic s lʼiman iǧan ḏi Ƹisa Lmasiḥ qa aḏ itwaƹeddeb.

¹³Amma iryazen iƹeffanen ḏ iryazen icemmaṯen niṯni aḏ arnin ḏi ṯuƹuffna waha, niṯni aḏ cemmṯen aḏ twacemmṯen.

¹⁴Cek lla, arni ḏi min ḏac sȓemḏen ḏ min c iseqnaƹen minzi ṯessneḏ yinni iy ḏac isȓemḏen manayenni.

¹⁵Aqa zi ṯemẓi nnec ṯessneḏ ƹaweḏ Ṯira iǧan Muqeddsin zemmarent ac d arrent ḏ miɣis ƹlaḥsab mamc iy ɣa ṯnejmeḏ s lʼiman nni iy iǧan ḏi Ƹisa Lmasiḥ.

¹⁶Aqa marra Ṯira Muqeddsin usint-id zi Arruḥ n Arebbi, neffƹent ḥima azzaysent nseȓmeḏ azzaysent nenha azzaysent nṣeḥḥeḥ azzaysent nrebba ƹlaḥsab ṣṣulḥ.

¹⁷Ḥima aryaz n Arebbi aḏ yiȓi iwjeḏ aḏ yaf iḏebbar-as s qaƹ ṯimesȓayin ƹlaḥsab kuȓ ȓxeḏmeṯ ḏ ṯaṣebḥant.