Read Tarifit Titus 1 Bible Online

Titus 1 - Tarifit bible

Titus 1

¹Nec ḏ Bulus ḏ axeddam n Arebbi ḏ arrasul n Ƹisa Lmasiḥ xeddmeɣ ƹlaḥsab yinni ig ixḍar Arebbi bac aḏ amnen aḏ ssnen lḥaqiqa iy ṯen isegguren ɣar min iǧan nican ḏi lʼiman.

²Lʼiman-a ḏ ṯusna-ya[1] ṯbedda x lʼamal n ṯuḏarṯ nni war ifennin ƹemmarṣ, ṯenni iy zi iwƹeḏ Arebbi iƹni wenni war isxerriqen ca. Iwƹeḏ s ṯuḏarṯ nni qbeȓ ma aḏ bḏan zmanaṯ qaƹ.

³U ḏi lweqṯ nni ig ixḍar netta ismeḍhar-d lwaƹed-a s ttebcir nni iy zi ḏayi itwakellef s lʼamar n Arebbi wenni iy ḏaneɣ isnejmen.

⁴Tariɣ ṯabrat-a i Titus wenni iy iǧan am memmi ḏ ṣṣaḥ ḏi lʼiman-a iy ḏi ncarrec. Akiḏec yiȓi arḍa ḏ ȓehna zi Arebbi Babaṯneɣ ḏ Ƹisa Lmasiḥ wenni iy ḏaneɣ isnejmen.

⁵X manayenni jjiɣ-cek ḏi ṯeyzirṯ n Krit, aḏ tƹeḏȓeḏ min tuɣa rezzuɣ nec aḏ ƹeḏȓeɣ war uwiḍeɣ ca u ƹaweḏ bac aḏ tixḍareḏ imeqqranen n jmaƹeṯ n ȓmuminin ḏi mkuȓ abilaj am mammec iy c weṣṣiɣ.

⁶Ameqqran-a maci aḏ yiȓi ḏ ijjen n bnaḏem tƹeyyaben-ṯ yiwḏan. Aɣares ṯiȓi ijjen n ṯemɣarṯ waha aḏ iȓin iḥenjiren nnes ḏ ȓmuminin. Maci axasen inin yiwḏan teggen lmadella n ssekra niɣ war tseḏḥin ca.

⁷Aqa arrayes n jmaƹeṯ itkellaf netta s lmesʼuliya zi Arebbi u labud aḏ yiȓi bȓa ȓƹib, war ḏayes itiȓi bu ttakebbur, war itƹeṣṣib ca ḏeɣya, war isekkar ca s ccreb, war icciṯ ca, war iḍemmeƹ ca ḏi tmenyaṯ.

⁸Wah, itxeṣṣa aḏ itreḥḥab zeg inewjiwen, aḏas iteƹjib min iǧan ḏ aṣebḥan, aḏ iḥkem x ṯnefsiyṯ nnes, aḏayes yiȓi lmaƹqul, aḏ yiȓi iṣfa, aḏ irebba ixef nnes.

⁹Itxeṣṣa u labud aḏ iṭṭef mliḥ ḏeg wawaȓ nni iy ḏi ṯeǧa ttiqeṯ iy ḏas itwasȓemḏen ḥima aḏ icejjeƹ iwḏan s yijjen n ttaƹlim nican aḏ inha yinni itƹarraḍen i ttaƹlim-a.

¹⁰Liʼanna yinni iy ḏi ṯeǧa ṯɣennant aqaṯen mujudin, ssawaȓen waha niṯni ḏ iɣeddaren xaṣṣatan ḏ yinni iticcen lhimma aṭṭas i ṭṭahareṯ.[2]

¹¹Yina aqemmum nsen itxeṣṣa-yasen aḏasen itwaqqen. Niṯni mecḥaȓ n lƹaʼilaṯ kemȓent iy sparḏȓen wami ḏasen seȓmaḏen ṯimesȓayin itxeṣṣa-yasen war ḏasen ṯent seȓmiḏen ca, niṯni ḍemmƹen ḏi tmenyaṯ waha.

¹²Ijjen zzaysen ḥessben-ṯ ḏ nnabi netta s yixef nnes inna: "Niṯni Ayṯ-Krit ȓebda ḏ ayṯ-buyixarriqen ḏ ȓuḥuc iwƹaren ḏ imaƹgazen ḏaysen aƹeddis waha."

¹³Aqa chaḏeṯ nni iy inna nican iy ṯeǧa. Iḏen, nha-ṯen s ȓeqsaḥeṯ ḥima aḏ iȓin nican ḏi lʼiman.

¹⁴Maci aḏ ggen array i ṯḥuja nni n Ayṯ-Israʼil niɣ aḏ ggen array i ȓuṣiyaṯ nni n yinni isbeƹƹaḏen ixef nsen zi lḥaqiqa.

¹⁵Aqa yinni ig iǧan ṣfan ataf qaƹ ṯimesȓayin aḏaysen iȓint ṣfant. Walakin yinni ixenzen war uminen ca ataf war ḏaysen tiȓi uȓa ḏ ijjen n ṯmesȓayṯ ṯeṣfa. Ataf ȓƹaquȓaṯ nsen ḏ ḍḍamiraṯ nsen s ṯnayen texnizen.

¹⁶Qqaren qa nessen Arebbi walakin nekkaren-ṯ s ȓefƹayeȓ nsen. Niṯni twaƹiffen, war tṭiƹin ca, war neffƹen ca uȓa ḏeg yijjen n ȓxeḏmeṯ ḏ ṯaṣebḥant.