Read Tarifit Titus 3 Bible Online

Titus 3 - Tarifit bible

Titus 3

¹Sfekkar i ȓmuminin aḏ ggen array i ȓḥukkam ḏ ȓmexzen, aḏasen ṭaƹen aḏ iȓin wejḏen i kuȓ ȓxeḏmeṯ ḏ ṯaṣebḥant.

²Sfekkar-aṯen ḥima war tƹeyyiben ḥadd, war tmenɣin ca s wawaȓen, aḏ iȓin trankiȓ, aḏ sxeḏmen ijjen n ttawaḍuƹ ak marra iwḏan.

³Cuf, neccin ƹaweḏ tuɣa ḏayneɣ ijjen n ȓeqfaȓeṯ, war netṭiƹi ca, netwacemmeṯ, ḥekkment xaneɣ aṭṭas n lʼanwaƹ n ccehawaṯ ḏ zzhu. Tuɣa netƹic ḏeg yijjen n ȓeqbaḥeṯ ḏ ȓeḥseḏ, ƹiffen-aneɣ yiwḏan, netƹiffa ayawya.

⁴Walakin wami d imeḍhar ȓxir ḏ lḥanana n Arebbi wenni iy ḏaneɣ isnejmen

⁵ȓexddenni isenjem-aneɣ maci ƹlaḥsab lḥasanaṯ nni iy negga; Lla, tuɣa ƹlaḥsab arraḥmeṯ nnes netta. Issireḏ-aneɣ s waman n uxȓaq ḏ jḏiḏ, yarra-aneɣ ḏ jḏiḏ s ufus n Arruḥ iqeddsen.

⁶Arruḥ-a ifareɣ-iṯ-iḏ xaneɣ Arebbi s yijjen n ȓxir imɣar s ufus n Ƹisa Lmasiḥ wenni iy ḏaneɣ isnejmen.

⁷Ḥima a nwareṯ zzayes, aɣarneɣ yiȓi ijjen n lʼamal n ṯuḏarṯ ṯenni war ifennin ca liʼanna nmeṣȓaḥ ak Arebbi s arḍa nnes.

⁸Awaȓ-a iy qqareɣ ḏayes ttiqeṯ. Nec xseɣ cek aḏ twekkḏeḏ x ṯmesȓayin-a i yinni iy yumnen zi Arebbi bac aḏ d arren ȓbaȓ nsen aḏ ṭewwƹen ixef nsen s lḥasanaṯ. Ṯimesȓayin-a ḏ ṯiṣebḥanin s waṭṭas neffƹent iwḏan.

⁹Walakin siggwej ixef nnec zeg imnaqaren iy ḏi ṯeǧa ɣir ṯubuhȓiya u ƹaweḏ zi lbaḥt nni n ṯcejjura n ȓejḏuḏ[3] ḏ imenɣiwen ḏ imxarwaḍen x ccariƹa liʼanna niṯni ḏ ȓbaṭeȓ waha war neffƹen ca qaƹ.

¹⁰Wenni ismenɣan iwḏan ag wayawya cek ƹȓem-as ṯwaȓa ṯamezwarut ḏ wis ṯnayen ȓexddenni awggwej zzayes qaƹ.

¹¹Ṯessneḏ illa bnaḏem-a iƹeṣṣa ḏ amƹewwaj, lƹiqab nnes x yiȓi nnes.

¹²Xmi ḏawem d ɣa ssekkeɣ umaṯneɣ Artimas niɣ ḏ Tuciq, egg lmejhud nnec aɣari d ṯaseḏ ɣar ṯendint n Nikupris minzi nec tuɣa fekkareɣ aḏ seƹḏuɣ ḏinni ȓmecta.

¹³Ƹlaḥsab ayṯmaṯneɣ Apullus ḏ Zinnas wenni iy iǧan ḏ awkiȓ, egg lmejhud nnec bac aṯen ṯƹawneḏ ḏeg ubriḏ nsen; Xzar ma ɣarsen marra min teḥḏajan.

¹⁴Iwḏan nneɣ itxeṣṣa war tƹicen ca bȓa nnfaƹ, itxeṣṣa aḏ ṭewwƹen ixef nsen s lḥasanaṯ ḥima aḏ debbaren i yina iteḥḏajan.

¹⁵Sawwaḍen-ac-d sȓam marra yinni iǧan akiḏi. Siweḍ-asen sȓam i yinni iy ḏaneɣ itexsen ḏi lʼiman. Akiḏwem yiȓi arḍa i marra kenniw.