Read Tarifit Iƹibraniyen 1 Bible Online

Iƹibraniyen 1 - Tarifit bible

Iƹibraniyen 1

¹Ḏi zman issawaȓ Arebbi ak ȓejḏuḏ nneɣ s uqemmum n lʼanbiya s waṭṭas n ṯwaȓaṯin s waṭṭas n ibriḏen.

²Walakin ḏi lʼayyam-a ineggura issawaȓ akiḏneɣ s uqemmum n Mmis iƹni wenni iy ixḍar aḏ iwareṯ marra ṯimesȓayin, zzayes iy d ixȓeq Arebbi ddunect.

³Netta ḏ nnur n lƹaḍama n Arebbi ḏ ṣṣifeṯ n ṭṭabiƹa nnes bȓa axeṭṭi. S jjheḏ n wawaȓ nnes iy zi irebbu marra ṯimesȓayin. Wami iḥell ȓmuƹṣiyaṯ n bnaḏem issiṣfa-ṯent, ssenni iqqim x ufusi n Arebbi Subḥana wa Tƹala.

⁴Fa Mmis iḏweȓ imɣar aṭṭas x lmalaʼikaṯ minzi isem nni iy ḏas iswareṯ Arebbi imɣar aṭṭas x yisemawen nsent.

⁵Arebbi ƹemmarṣ war ḏas yinni i can n lmalak zi lmalaʼikaṯ aqa cek ḏ Mmi, nhara nec ḏewȓeɣ ḏ Babac. Ƹemmarṣ war yinni x can n lmalak qa nec aḏ iȓiɣ ḏ Babas, netta aḏ yiȓi ḏ Mmi.

⁶U ƹaweḏ Arebbi wami d itawi Mmis amenzu[1] ɣar ddunect-a iqqar: Aḏas sejjḏent marra lmalaʼikaṯ.

⁷Xmi issawaȓ x lmalaʼikaṯ iqqar: <Ixeǧeq-d lmalaʼikaṯ nnes ḏ arriḥ, ḏ imsexxaren nnes ḏ aḥaḏuq n ṯmessi.>

⁸Walakin x Mmis iqqar ḏi Lkitab: <Ay Arebbi, ȓƹarc nnec aḏ idum i ȓebda n ȓebdaṯ, ȓḥaqq aḏ yiȓi ḏ ṯaɣriṯ n ȓeḥkam nnec.

⁹Tḥibbiḏ min iṣeȓḥen, tƹiffiḏ ccarr. S manaya Arebbi iƹni Arebbi nnec, iḏhen-ac s zzect n ȓefraḥeṯ, isiȓi-yic ḏeg ujenna x imƹacaren nnec.>

¹⁰Iqqar ƹaweḏ: <Ay Arebbi, ḏeg umezwaru ṯserseḏ dsasaṯ n ddunect-a, ṯeggiḏ ijennaṯen[2] s ufus nnec.

¹¹Yina aḏ fnan cek aḏ tdumeḏ, marra aḏ rcan am warruḍ.

¹²Aṯen ṯḍefseḏ am uzeǧab ḏ axarṭiṭ, aḏ twabeddȓen am warruḍ. Cek lla, war tbeddiȓeḏ ca, iseggwusa nnec ƹemmarṣ aḏ fnan.>

¹³Iwa ƹemmarṣ Arebbi war yinni i can n lmalak zi lmalaʼikaṯ: <Qqim-d x ufusi inu aȓ d ɣa ggeɣ ȓƹaḏyan nnec swadday iḍaren nnec.>

¹⁴Lmalaʼikaṯ, niṯenti min ƹnant? Niṯenti ḏ arruḥaṯ twassekkent-id aḏ sexxarent i yinni iy ɣa iwarṯen asenjem.