Read Tarifit Iƹibraniyen 11 Bible Online

Iƹibraniyen 11 - Tarifit bible

Iƹibraniyen 11

¹Fa lʼiman netta ḏ ijjen n ttiqeṯ ijehḏen ḏi min netraja, neccin metʼakkadin ḏi ṯmesȓayin waxxa war ṯent netwiȓi ca.

²S lʼiman-a iy twacekkaren iwḏan n zman.

³S lʼiman iy nfehhem qa ddunect-a ṯetwaxȓeq-d s wawaȓ n Arebbi iƹni min ḏayes netwaȓa war d ikki ca zi min d itbanen.

⁴S lʼiman ikkar nnabi Habil iqeddem ijjen n dbiḥeṯ iy zi xas yarḍa Arebbi ḥsen zi ṯenni n wumas Qabil. Ƹlaḥsab lʼiman-a itcekkar-iṯ Arebbi iqbeȓ-iṯ netta nican wami xas issiweȓ Arebbi mliḥ x min iqeddem. U nnabi Habil s lʼiman nnes netta ƹaḏ issawaȓ waxxa immuṯ.

⁵S lʼiman ikkar nnabi Axnux itwaxḍef ɣar ujenna ḥima war itwiȓi ca ȓmewṯ. War ṯ ufin ca, iysi-ṯ Arebbi ɣares. U qbeȓ ma aḏ itwaxḍef itwacekkar am yijjen yarḍa xas Arebbi.

⁶Iwa uȓa ḏ ijjen war izemmar axas yareṭṭa Arebbi bȓa lʼiman. Minzi wenni iy ɣa qarrben ɣar Arebbi labud aḏ yamen belli netta iǧa u ḏ netta ig itjazan yinni iy xas irezzun s wuȓawen nsen.

⁷S lʼiman nnabi Nuḥ wami ḏas iƹȓem Arebbi x ṯmesȓayin nni war ṯent ẓrin yiwḏan ƹemmarṣ, ikkar netta s yijjen n ṯiggwḏi ḏ yijjen n ȓeḥya igga aɣarrabu bac aḏ isenjem ayṯbab n ṯeddarṯ nnes.[13] Wami igga manayenni netta iƹeyyeb ddunect, iwareṯ ṣṣulḥ nni iy d itasen s lʼiman.

⁸S lʼiman ikkar nnabi Brahim iṭaƹ-as i Arebbi wami ḏas d iȓaɣa aḏ iraḥ ɣar yijjen n umcan iy ɣa iqbeȓ ḏ lwareṯ. Iffeɣ netta tuɣa war issin ca mani ɣa iraḥ.

⁹S lʼiman iruḥ netta izḏeɣ ḏi ṯmurṯ nni iy zi ṯ iwƹeḏ Arebbi, netta aqaṯ ḏinni am ca n ubarrani. Itƹic ḏeg iqiḍan akiḏes memmis Isḥaq ḏ wayyaw nnes Yaƹqub, twaraṯen akiḏes ƹlaḥsab min zi ṯen iwƹeḏ.

¹⁰Ȓaḥeqqac Brahim itraja ṯandint nni ɣar ǧan dsasaṯ itduman, ixaṭṭ-it Arebbi ibna-t.

¹¹S lʼiman Sara s yixef nnes immuc-as jjheḏ aḏ teysi aƹeddis waxxa nettaṯ ṯnumɣar, minzi ṯekkar nettaṯ ṯḥesseb wenni iy t iweƹḏen ḏayes ttiqeṯ.

¹²Ṯumma zi Brahim ḏ ijjen n uryaz iwsar ikemmeȓ, ijja-d ijjen n ddurriṯ am yiṯran iǧan ḏeg ujenna am yijḏi iǧan x cceṭṭ n ȓebḥar war izemmar ḥadd at iḥesseb.

¹³Yina marra mmuṯen ḏi lʼiman nni nsen qbeȓ ma ḏasen d awḍent ṯmesȓayin nni iy zi ṯen iwƹeḏ. Walakin ẓrin-ṯent reḥḥben zzaysent zi ȓeggwaj, ƹtarfen belli niṯni ḏ ibarraniyen ḏ iƹezzaben ḏi ṯmurṯ-a.

¹⁴Iwḏan iy ssawaȓen ammu iteḍhar-d belli rezzun x yijjen n ṯmurṯ aḏ tiȓi ḏ ṯamurṯ nsen.

¹⁵Maƹlik tuɣa txemmamen ḏi ṯmurṯ nni manis d ffɣen, iȓi ɣarsen lfurṣa aḏ d ƹeqben.

¹⁶Walakin lla, rezzun x yijjen n ṯmurṯ ḥsen zi ṯenni, iƹni icten ḏeg ujenna. X manayenni Arebbi war iseḏḥi ca aḏas inin qa cek ḏ Arebbi nneɣ minzi netta isewjeḏ-asen ijjen n ṯendint.

¹⁷S lʼiman ikkar nnabi Brahim aḏ iqeddem ḏ dbiḥeṯ s memmis Isḥaq wami ṯ ijarreb Arebbi. Iƹni tuɣa itqeddam ḏ dbiḥeṯ s memmis waḥḏes iy zi iwƹeḏ Arebbi Brahim,

¹⁸tuɣa inna-as qa s Isḥaq iy zi ɣa twaḥesseb ddurriṯ nnec.

¹⁹Iḥesseb Brahim belli izemmar Arebbi aḏ d isekkar mmis zeg imettinen. Manayenni ḏayes ȓemƹani minzi wah, memmis iḏweȓ-d i Brahim am yijjen zi ȓmewṯ.

²⁰S lʼiman ikkar nnabi Isḥaq ibarek ṯarwa nnes Yaƹqub ḏ Ƹasu ƹlaḥsab lmustaqbel nsen.

²¹S lʼiman ikkar nnabi Yaƹqub wami tuɣa itmetta ibarek ṯarwa n mmis Yusef ij-ij, iƹebbeḏ netta xmi itsennaḏ x ṯeɣȓiyṯ nnes.

²²S lʼiman ikkar nnabi Yusef ɣar uneggaru n ṯuḏarṯ nnes, issiweȓ x wufuɣ n Ayṯ-Israʼil zi Miṣra iweṣṣa-aṯen aḏ ysin akiḏsen ixsan nnes.

²³S lʼiman kkaren lwalidin n nnabi Musa snuffaren memmiṯsen wami d ixȓeq minzi ẓrin belli netta iṣbaḥ aṭṭas, war ggwiḏen ca zi min ḏasen iweṣṣa uzeǧiḏ.

²⁴S lʼiman ikkar nnabi Musa wami imɣar yugi aḏas ȓaɣan memmis n yeǧis n lmalik Firƹun.

²⁵Ixḍar axas buṣaren imiṣriyen ak ccaƹb n Arebbi, war iqbiȓ ca aḏ ifareḥ ḏeg ufelles nni war itdumin ca.

²⁶Ifhem meȓa seḥqaren-ṯ ƹlaḥsab Lmasiḥ iƹni manayenni ɣares lqima ktar zi min ɣarsen ḏ lkunuz ḏi Miṣra. Aqa netta ixezzar ɣar zzaṯ ḏi ljaʼiza nnes.

²⁷S lʼiman ikkar Musa iffeɣ zi Miṣra, war iggwiḏ ca zeg uɣḍab n uzeǧiḏ nni. Iṭṭef ḏi lʼiman nnes am yijjen itwaȓan Arebbi netta war izemmar aṯ iẓer ḥadd.

²⁸S lʼiman ikkar netta igga Ȓƹiḏ Ameqqran irucc ṯiwwura s iḏammen n ȓƹiḏ ḥima Ƹazȓayen war ineqq ca imenza[14] n Ayṯ-Israʼil.

²⁹S lʼiman ikkar ccaƹb iẓwa ɣar ujemmaḍ-in n Ȓebḥar Azeggwaɣ s iḍaren nsen, ṯisi nnes ṯegga amecnaw ṯamurṯ yuzɣen. Walakin wami jarrben imiṣriyen aḏ ƹḏun ssenni infeyyeḍ-d xasen ȓebḥar ɣerqen.

³⁰S lʼiman ikkar ccaƹb ȓexddenni wḍan ȓeḥyuḍ n ṯendint n Ariḥa wami ḏas inneḍ ccaƹb sebƹiyyam.

³¹S lʼiman ṯaḥenjirṯ nni umi qqaren Riḥab iy tuɣa iffɣen abrid, ṯekkar nettaṯ ṯreḥḥeb s lmuxabaraṯ n Ayṯ-Israʼil. S manayenni war ṯemmuṯ ca ak yinni war itṭiƹin ca.

³²Iwa min ɣa iniɣ ƹaḏ? War ɣari bu ȓweqṯ aḏ ssiwȓeɣ x Jaƹḏun niɣ ḏ Barak niɣ ḏ Camcun niɣ ḏ Yafta niɣ ḏ nnabi Dawed niɣ ḏ nnabi Ṣamwil niɣ ḏ marra lʼanbiya.

³³S lʼiman kkaren niṯni rebḥen lmemlakaṯ, ḥekmen s ȓḥaqq, ḥerṯen x lwuƹud, bellƹen iqemmumen n sbuƹaṯ,

³⁴sexsin aḥaḏuq n ṯmessi, feȓṯen zi ȓeqḍeƹ n ssif. Ḍḍuƹef nsen iḏweȓ ḏ jjheḏ, jehḏen ḏi ȓḥarb uzzȓen x ȓƹaskar n ṯmura nneɣni.

³⁵Ȓebƹaḍ n ṯemɣarin ysint-id imettinen nsent iy d kkaren zi ȓmewṯ. Ȓebƹaḍ n yiwḏan marrṯen-ṯen, walakin niṯni ugin aḏ twaḍeȓqen bac aḏ rebḥen ijjen n lqiyama ḥsen.

³⁶Ȓebƹaḍ n yiwḏan ḥeggaren-ṯen, uwṯin-ṯen s usɣun, carfen-ṯen s snaseȓ, ḥebbsen-ṯen.

³⁷Rejmen-ṯen s uzru, qessen-ṯen x ṯnayen s ȓmencar, nɣin-ṯen s ssif. Gguren s yiȓemawen n iḥuȓiyen ḏ iɣayḏen. Niṯni ḏ imesƹan, twaƹeddaben, tenƹeddan xasen.

³⁸Niṯni ddunect-a war ṯen ṯesḏaheǧ ca. Tƹezzaben ḏi ȓexȓawaṯ ḏ iḏurar ḏ ixubac ḏ yifran n ṯmurṯ.

³⁹Marra yina twacekkaren s lʼiman nsen. Innama, uȓa ḏ ijjen zzaysen tuɣa ƹaḏ war ḏas d yuwiḍ ca min zi ṯ iwƹeḏ Arebbi.

⁴⁰Tuɣa Arebbi iḏebbar-aneɣ-d i neccin zi qbeȓ ijjen n ȓḥajeṯ ḥsen bac niṯni war tiwiḍen ca ɣar uneggaru iƹni aḏ iȓin kemȓen bȓa neccin.