Read Tarifit Iƹibraniyen 2 Bible Online

Iƹibraniyen 2 - Tarifit bible

Iƹibraniyen 2

¹X manaya labud a d narr ȓbaȓ nneɣ i min netsȓa bac war nteffeɣ ca abriḏ.

²Cuf, Ccariƹa nni n Musa tuɣa uwint-tid lmalaʼikaṯ, tseyṭar xaneɣ tƹaqab-aneɣ iƹni meȓa neƹṣa niɣ meȓa war nṭiƹ ca.

³Ȓexxu asenjem nneɣ imɣaren, mammec iy ɣa negg a nenjem zi lƹiqab iƹni meȓa neɣfeȓ x usenjem-a? Awaȓ n usenjem-a ibcar-iṯ-iḏ ḏ amezwaru Siḏiṯneɣ, ṯumma cehḏen xas yinni iy ḏas iṣennṭen ssiwḍen-ṯ-iḏ i neccin.

⁴Icehheḏ xas uȓa ḏ Arebbi s lƹalamaṯ ḏ lburhanaṯ ḏ waṭṭas n lʼanwaƹ n lmuƹjizaṯ. S lʼiden nnes ƹaweḏ ifreq lqudraṯ ruḥiyaṯ n Arruḥ iqeddsen.

⁵Ȓexxu neccin nessawaȓ x ddunect-a iy tuɣa netraja. Cuf, Arebbi maci i lmalaʼikaṯ umi yuca ȓeḥkam x ddunect-a lla. Aqa ḏinni ijjen n umcan ḏi Lkitab mani icheḏ ijjen x manaya iqqar: <Tfekkareḏ cek ḏeg iryazen, maca min swan? Mmis n bnaḏem, mayemmi iy ḏayes ɣa ithillan?

⁷Ṯeggiḏ-ṯ ƹȓayen am lmexluqaṯ ujenna yuƹȓan, ṯuciḏ-as ttaj n ȓuweqqar ḏ waṭṭas n ccan,

⁸ṯeggiḏ swadday iḍaren nnes marra min iǧan.> Wami igga Arebbi marra swadday iḍaren nnes, war ṯeqqim uȓa ḏ ijjen n ṯmesȓayṯ war xas iḥekkim ca. Innama, ƹaḏ ḏi ȓweqṯ-a war netwiȓi ca marra swadday iḍaren n bnaḏem.

⁹Walakin Ƹisa wah, netwaȓa-ṯ ȓexxu s ttaj nnes n ȓuweqqar ḏ waṭṭas n ccan. Mayemmi? Lʼianna Ƹisa ḏeg yijjen n ȓweqṯ tuɣa isehwa-ṯ-iḏ Arebbi cwayt swadday i lmalaʼikaṯ iƹni wami iṣbar i ȓaƹḏab n ȓmewṯ. Bac netta s arḍa n Arebbi aḏ iqqas ȓmewṯ, ȓmewṯ nni aḏ tiȓi n marra iwḏan.

¹⁰Zi Arebbi iy tiȓint marra ṯimesȓayin-a u netta umi tiȓint. Ḏ Arebbi netta iy yarrin Ƹisa war ḏayes bu ȓƹib s ȓaƹḏab nni nnes ig xas iƹḏun ḥima Arebbi aḏ d yawi aṭṭas n ṯarwa ɣar lƹaḍama nnes. Ɣares ȓmaƹna manaya ȓaḥeqqac Ƹisa netta ḏ zzaƹim n usenjem n ṯarwa-ya.

¹¹Aqa wenni issiṣfan iwḏan zi ȓmuƹṣiyaṯ nsen u ḏ yiwḏan nni itwassiṣfan, Babaṯsen ḏ ijjen. X manaya war xasen itƹeffar ca aḏasen yini ay ayṯma.

¹²Lla, iqqar-as i Arebbi: <Aḏ ssiwȓeɣ x yisem nnec ak ayṯma, ḏi ȓwesṭ n jmaƹeṯ ac ḥemḏeɣ s iɣennijen.>

¹³U ƹaweḏ iqqar: <Nec aḏ teyyqeɣ ḏi Arebbi.> Iqqar ƹaweḏ: <Aqayi nec ḏ ṯarwa inu iy ḏayi yuca Arebbi.>

¹⁴Iḏen ṯarwa-ya niṯni ḏ iwḏan ḏaysen marra aysum ḏ iḏammen. X manaya Ƹisa uȓa ḏ netta ḏayes ṯimesȓayin-a. Ammu s ȓmewṯ nnes isbeṭṭeȓ zzaƹim n ȓmewṯ iƹni ḏ Ibȓis.

¹⁵U ƹaweḏ Ƹisa aḏ d iḍȓeq i yinni iǧan ḏ isemɣan zi ȓexȓuq iƹni yinni xasen ṯḥekkem ṯiggwḏi zi ȓmewṯ uca aḏ iȓin ḥurr.

¹⁶Cuf, nessen belli Ƹisa war itƹiwin ca lmalaʼikaṯ: Lla, itƹawan ṯarwa n Brahim.

¹⁷X manaya tuɣa wa labud Arebbi aḏ yarr Ƹisa am ayṯmas ḏi marra bac aḏ yiȓi ḏ ȓefqi ameqqran ḏayes arraḥmeṯ ḏayes ttiqeṯ ixeddem i Arebbi. U ƹaweḏ ȓefqi-ya aḏ iqeddem lfidya ḥima aḏ twaɣfarent ȓmuƹṣiyaṯ n yiwḏan.

¹⁸Wami netta s yixef nnes itwaƹeddeb ḏi ȓemḥayen, izemmar aḏ iƹawen yinni iǧan ḏi ȓemḥayen.