Read Tarifit Iƹibraniyen 4 Bible Online

Iƹibraniyen 4 - Tarifit bible

Iƹibraniyen 4

¹Iḏen fa ƹaḏ nzemmar a naḏef ḏi arraḥeṯ n Siḏi Arebbi minzi ḏaneɣ iwƹeḏ. Wa labud a neggweḏ bac war itɣimi uȓa ḏ ijjen zzaywem war ḏinni d ixeṭṭeȓ.

²Liʼanna ȓexbar-a n ȓxir iy ḏaneɣ d itwabeccaren i neccin, uȓa ḏ ȓejḏuḏ nneɣ twabeccaren zzayes. Walakin war stenfiƹen ca zzayes wami ugin azzayes amnen.

³Cuf, arraḥeṯ nni mixef issawaȓ Arebbi ataf ntaḏef ḏayes neccin iy yumnen. Issiweȓ Arebbi x manaya wami inna: <Qa nec jjuǧeɣ s uɣḍab inu nniɣ ƹemmarṣ aḏ aḏfen ḏi arraḥeṯ inu.> Man arraḥeṯ? Iƹni ṯenni n Siḏi Arebbi wami ikemmeȓ ȓexḏayem nnes ixȓeq-d ddunect-a.[3]

⁴Iwa ḏeg yijjen n lʼaya amenni ig inna x nhar wis sebƹa: Inna: <Ḏi nhar wis sebƹa ig ireyyeḥ Arebbi zi marra ȓexḏayem nnes.>

⁵U ƹaweḏ ḏi lʼaya nni nneɣni iy xef nessiweȓ qbeȓ inna: <Ƹemmarṣ aḏ aḏfen ḏi arraḥeṯ inu.>

⁶Iḏen ƹaḏ qqimen ȓebƹaḍ n yiwḏan aḏ aḏfen ḏi arraḥeṯ-a n Siḏi Arebbi, yinni itwabeccaren zi qbeȓ war uḏifen ca ḏinni liʼanna war uminen ca.

⁷S manaya tuɣa isejjel Arebbi ijjen n ȓweqṯ nneɣni bac a naḏef ḏi arraḥeṯ nnes, ȓweqṯ nni isemma-yas Arebbi <Nhara.> Menbaƹd i waṭṭas n lqurun ig issiweȓ Arebbi s nnabi Dawed wami inna mamc nenna qbeȓ: <Nhara meȓa ṯesȓim i ṣṣut n Arebbi, war seqsiḥeṯ ca uȓawen nwem.>

⁸Cuf, maƹlik nnabi Yacuƹa tuɣa issiweḍ ȓejḏuḏ nneɣ ɣar yijjen n arraḥeṯ, ataf Arebbi war issiweȓ ca x yijjen n nhar nneɣni menbaƹd i waṭṭas n lqurun.

⁹Falihaḏa ƹaḏ iqqim ijjen n ssebṯ, iƹni ḏ ijjen n ȓweqṯ n arraḥeṯ i ccaƹb n Arebbi.

¹⁰Liʼanna wenni yuḏfen ḏi arraḥeṯ n Arebbi aqa itreyyaḥ zi ȓxeḏmeṯ nnes mammec ireyyeḥ Arebbi zi ȓxeḏmeṯ nni nnes.

¹¹Iḏen wa labud a negg lmejhud nneɣ bac a naḏef ḏi arraḥeṯ nni ḥima uȓa ḏ ijjen war iweṭṭi ḏi nnefs n ȓmuƹṣiyeṯ.

¹²Aqa awaȓ n Arebbi iddar netta ifsus, iqḍeƹ aṭṭas ktar zi ssif n ṯnayen n jjihaṯ. Itaḏef aȓ ḏaxeȓ iferreq buḥbeȓ ḏ arruḥ ḏ mani tmunen ȓemfaseȓ, itaḏef ɣar waḏuf. Itmeyyaz jar lʼafkar ḏ lʼaɣraḍ n wuȓ.

¹³War ḏinni uȓa ḏ ijjen n ṯmesȓayṯ zi min d itwaxeȓqen ṯnuffar zi Arebbi. Qaƹ ṯimesȓayin twafeḍḥent-id twaḍharent-id i ṯiṭṭawin n wenni umi ɣa nuc ȓeḥsab nneɣ.

¹⁴Iḏen neccin a neṭṭef mliḥ ḏi lʼiman nneɣ iy xef ncehheḏ minzi ɣarneɣ ijjen n ȓefqi ameqqran imɣar yuḏef ḏeg ijennaṯen iƹḏu-ṯen, netta ḏ Ƹisa Mmis n Arebbi.

¹⁵Cuf, war ɣarneɣ bu ijjen n ȓefqi ameqqran netta war izemmar ca aḏ iḥess zi ḍḍuƹef nneɣ. Wah, ɣarneɣ ijjen ȓefqi kkint xas marra ȓemḥayen; netta am neccin walakin war iggi bu ȓmuƹṣiyeṯ.

¹⁶Falihaḏa a nqarreb s zƹameṯ ɣar ȓƹarc n Arebbi ḏayes arḍa bac a naf ḏinni arraḥmeṯ ḏ yijjen n arḍa iy ḏaneɣ ɣa iƹawnen ḏi ȓweqṯ n uḥḏaji nneɣ.