Read Tarifit Iƹibraniyen 6 Bible Online

Iƹibraniyen 6 - Tarifit bible

Iƹibraniyen 6

¹X manaya war netɣimiṯ ca ḏi ttaƹlim-a amezwaru x Lmasiḥ, a nuyureṯ ɣar zzaṯ bac a nemɣar. War ntaƹqib ca ɣar dsas. Iƹni war nessawaȓ ca ƹaḏ x ttuba nni n ssayiʼaṯ, niɣ x mammec ɣa negg a namen zi Arebbi,

²niɣ x ibriḏen bac aḏ twaṭehharen yiwḏan s waman, niɣ x mammec ɣa negg a nsers ifassen nneɣ x yiwḏan, niɣ x lqiyama n imettinen, niɣ x Lḥisab nni war ifennin ca.

³Iwa, a nuyureṯ ɣar zzaṯ iƹni meȓa ixes Arebbi.

⁴Amma yinni mixef iceƹceƹ nnur, qqasen lhadiya n ujenna, carrcen ḏi Arruḥ iqeddsen,

⁵ḏuwqen ƹaweḏ zi lbaraka n wawaȓ n Arebbi ḏ lquduraṯ n zman iy d ɣa yasen.

⁶Yina meȓa ffɣen abriḏ, war iǧi wi ṯen d ɣa yarren ɣar ttuba. Mayemmi? Liʼanna yina aḏ iȓin am tṣellaben Mmis n Arebbi ƹaweḏ x ṣṣalib tƹeyyaben-ṯ zzaṯ i yiwḏan.

⁷Cuf, meȓa ṯamurṯ iccaṯ xas unẓar aṭṭas nettaṯ ṯsess ticc ṯafeǧaḥṯ, ataf aḏ tawi ijjen n lbaraka zi Arebbi.

⁸Walakin meȓa ṯamurṯ nni ṯseɣmay-d ɣir isennanen ḏ ṯzeggwarṯ, ataf nettaṯ ḏ walu aqat ḏi lxaṭar aḏ twanƹeȓ, aȓ uneggaru at sḥarqen s ṯmessi.

⁹Ay imƹizzen inu, waxxa nessawaȓ ammu neccin metʼakeddin zzaywem iƹni x ṯmesȓayin ṯiṣebḥanin iy zi ɣa ṯnejmem.

¹⁰Iwa Arebbi, ma iticc ȓḥaqq ma lla? Wah, Arebbi war itettu ca ȓxeḏmeṯ nwem ḏ ȓemḥibbeṯ nni ḏas d ṯseḍharem wami ṯƹawnem ṣṣaliḥin. U ƹaḏ teggem manaya.

¹¹Nexs aḏ tḥawȓem kenniw s wuȓ kuȓ ijjen am qbeȓ bac aḏ tiȓim kenniw metʼakeddin ḏi lʼamal nwem aȓ uneggaru.

¹²War nexs ca aḏ tƹegzem. Itxeṣṣa aḏ tiȓim am yinni itwaraṯen s ṣṣbar ḏ lʼiman nsen x ṯmesȓayin nni iy zi ṯen iwƹeḏ Arebbi.

¹³Cuf, wami Arebbi iwƹeḏ Brahim x ȓƹaheḏ nni, ijjuǧ Arebbi aḏ icc ixef nnes. Mayemmi? Liʼanna war ḏinni ḥadd imɣar ktar zi Arebbi.

¹⁴Inna-as: <Nec jjuǧeɣ qa ac barkeɣ s yijjen n lbaraka ṯemɣar, aḏ semɣareɣ ddurriṯ nnec.>

¹⁵Iwa ammu wami iraja Brahim s yijjen n ṣṣbar yuweḍ-as-d min zi ṯ iwƹeḏ Arebbi.

¹⁶Liʼanna iwḏan tjuǧen s yijjen ḏ ameqqran zzaysen. U s yijjen n ṯjaǧiṯ aḏ ḥaqqen marra lqadiyaṯ nsen aḏ kemmȓent.

¹⁷X manaya iḍmen Arebbi manayenni s yijjen n ṯjaǧiṯ i yinni iy ɣa iwarṯen min zi ṯen iwƹeḏ. Iƹni ixes aḏasen d iseḍhar mliḥ ṭṭabiƹa n lɣaraḍ nnes ƹemmarṣ aḏ twabeddeȓ.

¹⁸Ṯnayen n ṯmesȓayin-a war twabeddiȓent ca,[6] Arebbi war izemmar axasent isxarreq. Zi ṯnayen n ṯmesȓayin-a azzaysent iy ɣa netwacejjeƹ neccin iy narweȓ bac aɣares nnuffar. Zzaysent iy ɣa neṭṭef s jjheḏ ḏi lʼamal iy ḏaneɣ itwabeccaren.

¹⁹Lʼamal-a itiȓi ɣarneɣ am yijjen n uȓiyzim n uɣarrabu n ȓaƹmar nneɣ, irseq s jjheḏ war iḍeǧeq. Yuḏef lʼamal-a iƹḏu ɣar ḏeffar n arrwaq n Uxxam Amqeddes Aṭṭas.

²⁰Ḏeg umcan nni yuḏef Ƹisa ḏinni ḏ amezwaru ƹlaḥsab neccin, iḏweȓ ḏ ȓefqi ameqqran i ȓebda amecnaw lfirqa nni n ȓefqi umi qqaren Malikiṣadiq.