Read Tarifit Iƹibraniyen 8 Bible Online

Iƹibraniyen 8 - Tarifit bible

Iƹibraniyen 8

¹Iwa, min iǧan muhim ḏi min neqqar? Iƹni ijjen n ȓefqi ameqqran am wenni iy xef nessiweȓ aqaṯ ɣarneɣ neccin. Iqqim netta x ufusi n lƹarc n Arebbi Subḥana wa Tƹala ḏeg ujenna.

²Netta ixeddem ḏi ṯemziḏa nni iƹni ḏ aqiḍun nni n ṣṣaḥ lƹaḍim iy igga Siḏi Arebbi maci bnaḏem.

³Cuf, kuȓ ȓefqi ameqqran tixḍaren-ṯ bac aḏ iqeddem ṣṣeḏqeṯ ḏ dbiḥaṯ. X manaya wa labud ȓefqi wanita iƹni ḏ Ƹisa aḏ iqeddem can n ȓḥajeṯ.

⁴Maƹlik iǧa netta ḏi ṯmurṯ-a, ataf war izemmar aḏ ixḏem ḏ ȓefqi liʼanna ḏanita ȓfuqaha n Ayṯ-Lawi itqeddamen ṣṣeḏqaṯ ƹlaḥsab Ccariƹa n Musa.

⁵Yina xeddmen ccɣeȓ nsen ḏeg yijjen n ṯemziḏa nettaṯ am yijjen n ṯiȓi itemcabbahen ḏi min iǧan ḏeg ujenna. X manayenni Arebbi iƹȓem i Musa wami ibḏa isbedda Aqiḍun nni Ameqqran inna-as: <Fekkar bac aḏ teggeḏ marra min ḏac xaṭṭeɣ ḏi lxariṭa nni ḏeg uḏrar.>

⁶Walakin ccɣeȓ nni n ȓefqi iy ḏas yuca i Ƹisa imɣar aṭṭas x ccɣeȓ nni aqḏim n ȓfuqaha nneɣni. U ȓƹaheḏ-a iy xef itcafaƹ netta imɣar aṭṭas x wenni aqḏim, liʼanna ibedd x yijjen n dsas n lwuƹud iy iǧan ḥsen.

⁷Maƹlik ȓƹaheḏ nni amezwaru war ḏas inqis walu, ataf war rezzun ca x wis ṯnayen.

⁸Liʼanna Arebbi yufa iwḏan nni ḏ ineqsiyen wami inna: <Aqa tasen-d wussan, iqqar-iṯ Siḏi Arebbi, aḏaysen ggeɣ ijjen n ȓƹaheḏ ḏ jḏiḏ i Ayṯ-Israʼil ḏ Ayṯ-Yahuḏa.

⁹Maci am ȓƹaheḏ nni iy ggiɣ ak ȓejḏuḏ nsen, wami ṯen ṭṭfeɣ zeg ifassen nsen, aṯen sufɣeɣ zi ṯmurṯ n Miṣra. Liʼanna niṯni war ṭṭifen ca ḏi ȓƹaheḏ inu, uca nec semḥeɣ ḏaysen, iqqar-iṯ Siḏi Arebbi.

¹⁰Ḏ wanita ḏ ȓƹaheḏ iy ɣa ggeɣ ak Ayṯ-Israʼil menbaƹd i ȓweqṯ nni, iqqar-iṯ Siḏi Arebbi. Aḏasen siḏfeɣ ȓuṣiyaṯ inu ḏi ȓaƹquȓaṯ nsen, aɣarsen iȓint ḏ ṯira x wuȓawen nsen. Aḏ iȓiɣ ḏ Arebbi nsen aḏ iȓin ḏ ccaƹb inu.

¹¹Maci kur ijjen aḏas iseȓmeḏ i wajjar nnes, niɣ i wumas aḏas yini: Ssen Siḏi Arebbi. Lla, marra iḏsen aḏayi ssnen nec, s umezyan nsen aȓ umeqqran nsen.

¹²Aqa nec aḏasen ɣfareɣ i ccarr nsen, ȓmuƹṣiyaṯ nsen war ḏaysent tfekkareɣ ca ƹaḏ.>

¹³Wami issiweȓ Arebbi x yijjen n ȓƹaheḏ ḏ jḏiḏ, ṣafi wenni amezwaru isbeṭṭaȓ-iṯ. U wenni ig itwasbeṭṭaȓen ȓexxu iḏewweȓ ḏ aqḏim, ataf ḏeɣya aḏ itwakkes war itɣimi ca.