Read Tarifit Yaƹqub 2 Bible Online

Yaƹqub 2 - Tarifit bible

Yaƹqub 2

¹Ay ayṯma, kenniw ṯumnem zi Siḏiṯneɣ Ƹisa Lmasiḥ iy ɣar ṯeǧa lƹaḍama, war teggeṯ ca s wuḏemawen jar yiwḏan.

²Maṯalan, yuḏef-d ijjen n ttajar ɣar jmaƹeṯ nwem igga ṯxaḏent n ddheb ḏeg ufus nnes yareḍ arruḍ iṣbaḥ. Iḏfar-iṯ-id ijjen ḏ ȓmeskin arruḍ nnes iwessex.

³Kenniw ḏeɣya ṯeqqarem-as i wenni iggin arruḍ ḏ aṣebḥan: Qqim cek ḏanita ḏeg umcan-a aṣebḥan. Ṯeqqarem-as ƹaweḏ i ȓmeskin: Cek bedd ḏiha niɣ qqim ḏanita ḏi ṯmurṯ ɣar iḍaren nneɣ.

⁴Iƹni teggem s wuḏemawen ak wayawya tmeyyazem jar yiwḏan s lʼafkar ṯiƹeffanin.

⁵Cuf ay ayṯma imƹizzen inu, ma war ṯessinem ca Arebbi ixḍar ȓmusakin n ddunect-a ḥima aḏ iȓin ḏ twajar s lʼiman nsen aḏ warṯen ḏi ȓmulk iy zi iwƹeḏ Arebbi yinni iy ṯ itḥibban?

⁶Walakin kenniw ṯḥeggarem ȓmusakin! Ma war ṯessinem ca ḏ twajar iy kenniw iy ḍeǧmen, tjarran-kenniw ɣar lmaḥakim?

⁷Ma war ṯessinem ca belli ḏ niṯni ig issawaȓen s ȓƹib ḏeg yisem aṣebḥan n Lmasiḥ wenni iy zi ḏawem tȓaɣan yiwḏan?

⁸Ȓuṣiyeṯ n Uzeǧiḏ izeǧiḏen iy d yusin ḏi Lkitab ṯeqqar: "Aḏ texseḏ ajjar nnec amecnaw ixef nnec." Kenniw aḏ teggem mliḥ meȓa ṯxeddmem zzayes.

⁹Walakin meȓa teggem s wuḏemawen jar yiwḏan, aqa kenniw teggem ȓmuƹṣiyeṯ, ṯḥekkem xawem ccariƹa belli ṯeƹṣam.

¹⁰Liʼanna wenni ixeddmen ḏi Ccariƹa-ya marra, meȓa ixḍa ɣir ḏeg yijjen n ȓuṣiyeṯ nnes ataf netta ixḍa ḏi ccariƹa amen-ṯekmaȓ.

¹¹Liʼanna wenni innan: <War zenna ca> inna ƹaweḏ <War neqq ca.> Meȓa ṯenɣiḏ war ṯezniḏ ca, ataf ṯeƹṣiḏ s ccariƹa.

¹²Iwa ssiwȓeṯ ggeṯ am yiwḏan iy xef ɣa iḥkem Arebbi s ccariƹa nni iy ḏi ṯeǧa lḥurriya.

¹³Nhar n Lḥisab Arebbi war ireḥḥem ca wenni war ireḥḥmen ca; arraḥmeṯ ṯɣeǧeb lḥisab.

¹⁴Ay ayṯma, min ṯ ɣa inefƹen i bnaḏem meȓa iqqar nec ḏ ȓmumen walakin ȓexḏayem[1] nnes war d tesbeyyinent ca belli netta ḏ ȓmumen? Ma ḏ lʼiman-a iy ṯ ɣa isnejmen? Lla ƹemmarṣ!

¹⁵Aqa icten n wučmaṯneɣ niɣ ḏ yijjen n wumaṯneɣ war ɣares bu arruḍ iy ɣa yareḍ ḏayes jjuƹ.

¹⁶Ṯenniḏ-as cek niɣ ḏ ḥadd nneɣni: "Ruḥ aḏ tecceḏ aḏ tarḍeḏ arruḍ. Ac iƹawen Arebbi axak isehheȓ." Iƹni cek war ḏas tuciḏ ca min ṯeḥḏaj ddat nnes. Man nnfaƹ ḏi manaya?

¹⁷Lʼiman nnec amenni meȓa war d isbeyyen ca ȓexḏayem nnes itwaḥsab immuṯ.

¹⁸Imken can yijjen aḏ yini: "Iwa cek ḏayec lʼiman nnec, nec ɣari ȓexḏayem inu." Nec qqareɣ: "Cek sbeyyen-ayi-d mammec igga lʼiman nnec bȓa ȓexḏayem nnec, nec aḏac sbeyyneɣ mammec igga lʼiman inu s ȓexḏayem inu."

¹⁹Cek tamneḏ belli Arebbi netta ḏ ijjen? Iwa mliḥ, walakin uȓa ḏ ccayaṭin tamnen s manayenni terjijin.

²⁰Ay aryaz, cek ṯqefȓeḏ! Ma nec aḏawem d sbeyyneɣ belli lʼiman bȓa ȓexḏayem war ḏayes bu nnfaƹ?

²¹Xzar ɣar jeddiṯneɣ Brahim, aqa iḥseb-iṯ Arebbi nican s min igga Brahim wami iqeddem mmis Isḥaq x ȓmeḏbaḥ.

²²Aqa twaȓiḏ lʼiman n Brahim ixeddem ak ȓexḏayem nnes, uca lʼiman nnes iḏweȓ ikmaȓ s ȓexḏayem-a iy igga.

²³Ḏ wa ḏ ȓmaƹna n wawaȓ nni n Arebbi ḏi Lkitab wami inna: "Uca yumen Brahim zi Arebbi, ikkar Arebbi isemṣȓaḥ-iṯ akiḏes s lʼiman nni." Amenni ig ijja Arebbi Brahim ḏ ameddukeȓ nnes.

²⁴Kenniw isbeyyen-awem-d Arebbi iḥesseb bnaḏem nican maci ɣir s lʼiman nnes u ṣafi, uȓa s ȓexḏayem nnes.

²⁵Amenni uȓa ḏ ṯaḥenjirṯ nni umi qqaren Riḥab tuɣa ṯeffeɣ abriḏ, iḥseb-it Arebbi nican s min ṯegga wami ṯreḥḥeb zi ṯnayen nni n lmuxabarat, ṯsenjem-iṯen ṯessekk-iṯen x yijjen n ubriḏ nneɣni.

²⁶Cuf, ddat n bnaḏem bȓa buḥbeȓ ṯemmuṯ, amenni lʼiman bȓa ȓexḏayem immuṯ.