Read Tarifit Yaƹqub 3 Bible Online

Yaƹqub 3 - Tarifit bible

Yaƹqub 3

¹Ay ayṯma, itxeṣṣa war zzaywem itiȓi bu aṭṭas n imseȓmaḏen, aqa ṯessnem belli neccin imseȓmaḏen ataf axaneɣ izeyyar Arebbi ḏi lḥisab.

²Marra iḏneɣ ntegg aṭṭas n lɣalaṭ. Meȓa can yijjen war ixeṭṭi ca ḏeg wawaȓ nnes qaƹ, ataf wanita ḏ ijjen n bnaḏem nican ikmaȓ. Izemmar aḏ iḥkem x ddat nnes marra.

³Xmi ntegg sȓimeṯ deg uqemmum n ikiddaren, nneddeh-iṯen mani ma nexs.

⁴Cuf ƹaweḏ, aɣarrabu waxxa ḏ ameqqran aṭṭas iḏeffeƹ-iṯ arriḥ ijehḏen, walakin arrayes izemmar aṯ indeh s yijjen n dmam ḏ amezyan aṯ indeh mani ma ixes.

⁵Uȓa ḏ iȓes nneɣ netta ḏ ijjen n ṯmesȓayṯ ḏ ṯamezyant ḏi ddat nneɣ, walakin iteftaxar s ṯmesȓayin ṯimeqqranin. Cuf, ijjen n ȓɣabeṯ ḏ ṯameqqrant ṯesḥarreq-it ijjen n ṯȓuqit ḏ ṯamezyant!

⁶Iȓes netta ḏ ijjen n ṯmessi ḏayes ccarr aṭṭas iswessax marra min ɣarneɣ ḏi ddat nneɣ. Isruɣa ṯimessi ḏi marra ṯuḏarṯ nneɣ, ƹaweḏ netta s yixef nnes ṯesruqq-iṯ ṯmessi n jahennama.

⁷Izemmar bnaḏem aḏ irebba ȓuḥuc ḏ ijḍaḍ ḏ min itenḥuruḏen ḏ min itƹicen ḏi ȓebḥar mkuȓ nnuƹ, u ḏ ṣṣaḥ netta itrebba-ṯen.

⁸Walakin bnaḏem war izemmar aḏ irebba iȓes nnes, mayemmi? Netta ḏ ijjen n ccarr war iǧi uw iy ṯ ɣa isbedden iƹemmar s ssem ineqqen.

⁹Zzayes iy nḥemmeḏ Siḏi Arebbi Babaṯneɣ. Ma zzayes ƹaweḏ iy zi ɣa nenƹeȓ iryazen iy d ixȓeq Arebbi x ṣṣifeṯ nnes?

¹⁰Wac zeg yijjen n uqemmum iy zi ɣa nsufeɣ ccuker ḏ nnaƹȓeṯ? Lla ay ayṯma, manaya itxeṣṣa war itiȓi ca.

¹¹Ma zemmaren aḏ ffɣen waman ḏ imiziḍen ḏ imerzagen zeg yijjen n ȓƹunṣar?

¹²Lla ay ayṯma. Ma ṯzemmar ṯcejjarṯ n ṯazarṯ aḏ tarew zzitun, niɣ ṯzayarṯ uḍiȓ aḏ tarew ṯazarṯ? Lla. Uȓa ḏ ȓƹunṣar ameǧaḥ war izemmar aḏ d isufeɣ aman ḏ imiziḍen.

¹³Ma akiḏwem wenni iy ḏi ṯeǧa ȓefhameṯ ḏ ṯusna?[2] Itxeṣṣa-yas aḏ d ismeḍhar manaya s mammec itƹic s lmaƹqul ḏ lḥasanaṯ nnes ig itegg ak yijjen n ttawaḍuƹ iy d itasen s ȓefhameṯ.

¹⁴Walakin meȓa ḏaywem ȓeḥseḏ ḏ aƹeffan ḏ lʼananiya, war teftaxareṯ ca s yixef nwem. Iƹni itxeṣṣa-yawem kenniw war ṯesxarriqem ca x lḥaqiqa.

¹⁵Nnuƹ n ȓefhameṯ-a war d thewwi ca zeg ujenna; Lla, nettaṯ n ddunect-a n yiwḏan n Cciṭan.

¹⁶Minzi mani ma iǧa ȓeḥseḏ ḏ lʼananiya, ḏinni uȓa ḏ ȓfawḍa ḏ kuȓ ccarr.

¹⁷Ȓefhameṯ iy d ihewwan zeg ujenna, min ḏayes muhim qaƹ aḏ tiȓi ṯeṣfa. Nettaṯ ƹaweḏ ḏayes ȓehna ḏ ṣṣbar, war ḏayes tiȓi bu ṯɣennant. Ṯeccur s arraḥmeṯ ḏ lḥasanaṯ, war ḏayes bu wuḏemawen niɣ ḏ nnifaq.

¹⁸Yinni isemṣȓaḥen iwḏan zerrƹen manayenni, ataf aḏ mjaren ijjen n ṯfeǧaḥṯ n ȓḥaqq.