Read Tarifit Yaƹqub 4 Bible Online

Yaƹqub 4 - Tarifit bible

Yaƹqub 4

¹Iwa ixarwiḍen ḏ imenɣiwen itiȓin jarawem, manis d tekken? Tekken-d zi ccehawaṯ nwem ṯiƹeffanin iy itmenɣan ɣar ḏaxeȓ nwem.

²Xmi war tifem ca kenniw x minxef ṯrezzum, ataf ṯneqqem. Tmenɣam temnaqarem jarawem, mayemmi? Liʼanna kenniw war ṯzemmarem ca aḏ tawḍem ɣar min ṯƹeccqem. War ɣarwem ca, mayemmi? Liʼanna kenniw war tettarem ca i Arebbi.

³Xmi ḏas tettarem war ḏawem d iticc ca, mayemmi? Liʼanna kenniw tɣalaṭem ḏi min ḏas tettarem, ṯexsem aḏ tseƹƹfem ccehawaṯ nwem u ṣafi.

⁴A yinni ixeddƹen, kenniw ma war ṯessinem ca belli wenni itexsen ddunect-a ḏ wenni ḏ ȓaƹḏu n Arebbi? Wah, wenni ixḍaren dunnect-a qa netta nican ḏ ȓƹaḏu n Arebbi.

⁵Awaȓ n Lkitab iqqar: <Arruḥ nni iy ḏayneɣ igga Arebbi iƹizz xas aṭṭas.> Ma tɣiȓ-awem awaȓ nni war ɣares bu ȓmaƹna?

⁶Walakin netta yarni-yaneɣ-d arḍa zzayes. S manaya iqqar Lkitab: <Arebbi aqaṯ ḍed n yinni isemɣaren ixef nsen, yinni isemzayen ixef nsen iticc-asen arḍa nnes.>

⁷S manaya ṭaƹeṯ i Arebbi. Ƹarrḍeṯ i Ibȓis, azzaywem yarweȓ.

⁸Aḏseṯ ɣar Arebbi, netta aɣarwem d yaḏes. A yinni ixḍan, sirḏeṯ ifassen nwem. A yinni kuȓ ȓaƹqeȓ min ḏawem iqqar, seṣfaṯ uȓawen nwem.

⁹Xeyyqem, ḥeznem, trum. Beddȓem ṯaḍeḥḥact nwem ɣar imeṭṭawen ḏ ȓefraḥeṯ nwem ɣar uxiyyeq.

¹⁰Semzyeṯ ixef nwem zzaṯ i Siḏi Arebbi, netta akenniw isemɣar.

¹¹Ay ayṯma, war qqareṯ bu ȓbaṭeȓ x wayawya. Minzi wenni iqqaren ȓbaṭeȓ x wumas niɣ itƹeyyab-iṯ, ataf iqqar ȓbaṭeȓ x ccariƹa itƹeyyab-it. Xmi tƹeyyabeḏ ccariƹa ataf cek war zzayes ṯxeddmeḏ ca; Lla, ataf cek ḏ ȓqaḍi nnes waha.

¹²Ḏinni ijjen ig iggin ccariƹa netta ƹaweḏ ḏ ȓqaḍi, netta ḏ Arebbi. Netta waḥḏes ig izemmaren aḏ isenjem izemmar aḏ isefna, walakin min ṯeƹniḏ cek tƹeyyabeḏ ajjar nnec?

¹³Ṣennṭeṯ mliḥ a yinni iqqaren, "Yallaheṯ a nraḥ nhara niɣ ṯiwecca ɣar ṯendint-in niɣ ɣar ṯendint-a, a nseƹḏu ḏinni lƹam a negg ttijara bac a nerbeḥ."

¹⁴Iwa, ma ṯessnem min ɣa iweqƹen ṯiwecca? Lla, aqa ṯudarṯ nwem tegg am yijjen n ṯseynut, tmeḍhar-d ḏeɣya, ḏeɣya traḥ.

¹⁵Itxeṣṣa-yawem aḏ tinim ammu: <Meȓa ixes Siḏi Arebbi a neddar, a negg ccɣeȓ-a niɣ ḏ ccɣeȓ-in.>

¹⁶Walakin ȓexxu kenniw teftaxarem, tsemɣarem ixef nwem. Marra ttakebbur-a am wanita netta ḏ ccarr.

¹⁷Wenni itwaȓen can n ȓxir aṯ igg, meȓa war ṯ iggi ca itwaḥsab-as ḏ ȓmuƹṣiyeṯ.