Read Tarifit 1 Buṭrus 3 Bible Online

1 Buṭrus 3 - Tarifit bible

1 Buṭrus 3

¹A ṯimɣarin, amenni ƹaweḏ itxeṣṣa aḏ ṭaƹent i iryazen nkent. Ḥima yinni war iteggen ca array i wawaȓ n Arebbi ataf ṯimɣarin nsen aṯen d arrent ɣar ȓmuminin bȓa ma akiḏsen ssiwȓent s wawaȓ ɣir s ṯicri nsent u ṣafi.

²Yina ɣir aḏ ẓren ṯicri nkent ṯeṣfa tseḏḥant zzaysen ataf aḏ amnen.

³Zzin nkent maci ḏ lmuhim ɣar barra iƹni aḏ tmuḏent icewwafen niɣ aḏ teggent ṯisensȓin ḏ ṯemqeyyasin n ddheb niɣ ḏ arruḍ iy iɣȓan.

⁴Lla, zzin nkent itxeṣṣa aḏ yiȓi ɣar ḏaxeȓ nkent iƹni zzin nni itiȓin inuffar ḏeg wuȓ. Zzin-a war ifenni ca ƹemmarṣ, ɣares arruḥ mhedden ḏayes ttawaḍuƹ ḏ yijjen n ccan ḏ ameqqran zzaṯ i ṯiṭṭawin n Arebbi.

⁵Ammu iy tuɣa iǧa zzin n lallaṯ n zman srusant lʼamal nsent ḏi Arebbi. Tṭaƹant i iryazen nsent,

⁶am Sara tuɣa iteggen array i uryaz nnes Brahim traɣa-yas <A siḏi.> Kennint aḏ tiȓint am yissis iƹni meȓa teggent ȓxir war teggwḏent ca zi min isaggwaḏen.

⁷Ay iryazen, amenni itxeṣṣa-yawem aḏ teggem ƹaweḏ, aḏ tƹicem ak ṯemɣarin nwem s yijjen n ȓefhameṯ jarawem. Ucem-as lqima i ṯemɣarṯ iǧan nettaṯ am ṯɣerrafṯ itrezzan ḏeɣya minzi ḏ niṯenti itwarraṯen akiḏwem lbaraka n ṯuḏarṯ. Ḥima war ḏinni tiȓi bu can n ȓḥajeṯ aḏ trez ṯẓaǧiṯ nwem.

⁸Lmuhim, itxeṣṣa-kenniw marra iḏwem ȓaƹquȓaṯ nwem aḏ iȓin ḏ ijjen, aḏ tesḥissem ak wayawya, aɣarwem ṯiȓi yijjen n ȓemḥibbeṯ n wawmaṯen, aḏ tḥinnem ḏeg wayawya, war ḏaywem itiȓi bu ttakebbur.

⁹War tarraṯ ca ccarr s ccarr nneɣni niɣ ȓƹib s ȓƹib nneɣni. Lla, barkeṯ inneɣni, mayemmi? Minzi iȓaɣa-d xawem i manaya bac aḏ txaȓsem s yijjen n lbaraka.

¹⁰Liʼanna iqqar: <Wenni irezzun aḏ iḥibb ṯuḏarṯ nnes, niɣ ixes ƹaweḏ aḏ iẓer ussan ḏ iṣebḥanen, u labud aḏ iḥḍa iȓes nnes zi ccarr, ḏ uqemmum nnes zeg wawaȓ n ṯeḥȓaymiṯ.

¹¹Itxeṣṣa aḏ iggwej x ccarr aḏ igg ȓxir, aḏ irzu x ssalam aṯ iḏfar.

¹²Aqa ṯiṭṭawin n Siḏi Arebbi xezzarent ṣṣaliḥin, imejjan nnes nurzmen i ṯẓaǧiṯ nsen. Maca uḏem n Siḏi Arebbi, yarra aƹrur ɣar yinni iteggen ccarr.>

¹³Iwa meȓa ṯḥawȓem aḏ teggem ȓxir, min iƹna wenni iy kenniw ɣa iḍarren?

¹⁴Walakin waxxa ṯetwaƹeddbem meȓa ṯeggim ȓḥaqq, aḏ yiȓi ḏ ssaƹḏ nwem. War teggwḏem ca zeg yiwḏan, war ṯen tejjam ca akenniw sḏehcen.

¹⁵Lla, semɣareṯ Lmasiḥ ḏeg wuȓawen nwem arrem-ṯ ḏ Siḏiṯwem. Iȓiṯ ȓebda ṯwejḏem bac aḏ tdafƹem x yixef nwem aḏ tjawbem wenni irezzun x ssabab n lʼamal iy ḏaywem. Walakin jawbem-ṯ s yijjen n ttawaḍuƹ ḏ lʼiḥtiram

¹⁶ḏ yijjen n ḍḍamir mertaḥ. Ammu yinni xawem iqqaren ȓbaṭeȓ ataf aḏ seḏḥan s ṯicri nwem ṯaṣebḥant iy xawem tƹeyyaben niṯni.

¹⁷Cuf, meȓa ixes Arebbi ataf ḥsen aḏ twaƹeddbem ƹlaḥsab ȓxir iy teggem maci ƹlaḥsab ccarr.

¹⁸Amenni ig igga Lmasiḥ wami itwaƹeddeb ijjen n ṯwaȓa i ȓebda ƹlaḥsab ȓmuƹṣiyaṯ. Iƹni wenni iǧan nican itwaƹeddeb ḏeg umcan n yinni iƹeṣṣan ḥima akenniw issiweḍ ɣar Arebbi. Ddat nnes nɣin-teṯ, iseddar-it-id Arruḥ iqeddsen.

¹⁹S Arruḥ-a iy zi iruḥ bac aḏ ibeccar arruḥaṯ n yiwḏan nni itwaḥebbsen.

²⁰Mayemmi? Liʼanna mecḥaȓ zeg wami ḏi zman n Nuḥ ugin yiwḏan-a aḏ ggen array i Arebbi wami ṯen tuɣa itraja s ṣṣbar itṣennaƹ aɣarrabu n Nuḥ. Ḏeg uɣarrabu-ya ḏrust n yiwḏan ṯmenya waha kkin x waman nni nejmen.

²¹Aman-a niṯni ḏ ijjen n lmiṯal x ṭṭahareṯ nneɣ n waman iy kenniw isenjamen ȓexxu. Maci aḏ itwakkes ȓewsex zi ddat nneɣ; Lla, ṭṭahareṯ-a nettaṯ ḏ ijjen n uȓaɣi nwem i Arebbi bac aḏawem d yuc ijjen n ḍḍamir mertaḥ. Manaya x ssabab n Ƹisa Lmasiḥ wami d ikkar zi ȓmewṯ.

²²Ḏ netta igaƹƹḏen ɣar ujenna aqaṯ x ufusi n Arebbi, yarra lmalaʼikaṯ swadday n lḥukem nnes ḏ yinni iḥekkmen ḏ yinni ijehḏen.