Read Tarifit 1 Buṭrus 4 Bible Online

1 Buṭrus 4 - Tarifit bible

1 Buṭrus 4

¹Fa Ƹisa Lmasiḥ itwaƹeddeb ḏi ddat nnes. X manaya ƹaweḏ kenniw aḏ tesjehḏem ixef nwem s array nni nnes. Mayemmi? Meȓa ṯetwaƹeddbem ḏi ddat nwem, ṣafi ṯbeƹƹḏem ƹaweḏ x ȓmuƹṣiyeṯ.

²X manaya nhuraṯ nni iy ḏawem itɣiman ḏi ddat nwem maci aṯen ṯseƹḏum ƹlaḥsab ccehawaṯ n bnaḏem; Lla, seƹḏum-ṯen ƹlaḥsab ȓxaḍar n Arebbi.

³Iwa ṣafi, ṯejjiwnem zi min tuɣa tƹicem ƹlaḥsab min rezzun aḏ ggen lkuffar iƹni ȓeqbaḥeṯ ḏ ccehawaṯ ṯiƹeffanin ḏ waṭṭas n ccreb ḏ lfasad ḏ zzhu ḏ lƹibada n lʼaṣnam iƹiffen.

⁴Tƹejjiben niṯni iƹni meȓa kenniw war kiḏsen tiḏfem ca ḏi lfayaḍan n ufelles-a aḏ qqimen ƹaweḏ tzawwaren-kenniw.

⁵Walakin lḥisab nsen aṯ igg wenni iwejjḏen aḏ iḥaseb yinni iddaren ḏ yinni immuṯen.

⁶X ssabab-a twabeccaren s Lʼinjil uȓa ḏ imettinen. Mmuṯen mammec tmettan yiwḏan marra, walakin niṯni aḏ ddaren s arruḥ nsen ƹlaḥsab lɣaraḍ n Arebbi.

⁷Aqa yusa-d uneggaru n marra ṯimesȓayin. Iḏen itxeṣṣa aḏ d tarrem ȓbaȓ nwem aɣarwem yiȓi ȓaƹqeȓ nwem bac ataf aḏ tzemmarem aḏ tẓaǧem.

⁸Min iǧan muhim qaƹ? Itxeṣṣa aḏ tḥibbem ayawya zeg wuȓ minzi ȓemḥibbeṯ ṯqeṭṭa x waṭṭas n ddunub.

⁹Labud aḏ treḥḥbem zeg wayawya am inewjiwen bȓa ma aḏ tceṯcam.

¹⁰Itxeṣṣa-yas i mkuȓ ijjen aḏ isexḏem lqudra nni iy ḏas immucen ak yiwḏan. Aḏ isexḏem nican lbaraka n Arebbi iy zi itkellaf kuȓ nnuƹ nnes.

¹¹Wenni umi immuc aḏ issiweȓ itxeṣṣa-yas aḏ issiweȓ am wenni issawaȓen awaȓen n Arebbi. Wenni umi immuc aḏ ixḏem itxeṣṣa-yas aḏ ixḏem am wenni ixeddmen s jjheḏ ig iticc Arebbi. Ḥima s marra ṯimesȓayin-a aḏ itwaḥmeḏ Arebbi s ufus n Ƹisa Lmasiḥ. Aɣares ṯiȓi lƹaḍama ḏ ȓeḥkam i ȓebda n ȓebdaṯ. Amin.

¹²Ay imƹizzen inu, war tƹejjibem ca ƹlaḥsab ȓmiḥneṯ-a iy xawem d iwḍan am ṯmessi bac akenniw ṯjarreb. War tfekkareṯ ca belli manaya ƹajib.

¹³Lla, itxeṣṣa kenniw aḏ tfarḥem wami ṯcarrcem ḏeg uƹeddeb n Lmasiḥ bac aḏ tfarḥem ƹaweḏ aṭṭas xmi d ɣa ṯmeḍhar lƹaḍama nnes.

¹⁴Meȓa iwḏan tukkaren-kenniw ƹlaḥsab isem n Lmasiḥ ataf ssaƹḏ nwem, minzi Arruḥ n lƹaḍama ḏ Arruḥ n Arebbi imars-d xawem.

¹⁵Ḥḍam akiḏwem yiȓi ijjen jarawem ig itwaƹeddaben minzi inɣa bnaḏem niɣ yucar niɣ ḏ lmujrim niɣ itaḏef ḏi ccɣuȓaṯ n midden.

¹⁶Innama, meȓa can yijjen itwaƹeddab ȓaḥeqqac netta ḏ amasiḥi itxeṣṣa-as war itseḏḥi ca, u labud aḏ isemɣar Arebbi ȓaḥeqqac iysi-d isem nnes.

¹⁷Aqa ṯuweḍ-d ȓweqṯ bac aḏ ibḏa lḥisab jar ayṯbab n ṯeddarṯ n Arebbi. Meȓa aḏ ibḏa lḥisab-a jaraneɣ min ɣa iweqƹen i yinni war itṭiƹin ca i Lʼinjil n Arebbi?

¹⁸Aqa iqqar: <Meȓa iqseḥ aḏ injem can yijjen zeg yinni iǧan nican, mammec ɣa ggen yinni iƹeṣṣan, ḏ yinni war itṭiƹin ca i Arebbi?>

¹⁹Falihaḏa yinni itwaƹeddaben s array n Arebbi, itxeṣṣa-yasen aḏ sellmen ȓaƹmar nsen ḏeg ifassen n Lxaliq nsen netta iy ḏi ṯeǧa ttiqeṯ, aḏ qqimen teggen min iǧan ḏ aṣebḥan.