Read Tarifit 1 Buṭrus 5 Bible Online

1 Buṭrus 5 - Tarifit bible

1 Buṭrus 5

¹Fa nec tȓaɣiɣ-d x imeqqranen iǧan jar n ṯjumaƹ, nec iy iǧan ḏ ijjen n umeqqran am kenniw ḏ yijjen n ccaheḏ x min xef itwaƹeddeb Lmasiḥ, nec ḏ ijjen ƹaweḏ iy ɣa icarcen ḏi lƹaḍama iy d ɣa imeḍharen.

²Arewseṯ ṯḥimerṯ nni n Arebbi iy xef kenniw itkellaf netta. Ḥḍam-teṯ s ȓxaḍar nwem maci s yijjen n bezzez iy xawem teggen minzi ammu iy ixes Arebbi. Maci s ṭṭmaƹ n ȓefḍiḥeṯ, lla s wuȓawen nwem.

³Maci axasen tḥekmem s uziyyar x yinni iy xef tkellafem; Lla, aḏ tiȓim ḏ lmiṯal i ṯḥimerṯ iy ɣa tebƹen.

⁴Xmi d ɣa imeḍhar Umeksaw ameqqran ataf aḏ tqebȓem ijjen n ttaj ƹemmarṣ aḏ ikcef.

⁵Ay iḥenjiren, kenniw ṭaƹeṯ ƹaweḏ i yinni iǧan ḏ imeqqranen. Swejḏeṯ ixef nwem marra kenniw s yijjen n array ak wayawya war ḏayes bu ttakebbur minzi <Arebbi aqaṯ ḍed n yinni isemɣaren ixef nsen, yinni isemzayen ixef nsen iticc-asen arḍa nnes.>

⁶Iḏen, semzayem ixef nwem swadday n ufus ijehḏen n Arebbi, akenniw isemɣar ḏi ȓweqṯ iy ixes netta.

⁷Marra imnusen jjem-ṯen i netta minzi netta ithella ḏaywem.

⁸Arrem-d ȓbaȓ nwem, iȓiṯ ƹlabal. Ȓaƹḏu nwem Ibȓis qa itqeyyaḏ-kenniw am ssbaƹ ithirriw irezzu x wenni iy ɣa iseɣȓi.

⁹Ƹarrḍem-as i Ibȓis, beddem nican x dsas n lʼiman nwem minzi ṯessnem belli ayṯmaṯwem ḏi marra ddunect-a aqa twaƹeddaben am kenniw.

¹⁰Ataf aḏ twaƹeddbem cwayt n ȓweqṯ ȓexddenni akenniw isreyyeḥ Arebbi nneɣ iy ḏi iǧa marra arḍa ḏ netta iy ḏawem d iȓaɣan ɣar lƹaḍama nnes war ifennin ca ḏi Lmasiḥ. Akenniw isbedd, akenniw isejheḏ, akenniw igg x dsas.

¹¹Aɣares yiȓi ȓeḥkam i ȓebda n ȓebdaṯ. Amin.

¹²Uriɣ-awem-d ṯabrat-a ṯamezyant x ufus n Silwan ḥessbeɣ-ṯ nec am umaṯneɣ ḏayes ttiqeṯ. Tcejjaƹeɣ-kenniw, cehhḏeɣ min qqareɣ manaya ḏ arḍa n Arebbi ḏ ṣṣaḥ. Beddem ḏayes nican.

¹³Ṯsawwaḍ-awem-d sȓam jmaƹeṯ iy iǧan ḏi ṯendint n Babil, niṯni twaxḍaren am kenniw. Waxxa uȓa ḏ Marqus isawwaḍ-awem-d sȓam wenni iǧan am memmi.

¹⁴Tseǧameṯ x wayawya s yijjen n sȓam n ṯemƹacarṯ. Aɣarwem yiȓi ȓehna i marra kenniw iy iǧan ḏi Lmasiḥ.