Read Tarifit 1 Yuḥanna 2 Bible Online

1 Yuḥanna 2 - Tarifit bible

1 Yuḥanna 2

¹A iḥenjiren inu, tariɣ-awem-d ṯimesȓayin-a ḥima war ṯƹeṣṣim ca Arebbi. Walakin meȓa neƹṣa-ṯ aqa ɣarneɣ ijjen n lwasiṭ ak Arebbi Babaṯneɣ netta ḏ Ƹisa Lmasiḥ wenni ig iǧan nican.

²Ḏ netta ig iruḥen ḏ lfidya x ȓmuƹṣiyaṯ nneɣ u maci ɣir x ȓmuƹṣiyaṯ nneɣ waha, ḥetta uȓa ḏ ȓmuƹṣiyaṯ n ddunect-a amen-ṯekmaȓ.

³Mammec ɣa negg neccin a nefhem belli nessen-iṯ? Qa ṯ nessen meȓa netṭaƹa-asent i ȓuṣiyaṯ nnes.

⁴Wenni iy ɣa inin qa nec ssneɣ-ṯ war itṭiƹi ca i ȓuṣiyaṯ nnes ataf netta ḏ bu-ixarriqen waha, ataf lḥaqiqa war ḏayes ṯzeddeɣ ca.

⁵Walakin wenni ig itṭaƹan i wawaȓ nnes, aqa wanita ḏ ṣṣaḥ ṯejjiwen zzayes ȓemḥibbeṯ n Arebbi. Mammec ɣa negg neccin a nessen illa nzeddeɣ ḏayes?

⁶Iƹni wenni iy ɣa inin qa nec zeddɣeɣ ḏayes itxeṣṣa-yas u labud aḏ iggur ḏeg ubriḏ nican am wenni iy ḏi tuɣa iggur Ƹisa.

⁷Ay imƹizzen inu, war ḏawem d tariɣ ca ijjen n ȓuṣiyeṯ ḏ jḏiḏ; Lla, nettaṯ ḏ ijjen n ȓuṣiyeṯ ḏ ṯaqḏint tuɣa ṯeǧa ɣarwem zeg umezwaru. Ȓuṣiyeṯ-a ṯaqḏint nettaṯ ḏ awaȓ nni iy tuɣa ṯesȓim.

⁸Walakin nettaṯ ƹaweḏ ḏ ijjen n ȓuṣiyeṯ ḏ jḏiḏ iy ḏawem d uriɣ. Lḥaqiqa nnes ntwaȓa-t ḏi Ƹisa ntwaȓa-t ḏaywem ȓaḥeqqac ṯaǧest ṯƹeddu, ȓexxu nnur n ṣṣaḥ ṣafi itceƹciƹ-d.

⁹Wenni iqqaren nec aqayi ḏi nnur netta itƹiffa umas, ataf netta iǧa ƹaḏ ḏi ṯaǧest.

¹⁰Walakin wenni itexsen umas ataf netta itƹic ḏi nnur ataf war ɣares min ṯ ɣa iɣeḍȓen.

¹¹Wenni itƹiffan umas ataf netta ƹaḏ aqaṯ ḏi ṯaǧest ataf iggur ḏi ṯaǧest. War issin ca mani iggur ȓaḥeqqac ṯaǧest nni ṯesḍaɣeȓ-iṯ zi ṯiṭṭawin nnes.

¹²A iḥenjiren, nec uriɣ-awem-d ȓaḥeqqac ȓmuƹṣiyaṯ nwem twaɣfarent-awem s yisem nnes.

¹³A ibabaṯen, nec uriɣ-awem-d ȓaḥeqqac kenniw ṯessnem wenni iy iǧan zeg umezwaru. A iƹzriyen, nec uriɣ-awem-d ȓaḥeqqac kenniw ṯɣeȓbem x lmufsiḏ nni. A iḥenjiren, nec uriɣ-awem-d ȓaḥeqqac kenniw ṯessnem Babaṯneɣ.

¹⁴A ibabaṯen, nec uriɣ-awem-d ȓaḥeqqac kenniw ṯessnem wenni iy iǧan zeg umezwaru. A iƹzriyen, nec uriɣ-awem-d ȓaḥeqqac kenniw ṯjehḏem, awaȓ n Arebbi izeddeɣ ḏaywem, kenniw ṯɣeȓbem x lmufsid nni.

¹⁵War texsem ca dduncet-a niɣ ḏ min ḏayes iǧan. Wenni itexsen ddunect-a ataf ȓemḥibbeṯ n Arebbi war ḏayes ṯeǧi ca.

¹⁶Minzi marra min iǧan ḏi ddunect-a iƹni min ṯrezzu ṭṭabiƹa ṯaƹeffant n bnaḏem ḏ min rezzunt ṯiṭṭawin ḏ ttakebbur iy zi teftaxaren yiwḏan qa manaya war d yusi ca zi Arebbi, yusa-d zi ddunect-a.

¹⁷Ddunect-a aqa ṯƹeddu-d akiḏes ccehawaṯ nnes, walakin wenni iteggen ȓxaḍar n Arebbi aḏ iqqim iddar i ȓebda n ȓebdaṯ.

¹⁸A iḥenjiren, aqa ṯsaƹƹat-a ṯaneggarut ṯuweḍ-d. Kenniw ṯesȓim ddejjal nni iggur-d, amenni ƹaweḏ aṭṭas n yiwḏan iy d yusin ȓexxu ggin am ddejjal nni. S manayenni iy nessen aqa ṯsaƹƹat ṯaneggarut ṯuweḍ-d.

¹⁹Ffɣen zzayneɣ walakin tuɣa war ǧin ca zzayneɣ. Maƹlik zzayneɣ, ataf qqimen akiḏneɣ. Niṯni ffɣen bac aḏ d iban belli war ǧin ca zzayneɣ.

²⁰Kenniw lla, twaḏehnem s ufus n Lƹaḍim, marra kenniw ṯessnem min iǧan.

²¹Tariɣ-awem-d ȓaḥeqqac ṯessnem lḥaqiqa maci war t ṯessinem ca. U ƹaweḏ war iǧi bu can uxarriq iy d yusin zi lḥaqiqa.

²²Min iƹna wenni iy isxarriqen illa wenni inekkaren belli Ƹisa ḏ Lmasiḥ? Netta ḏ ddejjal iƹni wenni iy inekkaren Babaṯneɣ ḏ Mmis.

²³Wenni ɣa inkaren Mmis ataf war ɣares itiȓi ca Babas. Wenni iy ɣa iqebȓen Mmis ataf aɣares yiȓi Babas.

²⁴Iwa arrem-d ȓbaȓ nwem bac aḏaywem iqqim min ṯesȓim zeg umezwaru. Meȓa iqqim ḏaywem awaȓ nni iy ṯesȓim zeg umezwaru, ataf uȓa ḏ kenniw aḏ teqqimem ḏi Mmis ak Arebbi Babas.

²⁵Minzi ḏaneɣ iwƹeḏ? Iwƹeḏ-aneɣ s ṯuḏarṯ n ȓebda n ȓebdaṯ.

²⁶Uriɣ-awem-d ṯimesȓayin-a x yinni irezzun akenniw xeḏƹen.

²⁷Kenniw, ddehneṯ nni iy zzayes ṯqebȓem ƹaḏ aqat ḏaywem. Kenniw war ṯeḥḏijem ḥadd akenniw iseȓmeḏ, aqa ddehneṯ nnes ṯseȓmaḏ-awem marra ṯimesȓayin. Nettaṯ ḏ ṣṣaḥ maci ḏ axarriq. Iwa mammec iy kenniw ṯseȓmaḏ ddehneṯ-a, amenni itxeṣṣa aḏayes ṯƹicem ḏi netta.

²⁸A iḥenjiren, ȓexxu ƹiceṯ ḏayes ḥima aɣarneɣ ṯiȓi ijjen n ttiqeṯ war zzayes narewweȓ ca s useḏḥi xmi d ɣa yas aḏaneɣ d imeḍhar.

²⁹Xmi ɣa ṯessnem belli netta nican ig iǧa, ataf aḏaywem ṯiȓi ttiqeṯ belli bnaḏem ig isxeddamen min iǧan nican netta ixȓeq-d zzayes.