Read Tarifit 1 Yuḥanna 3 Bible Online

1 Yuḥanna 3 - Tarifit bible

1 Yuḥanna 3

¹Xzareṯ mecḥaȓ ḏ ṯameqqrant ȓemḥibbeṯ iy ḏaneɣ d yuca Babaṯneɣ wami netwasemma ḏ ṯarwa n Arebbi! U ḏ ṣṣaḥ ammu iy neǧa. Ddunect-a, mayemmi war ḏaneɣ ṯessin ca neccin? Ȓaḥeqqac uȓa ḏ netta war ṯ ṯessin ca.

²Ay imƹizzen inu, ȓexxu neccin ḏ ṯarwa n Arebbi. Ƹaḏ war d tmeḍhar ca ṣṣifeṯ nneɣ mamc ɣa ṯiȓi, walakin nessen aḏ tiȓi am netta xmi d ɣa imeḍhar ȓaḥeqqac aṯ nẓer netta mamc iy iǧa.

³U marra wenni ɣar iǧa l'amal-a aḏ issiṣfa ixef nnes am mammec iǧa netta iṣfa.

⁴Marra wenni iqqimen iƹeṣṣa netta itrezza ȓuṣiyaṯ. Wah, ȓmuƹṣiyeṯ nettaṯ ḏ ṯarezziṯ n ȓuṣiyaṯ.

⁵Aqa ṯessnem belli Ƹisa Lmasiḥ netta imeḍhar-d bac axaneɣ ikkes ȓmuƹṣiyaṯ. U ȓmuƹṣiyeṯ netta war ḏayes ṯeǧi ca.

⁶Uȓa ḏ ijjen ig itƹicen ḏayes war iqqim ca isxeddam ȓmuƹṣiyaṯ. Wenni ig iqqimen isxeddam ȓmuƹṣiyaṯ netta war ṯ iẓri ca war ṯ issin ca.

⁷A iḥenjiren, war tejjam ḥadd akenniw ixḏeƹ. Wenni ig iqqimen isxeddam min iǧan nican qa netta aqaṯ nican mammec ig iǧa Siḏiṯneɣ.

⁸Wenni ig iqqimen isxeddam ȓmuƹṣiyaṯ netta zeg Ibȓis ȓaḥeqqac Ibȓis iqqim iƹeṣṣa zeg umezwaru. Mayemmi d imeḍhar Mmis n Arebbi? Imeḍhar-d bac aḏ irez ȓefƹayeȓ n Ibȓis.

⁹Wenni d ixeȓqen zi Arebbi war iqqim ca isxeddam ȓmuƹṣiyaṯ ȓaḥeqqac ṯaqquct n Arebbi ṯzeddeɣ ḏayes. War izemmar ca aḏ iqqim ḏi ȓmuƹṣiyaṯ ȓaḥeqqac ixȓeq-d zi Arebbi.

¹⁰Mammec ɣa negg a nesfreq ṯarwa n Arebbi ḏ ṯarwa n Ibȓis? Qa yinni war iqqimen ca sxeddamen min iǧan nican war ǧin ca zi Arebbi. Ƹaweḏ wenni war itexsen ca umas war iǧi ca zi Arebbi.

¹¹Ḏ wa ḏ awaȓ iy tesȓam zeg umezwaru iƹni itxeṣṣa wa labud a ntexs ayawya.

¹²Maci a niȓi am Qabil iǧan zi Lmufsid nni iruḥ inɣa umas. Mayemmi iy ṯ inɣa? Ȓaḥeqqac ȓexḏayem nnes netta ḏ ṯiƹeffanin, ȓexḏayem n wumas ḏ ṯiṣebḥanin.

¹³Iwa a ayṯma, war tƹejjibem ca wami ddunect-a tƹiffa-kenniw.

¹⁴Neccin nessen belli neẓwa zi ȓmewṯ ɣar ṯuḏarṯ ȓaḥeqqac ntexs ayṯmaṯneɣ. Wenni war itexsen ca ƹaḏ aqaṯ itƹic ḏi ȓmewṯ.

¹⁵Marra wenni ig itƹiffan umas am wenni ig ineqqen bnaḏem. Aqa kenniw ṯessnem wenni ig ineqqen bnaḏem war ḏayes tiȓi ca ṯuḏarṯ n ȓebda.

¹⁶S minzi iy ɣa nessen ȓemḥibbeṯ? Minzi Siḏiṯneɣ iṣeddeq xaneɣ ixef nnes. U ammu ƹaweḏ iy ɣa niȓi newjeḏ a nṣeddeq ixef nneɣ x ayṯmaṯneɣ.

¹⁷Wenni ɣar iǧa wagȓa n ddunect-a itwaȓa umas war ɣares ca iteḥḏaja uca iseqseḥ uȓ nnes xas, mammec ɣa ṯiȓi ȓemḥibbeṯ n Arebbi ḏeg wanita?

¹⁸A iḥenjiren, maci a ntexs bnaḏem s wawaȓen ḏ yiȓes waha; Lla, itxeṣṣa aṯ nexs s ȓexḏayem ḏ ȓḥaqq.

¹⁹Amenni iy ɣa nessen belli neccin zi lḥaqiqa, amenni ƹaweḏ a nesreyyeḥ uȓawen nneɣ zzaṯ i Arebbi.

²⁰Meȓa ƹaqbent-aneɣ lʼafkar n wuȓawen nneɣ ataf maƹlic, aqa Arebbi ḏ ameqqran x lʼafkar n wuȓawen nneɣ qa ifehhem marra ṯimesȓayin.

²¹Ay imƹizzen inu, meȓa war ḏaneɣ tƹaqiben ca wuȓawen nneɣ ataf aɣarneɣ ṯiȓi ijjen n zƹameṯ zzaṯ i Arebbi,

²²ataf azzayes neqbeȓ marra min ḏas ɣa nettar neccin ȓaḥeqqac netṭaƹa ȓuṣiyaṯ nnes ntegg minxef ireṭṭa netta.

²³Aqa ṯanita ḏ ȓuṣiyeṯ nnes a namen zeg yisem n Mmis Ƹisa Lmasiḥ, a ntexs ayawya am mammec iy ḏaneɣ d iweṣṣa netta.

²⁴Wenni ig isxeddamen ȓuṣiyaṯ nnes ataf aḏ iƹic ḏi Arebbi, Arebbi izeddeɣ ḏayes. Mammec ɣa negg neccin a nessen belli izeddeɣ ḏayneɣ? Nessen-iṯ s Arruḥ nni iy ḏaneɣ d yuca.