Read Tarifit 1 Yuḥanna 4 Bible Online

1 Yuḥanna 4 - Tarifit bible

1 Yuḥanna 4

¹Ay imƹizzen inu, war tiqqim ca ḏi marra arruḥaṯ, jarrbem-ṯen bac aḏ tessnem ma zi Arebbi ma lla. Qa ffɣen-d aṭṭas n iṯarrasen ɣar ddunect-a tarran ixef nsen ḏ lʼanbiya.

²Mammec ɣa negg a nessen arruḥ nni iy d itasen zi Arebbi? Kuȓ arruḥ iy d itasen zzayes u labud aḏ icheḏ belli Ƹisa Lmasiḥ netta yusa-d s ddat n bnaḏem.

³Arruḥ nni war icehhḏen ca x Ƹisa ataf war d yusi ca zi Arebbi. Arruḥ-a netta ḏ arruḥ n ddejjal iy xef ṯesȓim kenniw netta itas-d, ȓexxu ƹaweḏ aqaṯ ḏa ḏi ddunect-a.

⁴Kenniw a iḥenjiren, zi Arebbi iy ṯeǧam. Iṯarrasen-a ṯɣeȓbem-ṯen ȓaḥeqqac wenni iǧan ḏaywem imɣar x wenni iǧan ḏi ddunect-a.

⁵Niṯni zi ddunect-a. Falihaḏa ssawaȓen s ȓaƹquȓaṯ nsen n ddunect-a waha, iwḏan n ddunect-a tṣennaṭen-asen.

⁶Neccin zi Arebbi iy neǧa. Wenni issnen Arebbi itṣennaṭ-aneɣ. Wenni war iǧin ca zi Arebbi war ḏaneɣ itṣenniṭ ca. S manaya iy ɣa nessen Arruḥ n lḥaqiqa ḏ arruḥ n ixarriqen.

⁷Ay imƹizzen inu, u labud a ntexs ayawya ȓaḥeqqac ȓemḥibbeṯ tekka-d zi Arebbi. Wenni itexsen netta ixȓeq-d zi Arebbi issen Arebbi.

⁸Wenni war itexsen ca war issin ca Arebbi ȓaḥeqqac Arebbi ḏ ȓemḥibbeṯ ig iǧa.

⁹Ammu iy d ṯmeḍhar ȓemḥibbeṯ n Arebbi jaraneɣ wami d issekk Mmis aweḥḏani ɣar ddunect-a ḥima azzayes neddar.

¹⁰S manayenni minzi ḏas qqaren ȓemḥibbeṯ. Maci ḏ neccin iy ixsen Arebbi, ḏ netta iy ḏaneɣ ixsen wami d issekk Mmis aḏ yiȓi ḏ lfidya x ȓmuƹṣiyaṯ nneɣ.

¹¹Ay imƹizzen inu, meȓa anectuya iy ḏaneɣ ixes Arebbi, itxeṣṣa uȓa ḏ neccin a nexs ayawya.

¹²War ḏinni ḥadd ƹemmarṣ iẓra Arebbi. Walakin neccin meȓa ntexs ayawya ataf Arebbi izeddeɣ ḏayneɣ, ȓemḥibbeṯ nnes ṯejjiwen zzayneɣ.

¹³Mammec ɣa negg neccin a nessen belli netƹic ḏayes, netta izeddeɣ ḏayneɣ? Liʼanna yuca-aneɣ zi Arruḥ nnes.

¹⁴Iwa neccin neẓra ncehheḏ belli Babaṯneɣ issekk-d Mmis ḥima aḏ isenjem ddunect-a.

¹⁵Wenni ɣa icehḏen Ƹisa ḏ Mmis n Arebbi, ataf Arebbi iqqim ḏayes ataf netta iqqim ḏi Arebbi.

¹⁶Ammu iy d nuweḍ a nessen ȓemḥibbeṯ n Arebbi a namen zi ṯenni iy ḏaneɣ d yuca i neccin. Arebbi ḏ ȓemḥibbeṯ ig iǧa. Wenni iqqimen ḏi ȓemḥibbeṯ netta iqqim ḏi Arebbi, Arebbi iqqim ḏayes.

¹⁷Ammu iy ṯejjiwen zzayneɣ ȓemḥibbeṯ nnes ḥima aɣarneɣ ṯiȓi ijjen n zƹameṯ ḏi Yum Lḥisab ḏ Lƹiqab. Ȓaḥeqqac ḏi ddunect-a am Ƹisa am neccin.

¹⁸Iƹni ȓemḥibbeṯ war ṯessin ca ṯiggwḏi. Ȓemḥibbeṯ iy iǧan ṯekmaȓ aḏ tazzeȓ x ṯiggwḏi, mayemmi? Ȓaḥeqqac ṯiggwḏi tas-d zi ȓxuf n lƹiqab. Wenni iteggwḏen, netta ȓemḥibbeṯ nnes ƹaḏ war zzayes ṯejjiwen ca.

¹⁹Neccin ntexs minzi netta ixes-aneɣ ḏ amezwaru.

²⁰Wenni iqqaren qa nec texseɣ Arebbi netta itƹiffa umas, ataf netta ḏ bu-ixarriqen waha ig iǧa. Mayemmi? Wenni war itexsen ca umas ig iẓerr, ataf war izemmar ca aḏ ixes Arebbi iy war iẓerr ca.

²¹Iwa aqa ȓuṣiyeṯ iy ḏaneɣ ijja Lmasiḥ iƹni wenni itexsen Arebbi itxeṣṣa-ṯ aḏ ixes uȓa ḏ umas.