Read Tarifit 1 Yuḥanna 5 Bible Online

1 Yuḥanna 5 - Tarifit bible

1 Yuḥanna 5

¹Marra wenni ɣa yamnen Ƹisa netta ḏ Lmasiḥ ataf ixȓeq-d zi Arebbi. U marra wenni itexsen Babaṯneɣ ataf netta ƹaweḏ itexs ṯarwa nnes iy zzayes d ixeȓqen.

²Mammec ɣa negg neccin a nessen illa ntexs ṯarwa n Arebbi? Ntessen-iṯ meȓa ntexs Arebbi netṭaƹa-asent i ȓuṣiyaṯ nnes.

³Liʼanna ḏ ṯa ḏ ȓemḥibbeṯ n Arebbi iƹni netṭaƹa i ȓuṣiyaṯ nnes. U ȓuṣiyaṯ-a nnes war xaneɣ teḏqiȓent ca.

⁴Aqa marra wenni iy d ixeȓqen zi Arebbi aḏ iɣȓeb x ddunect-a. Ḏ wa ḏ aɣȓab iy zi neɣȓeb x ddunect-a iƹni lʼiman nneɣ.

⁵Min iƹna wenni iɣellben x ddunect-a? Wenni iɣellben ḏ wenni yumnen illa Ƹisa ḏ Mmis n Arebbi.

⁶Ƹisa Lmasiḥ ḏ wanita iy d yusin s waman ḏ iḏammen. Netta maci yusa-d s waman waha, yusa-d s waman ḏ iḏammen. Wenni icehhḏen netta ḏ Arruḥ iqeddsen minzi Arruḥ-a netta ḏ lḥaqiqa.

⁷Aqa ḏinni ṯȓaṯa ig icehhḏen, ṯȓaṯa-ya ḏ Arruḥ ḏ waman ḏ iḏammen. Ṯȓaṯa-ya ḏ ijjen.

⁹Meȓa neqbeȓ chaḏeṯ n bnaḏem qa chaḏeṯ n Arebbi ṯemɣar ktar. Liʼanna nettaṯ ḏ chaḏeṯ-a, ṯenni n Arebbi ig icehhḏen x Mmis.

¹⁰Wenni ɣa yamnen zi Mmis n Arebbi ataf aɣares ṯiȓi chaḏeṯ-a ḏeg wuȓ nnes. Wenni war yuminen ca zi chaḏeṯ-a n Arebbi ataf aṯ yarr ḏ bu-ixarriqen waha ȓaḥeqqac netta war yumin ca zi chaḏeṯ-a ig icheḏ ƹlaḥsab Mmis.

¹¹Ḏ ṯanita ḏ chaḏeṯ-a iƹni Arebbi yuca-aneɣ-d ṯuḏarṯ n ȓebda, ṯuḏarṯ-a aqat ḏi Mmis.

¹²Wenni ɣar iǧa Mmis ataf ɣares ṯuḏarṯ. Wenni war ɣar iǧi bu Mmis n Arebbi ataf war ɣares bu ṯuḏarṯ.

¹³Nec uriɣ-awem-d ṯimesȓayin-a i kenniw iy yumnen s yisem n Mmis n Arebbi ḥima aḏ tessnem illa ɣarwem ṯuḏarṯ n ȓebda n ȓebdaṯ.

¹⁴Ḏ ṯa ḏ ttiqeṯ iy ɣarneɣ ḏayes iƹni meȓa nettar-as can n ṯmesȓayṯ ƹlaḥsab ȓxaḍar nnes ataf netta aɣarneɣ iṣenneṭ.

¹⁵Meȓa neccin nessen belli itsȓa ɣarneɣ qaƹ ṯimesȓayin nni iy ḏas ntettar ataf a nessen belli min ḏas ɣa nettar aḏaneɣ ṯ yuc.

¹⁶Wenni ɣa itwaȓan ijjen n wumas iƹṣa ijjen ȓmuƹṣiyeṯ iy war itiwin ca ɣar ȓmewṯ, netta itxeṣṣa-yas axas iẓẓaǧ ɣar Arebbi ataf aḏas yuc ṯuḏarṯ i wumas nni. Nniɣ-awem-d manaya ƹlaḥsab yinni ȓmuƹṣiyeṯ nsen war ṯen tiwi ca ɣar ȓmewṯ. Ḏinni ijjen n ȓmuƹṣiyeṯ ig itawin ɣar ȓmewṯ, ṯenni war ḏawem t qqareɣ ca axas ṯeẓẓaǧem.

¹⁷Marra ccarr netta ḏ ȓmuƹṣiyeṯ, walakin ḏinni ȓmuƹṣiyaṯ war ḏaneɣ tiwint ca ɣar ȓmewṯ.

¹⁸Neccin nessen belli marra wenni d ixeȓqen zi Arebbi war iqqim ca isxeddam ȓmuƹṣiyaṯ. Mmis iy d ixeȓqen zi Arebbi iḥeṭṭa-ṯ, war ṯ itḍarri ca Lmufsid.

¹⁹Nessen illa neccin zi Arebbi, nessen ƹaweḏ marra ddunect-a aqat swadday i ṯzemmar n Lmufsid.

²⁰Nessen ƹaweḏ aqa Mmis n Arebbi yusa-d yuca-aneɣ ȓefhameṯ bac a nessen wenni iǧan ḏ ṣṣaḥ. Neccin aqaneɣ ḏeg wenni iǧan ḏ ṣṣaḥ s Mmis Ƹisa Lmasiḥ. Wanita ig iǧan ḏ Arebbi n ṣṣaḥ ḏ ṯuḏarṯ n ȓebda n ȓebdaṯ.

²¹A iḥenjiren, ḥḍam ixef nwem zi lʼaṣnam.