Read Tarifit 2 Yuḥanna 1 Bible Online

2 Yuḥanna 1 - Tarifit bible

2 Yuḥanna 1

¹Nec ḏ amɣar, tariɣ ṯabrat-a i ṯemɣarṯ itwaxḍaren ḏ ṯarwa nnes iy texseɣ ḏi lḥaqiqa.[1] Maci ḏ nec waha iy ṯen itexsen; Lla, texsen-ṯen qaƹ yinni issnen lḥaqiqa.

²Manaya ƹlaḥsab lḥaqiqa ig izeddɣen ḏayneɣ aḏ tiȓi akiḏneɣ i ȓebda.

³Ƹlaḥsab lḥaqiqa ḏ ȓemḥibbeṯ akiḏneɣ yiȓi arḍa ḏ arraḥmeṯ ḏ ȓehna zi Arebbi Babaṯneɣ ḏ Ƹisa Lmasiḥ wenni iǧan ḏ Mmis n Babaṯneɣ.

⁴Nec farḥeɣ aṭṭas wami ufiɣ zi ṯarwa nnem yinni igguren ḏeg ubriḏ n lḥaqiqa am mammec ḏaneɣ iweṣṣa Babaṯneɣ.

⁵A ṯamɣarṯ itwaƹizzen, ȓexxu tettareɣ zzayem a ntexs ayawya. War ḏam d tariɣ bu can n ȓuṣiyeṯ ḏ jḏiḏ; Lla, nettaṯ ḏ ṯenni tuɣa ɣarneɣ zeg umezwaru.

⁶Iwa ammu iy ṯeǧa ȓemḥibbeṯ iƹni a neggur ƹlaḥsab ȓuṣiyaṯ nnes. Ȓuṣiyeṯ-a nettaṯ ḏ ṯenni tuɣa ṯesȓim zeg umezwaru. Wa ammu itxeṣṣa aḏayes ṯeggurem.

⁷Aqa aṭṭas n iṯarrasen niṯni ḏ iɣeddaren ffɣen-d ɣar ddunect-a, nekkaren belli Ƹisa Lmasiḥ imeḍhar-d s ddat n bnaḏem. Aṯarras-a iy iǧan ammu netta ḏ aɣeddar waha ḏ ddejjal iy iǧa.

⁸Ḥḍam ixef nwem ḥima aḏ trebḥem ljaʼiza nwem ṯekmaȓ maci aḏ texsarem minxef nxeddem.

⁹Wenni iruḥen ɣar ȓeggwaj war iqqim ca ḏi ttaƹlim n Lmasiḥ ataf war ɣares ca Arebbi. Wenni iqqimen ḏi ttaƹlim-a aɣares yiȓi Babaṯneɣ ak Mmis.

¹⁰Wenni iy ɣarwem d itasen war d itiwi akiḏes ttaƹlim-a, itxeṣṣa-kenniw war ṯ ṯsiḏifem ca ɣar ṯuḏrin nwem war ḏas ṯeqqarem ca ḥetta uȓa ḏ azul.

¹¹Ȓaḥeqqac wenni iy ḏas ɣa inin uȓa ḏ azul ataf icarrec akiḏes ḏi ȓefƹayeȓ nnes ṯiƹeffanin.

¹²Ƹaḏ ɣari aṭṭas iy xseɣ aḏawem ṯiḏ ariɣ i kenniw walakin aḏ yiȓi ḥsen meȓa war steƹmiȓeɣ ca ḏi ṯiwriqin ḏ ssmex. Lla, tmenniɣ aɣarwem d aseɣ akiḏwem ssiwȓeɣ aɣembub ḏeg uɣembub bac ȓefraḥeṯ nneɣ aḏ tejjawen.

¹³Tsawwaḍen-awem-d sȓam ṯarwa n wučmam itwaxḍaren.