Read Tarifit 3 Yuḥanna 1 Bible Online

3 Yuḥanna 1 - Tarifit bible

3 Yuḥanna 1

¹Nec ḏ amɣar, tariɣ ṯabrat-a i Ɣayus wenni iy xafi iƹizzen ḏi lḥaqiqa.

²Ay uma inu iƹizzen, tẓaǧiɣ axak isseqsa ȓxir aɣarek ṯiȓi ṣṣaḥeṯ nnec wami ṯeǧiḏ mliḥ ḏi ȓaƹmar nnec.

³Minzi nec farḥeɣ aṭṭas wami d usin ȓebƹaḍ n wawmaṯen cehḏen xak x lḥaqiqa iy ḏayec ḏ mammec cek ƹaḏ ṯeggured nican ḏi lḥaqiqa.

⁴Farrḥeɣ aṭṭas s waṭṭas war zemmareɣ aḏ arniɣ xmi tesȓiɣ ṯarwa inu gguren nican x ubriḏ n lḥaqiqa.

⁵Ay uma inu iƹizzen, cek ḏayec ttiqeṯ wami teggeḏ lmejhud nnec ƹlaḥsab awmaṯen-a waxxa niṯni tasen-d ɣarek ḏ ibarraniyen.[1]

⁶Cehḏen xak ḏanita zzaṯ i jmaƹeṯ x ȓemḥibbeṯ nnec. Aḏ teggeḏ mliḥ ƹaweḏ meȓa ṯdebbareḏ xasen x ubriḏ nsen ƹlaḥsab min iteḥḏaja Arebbi.

⁷Yina twassekken-d ƹlaḥsab isem nni yuƹȓan, war jemmƹen bu lmuƹawana zeg yinni war iḏeffaren ca Arebbi.

⁸S manaya itxeṣṣa u labud a nƹawen awmaṯen-a am yina bac a nexḏem ak wayawya ƹlaḥsab lḥaqiqa.

⁹Uriɣ ijjen n wawaȓ i jmaƹeṯ walakin yugi Diyutrif i ssulṭa nneɣ ȓaḥeqqac netta iteƹjib-as aḏ yiȓi ḏ amezwaru.

¹⁰S manaya meȓa usiɣ-d nec, aḏ feḍḥeɣ min itegg netta issawaȓ s wawaȓ n ṯubbuhȓiya war iḥȓin ḍed nneɣ. War iqniƹ ca s manayenni, netta itagi aḏ itreḥḥab s wawmaṯen isbedda uȓa ḏ yinni itreḥḥaben zzaysen itazzeȓ xasen zi jmaƹeṯ.

¹¹Ay uma inu iƹizzen, war tqellad ca min iǧan ḏ aƹeffan; Lla, qelled min iǧan ḏ aṣebḥan. Wenni iteggen min iǧan ḏ aṣebḥan netta zi Arebbi; Wenni iteggen min iǧan ḏ aƹeffan netta war itwiȓi ca Arebbi.

¹²Amma Dimitriyus cehhḏen xas mliḥ qaƹ iwḏan waxxa uȓa ḏ lḥaqiqa ṯcehheḏ xas s yixef nnes. Axas narni waxxa ḏ chaḏeṯ nneɣ u kenniw ṯessnem belli chaḏeṯ nneɣ neccin ḏ ṣṣaḥ.

¹³Itɣima-ayi ƹaḏ aṭṭas min ḏac d ɣa ariɣ walakin ḥsen war ḏac ṯiḏ tariɣ ca s stilu ḏ ssmex.

¹⁴Lla, tmenniɣ ac ẓreɣ ḏeɣya ȓexddenni a nessiweȓ aɣembub ḏeg uɣembub.

¹⁵Aɣarek yiȓi ȓehna. Tsawwaḍen-ac-d sȓam ṣṣḥaba. Seǧem xasen x ṣṣḥaba kuȓ ijjen s yisem nnes.