Read Tarifit Yahuḏa 1 Bible Online

Yahuḏa 1 - Tarifit bible

Yahuḏa 1

¹Nec ḏ Yahuḏa[1] ḏ axeddam n Ƹisa Lmasiḥ, nec ḏ umas n Yaƹqub. Tariɣ ṯabrat-a i yinni iy d itwaȓaɣan, itḥibba-ṯen Arebbi Babaṯneɣ, iḥeṭṭa-ṯen Ƹisa Lmasiḥ.

²Aḏaywem ṯmarni arraḥmeṯ ḏ ȓehna ḏ ȓemḥibbeṯ s waṭṭas.

³Ay imƹizzen inu, tuɣa rzuɣ aḏawem ariɣ x ubriḏ nni iy zi nnejjem neccin iy ḏi ncarrec marra, walakin ufiɣ u labud aḏawem ariɣ ṭṭalab-a ḥima aḏ tmenɣem x lʼiman-a iy zi twakellfen ṣṣaliḥin ḏeg yijjen n ṯwaȓa i ȓebda.

⁴Aqa ca iṯarrasen uḏfen-d jarawem war ḏasen d ṯarrim bu ȓexbar, qa lƹiqab nsen yura xas mecḥaȓ zeg wami. Yina ƹeṣṣan Arebbi, sƹewwajen arḍa nnes bac aɣarsen yiȓi am can n ttesriḥ n ccehweṯ. Nekkaren Ƹisa Lmasiḥ iy iǧan ḏ Mawlana nneɣ qa netta ḏ Siḏiṯneɣ waḥḏes.

⁵Waxxa ssneɣ belli ṯessnem manaya, xseɣ akenniw sfekkareɣ mliḥ belli Siḏiṯneɣ ifekk ccaƹb nnes zi Miṣra, walakin menbaƹd yinni war yuminen ca imḥa-ṯen qaƹ.

⁶Ammu ƹaweḏ iweqƹen i lmalaʼikaṯ nni iy yugin aḏ qqiment ḏi lmarṭaba nsent n ssulṭa semḥent ƹaweḏ ḏi ṯzeddiɣṯ nsent. Min ḏasent igga? Iqqen-iṯent s snaseȓ nni war ifennin ca ƹemmarṣ, ibelleƹ xasent ḏeg yijjen n ṯaǧest ḏ ṯabercant aȓ Lƹiqab n Nhar nni Ameqqran.

⁷Ammu ƹaweḏ iy ggin imezḏaɣ ḏi ṯendint nni n Sadum ḏ ṯendint nni n Ƹamura ḏ ibilajen nni iy ḏasent-id innḍen. Sellmen ixef nsen i lfasad ḏ ccehweṯ nni maci ṭṭabiƹi. Iƹni niṯni iggi-ṯen Arebbi ḏ lƹibra, twaƹaqben s yijjen n lƹiqab n ṯmessi war ifennin ca ƹemmarṣ.

⁸Ammu ƹaweḏ iṯarrasen-a. Ƹlaḥsab ṯirja nsen sexnazen ddat nsen, nekkaren ssulṭa, qqaren awaȓen war iḥȓin x lmexluqaṯ n ujenna.

⁹Walakin min igga lmalak ameqqran Mikaʼil wami imneɣ ak Ibȓis imnaqar akiḏes x ddat immuṯen n Musa? Waxxa ḏ Mikaʼil-a war izƹim ca aḏ yini ca n wawaȓ war iḥȓin x Ibȓis, yenna-as cek ac inha Siḏi Arebbi!

¹⁰Walakin iṯarrasen-a yina ssawaȓen s wawaȓ war iḥȓin x marra min war fehhmen ca. Ṯimesȓayin-a umi fehhmen iwa fehhmen-ṯent s ṭṭabiƹa nsen waha, niṯni ggin am ȓuḥuc iqefȓen. Ṯimesȓayin-a ḏ niṯenti iy ṯen ɣa imḥan!

¹¹Ya ȓefḍiḥeṯ nsen! Tebƹen abriḏ nni n Qabil. Semḥen ḏeg yixef nsen ḍemƹen ḏi tmenyaṯ gguren ḏi lɣaleṭ n Balƹam. Fnan ḏi lḥirak nni n Quraḥ wami iƹarreḍ i Musa.

¹²Iṯarrasen-a yina twessaxen imensiwen nwem n ṯemƹacarṯ. Tetten akiḏwem bȓa ma aḏ seḏḥan, niṯni ggin am ca n imeksawen iy ƹettqen ixef nsen waha. Niṯni ḏ iseynuṯen bȓa yanẓar ɣir itawi-ṯen arriḥ itarra-ṯen. Niṯni ggin am ṯcejjura ḏi ȓexȓif war itarwen ca, tneqȓaƹent-id zeg iẓewran nsent; iƹni ibriḏen nsent mmuṯen s ṯnayen.

¹³Niṯni ggin am ȓemwaj n ȓebḥar ccaṯent s ȓefḍiḥeṯ n ukuffu nsent. Niṯni ggin am can iṯran iffɣen zeg umcan nsen gguren ɣar yijjen n ṯaǧest ḏ ṯabercant ig itwaswejḏen i ȓebda n ȓebdaṯ.

¹⁴Fa Axnux wenni ig iǧan ḏ ayyaw n Adam zi jeddiṯwem wis sebƹa[2] netta iƹȓem ijjen n wawaȓ zi Arebbi inna-ṯ x iṯarrasen-a: "Xzareṯ, aqa yusa-d Siḏiṯneɣ s waȓaf n uȓufaṯ n imqeddsen nnes

¹⁵aḏ iḥaseb marra iwḏan. Marra yinni iƹeṣṣan aḏasen d ismeḍhar marra ȓefƹayeȓ nsen ṯiƹeffanin iy ggin ḏeg ubriḏ nsen aƹeffan, aḏ ssnen ƹaweḏ marra awaȓen nni war iḥȓin iy xas nnan yinni iƹeṣṣan war ḏeffaren ca Arebbi."

¹⁶Cuf, iṯarrasen-a tceṯcan waha, tentaqaḏen x midden, niṯni ḏeffaren ccehawaṯ nsen ṯiƹeffanin; Semɣaren ixef nsen s uqemmum nsen, tesȓehhan iwḏan bac aḏ neffƹen ixef nsen.

¹⁷Fa kenniw ay imƹizzen inu, fekkareṯ min tuɣa qqaren zi qbeȓ arrusul n Siḏiṯneɣ Ƹisa Lmasiḥ.

¹⁸Nnan-awem: "Ḏi ȓiyyam nni ineggura aḏ iȓin mujudin yinni iḏeḥḥcen x yiwḏan, ḏeffaren ccehawaṯ nsen ṯiƹeffanin waha."

¹⁹Iwa niṯni ḏ yina iy kenniw ifarrqen, ḏaysen arruḥ n ddunect-a waha war ḏaysen ca Arruḥ iqeddsen.

²⁰Kenniw ay imƹizzen inu, bnaṯ ixef nwem ḏi dsas n lʼiman yuƹȓan iy iǧan ḏaywem, ẓaǧem s Arruḥ iqeddsen.

²¹Itxeṣṣa aḏ teqqimem ḏi ȓemḥibbeṯ n Arebbi aḏ trajam arraḥmeṯ nni n Siḏiṯneɣ Ƹisa Lmasiḥ ṯenni iy kenniw itawin ɣar ṯuḏarṯ nni war ifennin ca ƹemmarṣ.

²²Sxeḏmeṯ lḥanana ak yinni itcekkan.

²³Fekkeṯ inneɣni, jebḏem-ṯen-d zi ṯmessi. Inneɣni sbiyynem-asen-d arraḥmeṯ ṯemxelleṭ ak ṯiggwḏi iƹni aḏ tƹiffem uȓa ḏ arruḍ nsen ig ixenzen s ṭṭabiƹa nsen ṯaƹeffant.

²⁴Fa wenni izemmaren akenniw iḥḍa bac war tenḏȓifem ca, izemmar ƹaweḏ akenniw iqeddem ɣar zzaṯ nnes lƹaḍim aḏ tiȓim bȓa ȓƹib aɣarwem ṯiȓi ijjen n ȓefraḥeṯ ḏ ṯameqqrant,

²⁵iƹni Arebbi wenni iǧan waḥḏes isenjam-aneɣ. Aɣares ṯiȓi lƹaḍama ḏ ṯuƹȓat ḏ lquwwa ḏ ssulṭa s Ƹisa Lmasiḥ Siḏiṯneɣ iƹni qbeȓ i marra zmanaṯ iy iƹḏun u ḏ ȓexxu u ḏ ȓebda n ȓebdaṯ. Amin.