Read Tarifit Lwaḥi 17 Bible Online

Lwaḥi 17 - Tarifit bible

Lwaḥi 17

¹Yusa-d ɣari ijjen zi sebƹa n lmalaʼikaṯ nni iy ɣar ǧant sebƹa n ṯmejmarin inna-ayi: "Araḥ-d, aḏac d smeḍhareɣ lḥisab ḏ lƹiqab n lfasda ṯameqqrant ig iqqimen x waṭṭas n waman.

²Fesḏen akiḏes izeǧiḏen n ṯmurṯ u ƹaweḏ imezḏaɣ n ṯmurṯ skaren s waman uḍiȓ iƹni lfasad nnes."

³Lmalak nni iysi-ayi arruḥ ɣar ȓexȓa, ẓriɣ ijjen n ṯemɣarṯ ṯenya x yijjen n ȓwaḥc ḏ azeggwaɣ iḥeḏqen iƹemmar s yisemawen war iḥȓin x Arebbi. Ɣares sebƹa n iqeyyuƹen ḏ ƹecra n waccawen.[24]

⁴Ṯamɣarṯ-a ṯegga arruḍ ḏ gruna ḏ uzeggwaɣ iḥeḏqen. Ṯzewweq s ddheb ṯegga ṯiƹeqqayin iy iɣȓan ḏ jjuwhar. Ḏeg ufus nnes ijjen n ȓkas n ddheb iƹemmar s ṯuƹuffna ḏ min iǧan ḥram n lfasad nnes.

⁵X ṯenyarṯ[25] nnes yura ḏinni ijjen n yisem: Babil Ṯameqqrant, ḏ yemmaṯsent n lfasdaṯ ḏ ṯuƹuffna n ṯmurṯ. Walakin ȓmaƹna nnes war ṯ ifehhem ḥadd.

⁶Ẓriɣ ṯamɣarṯ nni ṯsekkar s iḏammen n ȓmuminin ṣṣaliḥin ḏ iḏammen n yinni icehhḏen x Ƹisa. Wami t ẓriɣ ḏehceɣ aṭṭas.

⁷Inna-ayi lmalak nni: "Mayemmi ṯḏehhaceḏ ammu? Aḏac cerrḥeɣ ȓmaƹna inuffaren n ṯemɣarṯ nni ḏ ȓmaƹna inuffaren n ȓwaḥc nni wenni ɣar iǧa sebƹa n iqeyyuƹen ḏ ƹecra n waccawen iy xef ṯenya.

⁸Ȓwaḥc nni iy ṯeẓriḏ tuɣa iǧa, ȓexxu war iǧi ca, ƹȓayen aḏ d igaƹƹeḏ zi ȓaǧeɣ bȓa ȓaḥedd aḏ itwahḏem. Imezḏaɣ n ṯmurṯ xmi ɣa ẓren ȓwaḥc nni ataf aḏ dehcen iƹni kuȓ ijjen isem nnes war izemmem ca zeg wami ṯeǧa ddunect ḏi Lkitab n Ṯuḏarṯ. Ȓaḥeqqac ȓwaḥc nni tuɣa iǧa, ȓexxu war iǧi ca, ƹaḏ aḏ d yas.

⁹Ḏi manaya labud ȓefhameṯ: Sebƹa n iqeyyuƹen niṯni ḏ sebƹa n iḏurar iy xef ṯeqqim ṯemɣarṯ-a, u ƹaweḏ niṯni ḏ sebƹa n izeǧiḏen.

¹⁰Xemsa zzaysen wḍan, ijjen iǧa, ijjen ƹaḏ war d yusi ca. Xmi d ɣa yas ataf aḏ iqqim ɣir cwayt n ȓweqṯ waha.

¹¹Ȓwaḥc nni iy tuɣa iǧan, ȓexxu war iǧi ca, netta ḏ wis ṯmenya netta ƹaweḏ ḏ ijjen zi sebƹa nni qa iggur aḏ itwahḏem.

¹²Ƹecra nni n waccawen iy ṯeẓriḏ niṯni ḏ ƹecra n izeǧiḏen ƹaḏ war ḏasen ṯemmuc ca ssulṭa aḏ ḥekmen. Aḏasen ṯemmuc ssulṭa aḏ ḥekmen ijjen n ȓweqṯ ḏ ṯamezyant waha ak ȓwaḥc.

¹³Yina tafaqen aḏas ucen i ȓwaḥc jjheḏ nsen ḏ ssulṭa nsen.

¹⁴Niṯni aḏ ḥarben Izmar walakin netta aṯen iɣȓeb; Qa netta ḏ Mawlana n mawlanaṯ ḏ Azeǧiḏ n izeǧiḏen, yinni iy kiḏes iǧan iȓaɣa-yasen-d Arebbi ixḍar-iṯen, ḏaysen iǧa ȓaman."

¹⁵Inna-ayi lmalak nni: "Aman nni iy ṯeẓriḏ mani ṯeqqim lfasda nni, niṯni min ƹnan? Niṯni ḏ iwḏan zi mkuȓ ccaƹb ḏ ȓɣaci ḏ ȓgens ḏ lluɣa.

¹⁶Ƹecra n waccawen nni iy ṯeẓriḏ u ḏ ȓwaḥc nni aḏ ƹiffen lfasda, aḏas kksen marra min ɣares at jjen ḏ ṯaƹeryant. Aḏ ccen aysum nnes, at sḥerqen s ṯmessi.

¹⁷Ȓaḥeqqac ḏ Arebbi ig ismunen uȓawen nsen ḥima aḏas ggen ȓxaḍar i Arebbi, iƹni aḏ tafqen aḏas ucen i ȓwaḥc ȓeḥkam nsen ḥetta aȓ iy ɣa twakemmȓen wawaȓen n Arebbi.

¹⁸Ṯamɣarṯ nni iy ṯeẓriḏ nettaṯ ḏ ṯandint ṯameqqrant ig iteḥkamen x izeǧiḏen n ṯmurṯ."