Read Tarifit Lwaḥi 19 Bible Online

Lwaḥi 19 - Tarifit bible

Lwaḥi 19

¹Menbaƹd i manaya sȓiɣ i yijjen n ṯmijja amecnaw ṣṣut n waṭṭas n yiwḏan iǧan ḏeg ujenna, ṯeqqar s jjheḏ: "Ḥemḏeṯ Arebbi![29] Asenjem ḏ lƹaḍama ḏ jjheḏ i Arebbi nneɣ.

²Ȓeḥkam nnes ḏ ȓḥaqq iǧa nican. Iḥaseb lfasda ṯameqqrant ig isefsaḏen ṯamurṯ s lfasad nnes, intaqem zzayes ƹlaḥsab iḏammen n yinni iƹebbḏen Arebbi."

³Nnan ṯwara wis ṯnayen: "Ḥemḏeṯ Arebbi! Ddexxan nnes itgaƹƹaḏ i ȓebda n ȓebdaṯ."

⁴Arbeƹa u ƹicrin n imɣaren ḏ arbeƹa n lmexluqaṯ sejjḏen i Arebbi iqqimen x lƹarc, qqaren: "Amin! Ḥemḏeṯ Arebbi!"

⁵Ṯusa-d ijjen n ṯmijja zi lƹarc ṯeqqar: "Ḥemḏeṯ Arebbi ya lƹibad nnes marra, a yinni ṯ iteggwḏen s umezyan ḏ umeqqran!"

⁶Sȓiɣ i yijjen n ṣṣut am ṣṣut n waṭṭas n ȓɣaci niɣ am ṣṣut n waṭṭas n waman niɣ am ṣṣut n wajjaj ijehḏen, iqqar: "Ḥemḏeṯ Arebbi! Siḏi Arebbi nneɣ ig izemmaren i kuȓci qa iḥekkem.

⁷Yallahem a nfarḥeṯ, a nezhuṯ, aṯ nsemɣareṯ! Ȓfarḥ n Yizmar aqa yuweḍ-d, ṯasȓiṯ nnes qa ṯsewjeḏ ixef nnes.

⁸Immuc-as axas ṯegg ȓkettan n lulan aṣebḥan, ireqq, iṣfa." (Ȓkettan n lulan aṣebḥan iƹni netta ḏ ȓexḏayem ig iǧan nican n ȓmuminin ṣṣaliḥin.)

⁹Inna-ayi lmalak wenni: "Ari manaya: Ssaƹḏ n yinni itwaƹarḍen ɣar umensi n ȓfarḥ n Yizmar!" Inna-ayi ƹaweḏ: "Awaȓen-a ǧan ḏ ṣṣaḥ zi Arebbi."

¹⁰Uḍiɣ-as ɣar iḍaren nnes ḥima aḏas sejjḏeɣ. Indeq-d inna-ayi: "Lla! Qa nec ḏ ȓƹabḏ am nec am cek am ayṯmac iy ṭṭfen x minxef icheḏ Ƹisa. Sejjeḏ-as i Arebbi! Ȓaḥeqqac minxef icheḏ Ƹisa netta ḏ arruḥ n l'anbiya."[30]

¹¹Ẓriɣ ajenna inurzem ḏinni ijjen n uyis ḏ acemȓaȓ, wenni xas inyin qqaren-as Ȓaman ḏ ȓḥaqq. Itḥasab itḥarab s ȓḥaqq.

¹²Ṯiṭṭawin nnes am uḥaḏuq n ṯmessi, x uzeǧif nnes aṭṭas n ttajaṯ. Yura xas ijjen n yisem war ṯ issin ḥadd illa netta.

¹³Igga xas ijjen n čammir iɣeḍsen ḏeg iḏammen, s yisem tȓaɣan-as Awaȓ n Arebbi.

¹⁴Ȓƹaskar n ujenna ḏeffaren-ṯ nyin x yiysan ḏ icemȓaȓen, ggin arruḍ n ȓkettan n lulan aṣebḥan ḏ acemȓaȓ inqa.

¹⁵Iteffeɣ-d zeg uqemmum nnes ijjen n ssif iqḍeƹ, azzayes yuweṯ ȓegnus. Netta aṯen yarwes s uƹekkaz n ȓeḥḏiḏ, axasen iƹeffes[31] ḏi ṯsirṯ n waman n uḍiȓ iƹni ḏ lƹiqab ameqqran n Arebbi ig izemmaren i kuȓci.

¹⁶Yura x učammir ḏ umeṣṣaḍ nnes ijjen n yisem iƹni ḏ Azeǧiḏ n izeǧiḏen ḏ Mawlana n mawlanaṯ.

¹⁷Ẓriɣ ijjen n lmalak ibedd x ṯfucṯ, isnekkar ṯɣuyyeṯ s jjheḏ iqqar-asen i marra ijḍaḍ iṭṭawen ḏi ȓwesṭ n ujenna: "Araḥem-d, muneṯ ɣar umensi ameqqran n Arebbi

¹⁸ḥima aḏ teccem aysum n izeǧiḏen ḏ uysum n arruyas n ȓƹaskar ḏ uysum n yinni ijehḏen ḏ uysum n yiysan ḏ yinni xasen inyin ḏ uysum n marra iwḏan iƹni ḏ yinni ɣar iǧa bab nsen ḏ yinni ɣar ṯeǧa lḥurriya nsen, s umezyan ḏ umeqqran."

¹⁹Ẓriɣ ȓwaḥc ḏ izeǧiḏen n ṯmurṯ ḏ ȓƹaskar nsen njemƹen ḥima aḏ ḥarben wenni inyin x uyis ḏ ȓƹaskar nnes.

²⁰Itwaṭṭef ȓwaḥc ḏ ameḥbus, akiḏes wenni itarran ixef nnes ḏ nnabi iy tuɣa iteggen lmuƹjizaṯ zzaṯ i ȓwaḥc. S lmuƹjizaṯ nni ixḏeƹ yinni iy ḏi iǧa ṭṭabaƹ n ȓwaḥc tsejjaḏen-as i lʼaṣnam nnes. Ȓwaḥc ḏ wenni itarran ixef nnes ḏ nnabi menḍaren s ṯnayen iḏsen ḏi ȓebḥar n ṯmessi ireqqen s ȓekbriyeṯ u niṯni aqaṯen ƹaḏ s buḥbeȓ nsen.

²¹Ssif nni iy d iffɣen zeg uqemmum n wenni inyin x uyis inɣa marra yinni iqqimen, usin-d yijḍaḍ jjiwnen marra zeg uysum nsen.