Read Tarifit Lwaḥi 22 Bible Online

Lwaḥi 22 - Tarifit bible

Lwaḥi 22

¹Ismeḍhar-ayi-d lmalak nni iɣzar n waman n ṯuḏarṯ ṣfan am jjaj, iteffeɣ-d zi lƹarc n Arebbi ḏ Yizmar

²itazzeȓ ḏi ȓwesṭ n ccariƹ n ṯendint. X ṯnayen n iɣezḏisen n yiɣzar-a ḏinni ṯacejjarṯ n ṯuḏarṯ. Tarew ṯenƹac n ṯwaȓaṯin kuȓ char ijjen n ṯwaȓa, afar nnes isgenfa ȓegnus.

³Zi ssenni aȓ ṯsawent war ḏinni tiȓi bu nnaƹȓeṯ. Lƹarc n Arebbi ḏ Yizmar aḏ yiȓi ḏi ṯendint-a, aṯ ƹebḏen lƹibad nnes.

⁴Aḏ ẓren aɣembub nnes, isem nnes aqaṯ x ṯenyarṯ[34] nsen.

⁵Zi ssenni aȓ ṯsawent war ḏinni tiȓi bu ǧiȓeṯ, war teḥḏijin ca ṯfawṯ n ȓefnar niɣ ḏ ṯfawṯ n ṯfuct ȓaḥeqqac Siḏi Arebbi netta axasen igg ṯfawṯ nnes. Aḏ ḥekmen i ȓebda n ȓebdaṯ.

⁶Inna-ayi lmalak wenni: "Awaȓen-a ḏaysen ȓaman ḏaysen ȓḥaqq. Arebbi netta ḏ Mawlana iy d isehwan lwaḥi x lʼanbiya, issekk-d lmalak nnes ḥima aḏ d ismeḍhar i yinni iy ṯ iƹebbḏen min labud ɣa iweqƹen ƹȓayen."

⁷"Nec aqa usiɣ-d war tƹeṭṭaȓeɣ ca! Ssaƹḏ n yinni iteggen array i wawaȓen n lwaḥi iǧan ḏi Lkitab-a."

⁸Ḏ nec Yuḥanna iy sȓiɣ, ẓriɣ ṯimesȓayin-a. Wami sȓiɣ, ẓriɣ manaya, hwiɣ aḏ sejjḏeɣ ɣar iḍaren n lmalak nni iy ḏayi d ismeḍharen ṯimesȓayin-a.

⁹Inna-ayi: "Lla! Qa nec ḏ ȓƹabḏ, am nec am cek am ayṯmac lʼanbiya ḏ marra yinni iteggen array i wawaȓen n Lkitab-a. Sejjeḏ-as i Arebbi."

¹⁰Inna-ayi: "War snuffar ca awaȓen-a n lwaḥi ḏi Lkitab-a ȓaḥeqqac ȓweqṯ ṯuḏes-d.

¹¹Wenni iteggen ccarr aḏ iqqim itegg ccarr. Wenni ixenzen aḏ iqqim itexniz. Wenni iǧan nican aḏ iqqim nican. Wenni iǧan ḏ amqeddes aḏ iqqim ḏ amqeddes."

¹²Inna Ƹisa: "Nec aqa usiɣ-d war tƹeṭṭaȓeɣ ca! Aḏ d awiɣ texȓiseṯ, aḏ jaziɣ kuȓ ijjen ƹlaḥsab ȓexḏayem nnes.

¹³Nec ḏ lʼalif nec ḏ lyaʼ, nec ḏ amezwaru ḏ aneggaru. Nec kuȓci zzayi ig ibḏa, kuȓci zzayi iy ɣa ikemmeȓ.

¹⁴Ssaƹḏ n yinni itṣebbanen ičammiren nsen, ḥima aɣarsen yiȓi ȓḥaqq ḏi ṯcejjarṯ n ṯuḏarṯ aḏ aḏfen ṯandint zi ṯewwura nnes.

¹⁵Ɣar barra n ṯendint ǧan ḏinni iqzinen ḏ iseḥḥaren ḏ yinni ifessḏen ḏ yinni ineqqen iwḏan ḏ yinni iƹebbḏen lʼaṣnam ḏ marra yinni isxerriqen iy tḥibban ixarriqen.

¹⁶Ḏ nec Ƹisa ssekkeɣ-d lmalak inu ḥima aḏawem icheḏ x ṯmesȓayin-a ḏi ṯjumaƹ n ȓmuminin. Nec ḏ lʼaṣel n Dawed u zi ddurriṯ nnes. Nec ḏ iṯri n ȓefjar itceƹciƹen."

¹⁷Arruḥ ḏ ṯsȓiṯ qqaren: "Araḥ-d!" Wenni itsȓan aḏ yini: "Araḥ-d!" Wenni ifuḏen aḏ d yas, wenni irezzun aman n ṯuḏarṯ aḏ isew baṭeȓ!

¹⁸Cehhḏeɣ nec x marra yinni itsȓan i wawaȓen-a n lwaḥi ḏi Lkitab-a: Wenni xasen ɣa yarnin, ataf Arebbi as yarni lmuṣibaṯ iy d yusin ḏi Lkitab-a.

¹⁹Wenni ɣa ikksen zeg wawaȓen-a n lwaḥi ḏi Lkitab-a, ataf Arebbi as ikkes ȓḥaqq nnes zi ṯmesȓayin ig yurin ḏi Lkitab-a, iƹni ȓḥaqq nnes n ṯcejjarṯ n ṯuḏarṯ ḏ ȓḥaqq nnes n ṯendint iqeddsen.

²⁰Iqqar Ƹisa iƹni wenni ixebbaren x ṯmesȓayin-a: "Wah, nec aqa usiɣ-d war tƹeṭṭaȓeɣ ca!" Amin, araḥ-d a Siḏiṯneɣ Ƹisa.

²¹Aḏ yiȓi arḍa n Siḏiṯneɣ Ƹisa ak kuȓ ijjen. Amin.