Read Tarifit Lwaḥi 5 Bible Online

Lwaḥi 5 - Tarifit bible

Lwaḥi 5

¹Ṯumma ẓriɣ ijjen n Lkitab ḏeg ufus afusi n wenni iqqimen x lƹarc yura ɣar ḏaxeȓ ḏ barra, icemmeƹ sebƹa n marraṯ.

²Twaȓiɣ ijjen n lmalak ameqqran iȓaɣa s jjheḏ iqqar: "Wi ɣar iǧa ȓḥaqq aḏ irzem Lkitab-a aḏ ikkes icemmaƹen nnes?"

³Uȓa ḏ ijjen deg ujenna niɣ ḏi ṯmurṯ niɣ swadday i ṯmurṯ war izemmar aḏ irzem Lkitab-a niɣ aḏ ixzar min ḏayes.

⁴Truɣ[7] aṭṭas ȓaḥeqqac war ufin ḥadd aḏ isḏaheǧ aḏ irzem Lkitab-a aḏayes ixzar.

⁵Ȓexddenni indeq-d ijjen zeg imɣaren nni inna-ayi: "War tru ca! Aqa irbeḥ ssbaƹ nni ig iǧan zi Ayṯ-Yahuḏa lʼaṣel nnes zi Dawed, izemmar aḏ irzem Lkitab-a aḏ ikkes icemmaƹen nni s sebƹa."

⁶Ṯumma ṭṭarf i lƹarc-a, ḏi ȓwesṭ n arbeƹa n lmexluqaṯ nni ḏ imɣaren nni, ẓriɣ ḏinni ijjen n Yizmar ibedd walakin itban-d axmi ṯ nɣin. Ɣares sebƹa n waccawen[8] ḏ sebƹa n ṯiṭṭawin. Niṯni ḏ sebƹa n arruḥaṯ n Arebbi ig issekk ɣar marra ddunect-a.

⁷Yusa-d iysi Lkitab-a zeg ufus afusi n wenni iqqimen x lƹarc.

⁸Wami iysi Lkitab-a, lmexluqaṯ nni s arbeƹa ḏ arbeƹa u ƹicrin n imɣaren nni sejjḏen-as i Yizmar. Mkuȓ ijjen zzaysen ɣares ṯgambrit ɣares ṯimejmarin ggin-ṯent s ddheb ƹemmarent s tbaxur, iƹni ḏ ṯẓaǧiṯ n ȓmuminin ṣṣaliḥin.

⁹Tɣennajen s yijjen n yizȓi ḏ jḏiḏ qqaren: "Ḏ cek iy isḏaheǧen aḏ teysiḏ Lkitab aḏ terzmeḏ icemmaƹen nnes, ȓaḥeqqac twaɣarṣeḏ, ṯesnejmeḏ iwḏan i Arebbi s iḏammen nnec zi mkuȓ ȓqum ḏ lluɣa ḏ ccaƹb ḏ ȓgens.

¹⁰Ṯeggiḏ zzaysen ijjen n lmemlaka n ȓfuqaha i Arebbi nneɣ, aḏ ḥekkmen ḏi ṯmurṯ."

¹¹Ṯumma xzareɣ, sȓiɣ i ṯmijja n waȓaf n uȓufaṯ ḏ milyun n milyunaṯ n lmalaʼikaṯ tennḍent-as-d i lƹarc ḏ lmexluqaṯ ḏ imɣaren.

¹²Qqarent s jjheḏ: "Izmar itwanɣen isḏaheǧ ṯizemmar ḏ wagȓa ḏ lḥikma ḏ jjheḏ ḏ uweqqar ḏ lƹaḍama ḏ lḥamed."

¹³Ṯumma sȓiɣ i kuȓ lmexluq iǧan ḏeg ujenna ḏ ṯmurṯ ḏ swadday i ṯmurṯ ḏ ȓebḥar ḏ marra min ḏaysen qqaren-asen i wenni iqqimen x lƹarc uȓa ḏ Yizmar: "Aɣarwem yiȓi lḥamed ḏ uweqqar ḏ lƹaḍama ḏ ȓeḥkam i ȓebda n ȓebdaṯ!"

¹⁴Lmexluqaṯ nni s arbeƹa qqaren: "Amin!" Rekƹen imɣaren nni aḏ sejjḏen.