Read Tarifit Lwaḥi 7 Bible Online

Lwaḥi 7 - Tarifit bible

Lwaḥi 7

¹Menbaƹd i manaya ẓriɣ arbeƹa n lmalaʼikaṯ beddent x arbeƹa n ṯɣemmura n ṯmurṯ, ṭṭfent arriḥ x arbeƹa n jjihaṯ n ṯmurṯ ḥima war itṣuḍ ca x ȓbarr uȓa x ȓebḥar uȓa x ȓcejjur.

²Ẓriɣ ijjen n lmalak nneɣni itgaƹƹaḏ-d zi ccarq iysi-d ṭṭabaƹ n Arebbi iddaren, iȓaɣa s yijjen n ṯmijja ṯejheḏ i arbeƹa n lmalaʼikaṯ nni ṯinni umi immuc jjheḏ ḥima aḏ ḍeyyƹent ȓbarr ḏ ȓebḥar.

³Inna-asent: "War tḍeyyaƹent ni ȓbarr ni ḏ ȓebḥar ni ḏ ȓcejjur ḥetta ɣa neḍbaƹ ṯanyarṯ[9] n yinni iƹebbḏen Arebbi."

⁴Sȓiɣ i mecḥaȓ itwaḍebƹen: Miyya u arbeƹa u arbeƹin aȓaf zi marra ṯiqebbaȓ n Ayṯ-Israʼil.

⁵Ṯenƹacar aȓaf zi Ayṯ-Yahuḏa, ṯenƹacar aȓaf zi Ayṯ-Rabin, ṯenƹacar aȓaf zi Ayṯ-Jad,

⁶ṯenƹacar aȓaf zi Ayṯ-Ƹacur, ṯenƹacar aȓaf zi Ayṯ-Naftali, ṯenƹacar aȓaf zi Ayṯ-Manasi,

⁷ṯenƹacar aȓaf zi Ayṯ-Cimƹun, ṯenƹacar aȓaf zi Ayṯ-Lawi, ṯenƹacar aȓaf zi Ayṯ-Cakir,

⁸ṯenƹacar aȓaf zi Ayṯ-Zafulun, ṯenƹacar aȓaf zi Ayṯ-Yusef, ṯenƹacar aȓaf zi Ayṯ-Benyamin.

⁹Menbaƹd i manaya xzareɣ, twaȓiɣ aṭṭas n ȓɣaci bȓa ȓeḥsab zi mkuȓ ȓgens ḏ ȓqum ḏ ccaƹb ḏ lluɣa, bedden zzaṯ i lƹarc ḏ zzaṯ i Yizmar ggin čammir ḏ acemȓaȓ, ḏeg ifassen nsen ṯaseṭṭa n tmar.

¹⁰Snekkaren ṯɣuyyeṯ s jjheḏ qqaren: "Arebbi nneɣ ig iqqimen x lƹarc netta ḏ Yizmar ɣarsen ṯizemmar aḏaneɣ snejmen."

¹¹Marra lmalaʼikaṯ beddent nnḍent-id i lƹarc ḏ imɣaren ḏ arbeƹa n lmexluqaṯ nni. Hwant x uɣembub nsent zzaṯ i lƹarc sejjḏent i Arebbi.

¹²Qqarent: "Amin! Lḥamed ḏ lƹaḍama ḏ lḥikma ḏ ccuker ḏ uweqqar ḏ ṯzemmar ḏ jjheḏ i Arebbi nneɣ i ȓebda n ȓebdaṯ. Amin!"

¹³Inna-ayi yijjen zeg imɣaren-a: "Ma ṯessneḏ yiwḏan-a iy ggin čammir ḏ acemȓaȓ min ƹnan ḏ manis d usin?"

¹⁴Jawbeɣ-ṯ nniɣ-as: "Ḏ cek iy issnen a Siḏi." Inna-ayi: "Yina ḏ yinni inejmen zi ȓmiḥneṯ ṯameqqrant, ṣebbnen ičammiren nsen s iḏammen n Yizmar arrin-ṯen ḏ icemȓaȓen.

¹⁵S manaya aqaṯen zzaṯ i lƹarc n Arebbi, ƹebbḏen-ṯ ǧiȓeṯ ḏ nhar ḏi ṯemziḏa ṯameqqrant nnes. Wenni iqqimen x lƹarc aṯen iḥḍa.

¹⁶War tȓizin war tfiḏin, war ṯen tsecmiḍ ṯfuct uȓa ḏ ȓeḥmu.

¹⁷Ȓaḥeqqac Izmar iy iǧan ḏi ȓwesṭ n lƹarc aṯen yarwes, aṯen yawi akiḏes ɣar mani ǧan ȓaƹnaṣer n waman n ṯuḏarṯ. Arebbi aḏ imseḥ kuȓ ameṭṭaw zi ṯiṭṭawin nsen."