Read Tase Naga VPHAUNGC VYAUNGC 18 Bible Online

VPHAUNGC VYAUNGC 18 - Tase Naga bible

VPHAUNGC VYAUNGC 18

¹Yehowa kuex Mamre wawc vsawc pulx jungx htenc httax yaq baung maq Abraham muex kvkhic kaz tueq. Abraham kuex shalx kawc hvlc baunglaung vtap kvlc nuex ngaungc hvt maq,

²piq rueq lawc koq tueq miq wathuimx jvp yaq kuex khiz tueq. Piq rueq tsuingthuimx kuex khiz vtueq vhumc kay piq kvtenc yuz kaz tueq. Piq kuex vhtvlx ghaq nuex httuiuc laz bumx vtueq,

³piq rueq, “Jiyungx waz tamx lex, ngvy yuimx gay shec ruiux nauk lvy wvnc kaz; ngaz kuex nuimhez muex shuimc lvmc kuy muex vyuq httax vtaungx.

⁴Nuimhez yaz hoalc muex yuix lvmz laq raungx; pulx jungx yaz vyuq nyec tvkuiyq wuez shuinz.

⁵Nuimthuimx muex phuiuz vsvy raungluingx lvmz laq raungx; kvkhoc ngoz ruiux jix rawz hung vtueq lvmx khuemx lot tuinx. Nuimthuimx hez kuex kvruex laung nuex ngvy yuimx nuex httuiuc kaz ruinx rvtueq, kvkhoc rvtueq ngaz rueq nuimhez muex joalc moalc tv-phauk saq ix,” ngoz tueq jungx tueq. Tsuinghez rueq, “Kejux vyungx; nuiyhez rueq muinz lvp wvnc shix,” ngoz tueq tvralc tueq.

⁶Abraham kuex tap mungx nuex lvmx lvy waung vtueq Sara muex, “Vhvlx pinhtumc wungwanx htungc kuex lvwvnz lvmz vtueq wvyvmc kuex wanx muex tep shuiuz,” ngoz tueq jungx tueq.

⁷Kvruex yimaq piq kuex manx phungc httax yaq kvyuq yuz kaz vtueq vgvnz vhvlx manx saz vshiz kuex lvp wvnc vtueq bomc nvrc waz muex kuq tueq; kvruex htat htat tvhungx htaungx tvkoc nvr tueq.

⁸Piq rueq kiauc, manx puix nuiyc jac wvy kuex wuinz waz hez khaungkac nuex tvhungx tvyoalc tueq. Piq yauk maq tsuingthuimx muex pulx jungx yaz nuex phuiuz vsvy tvhungx kuy ningkhvnc nuex tsuingthuimx rueq phauk saq wuez tueq.

⁹Tsuingthuimx rueq, “Mtaungx nyuiuz Sara kuex m-yuq lac?” ngoz tueq wiz tueq. “Piq tap mungx nuex,” ngoz tueq tvralc tueq.

¹⁰Tsuinghez kvwawc washiz rueq, “Majuiuc vmaq yapix lex tvkuiuz[21] httax ruiux yuq ngaz yek kaz yek raungx, kvkaq mtaungx nyuiuz Sara rueq vsaz jawx shuex,” ngoz tueq jungx tueq. Kvkaq Sara kuex kvruex waz yix tvnungx kox tap kaluix maq tay tueq.

¹¹Abraham nuiyc Sara kuex sungc vkawc shex ningkhvnc nuex Sara kuex khvysvmc muinz vthauk kay wuez shex.

¹²Kvkhoc rvtueq Sara rueq, “Ngaz kuex wikuiux hungc vlaungc muinz vguez shex, vwoalc naungc roc thuinz httax yek tuex haz? Itaungx waz muinz likawx shex,” ngoz tueq tvmaung vtueq nueyx tueq.

¹³Kvruex yimaq Yehowa rueq Abraham muex ngoc, “Sara rueq ‘Ngaz kuex wikuiux shex suiuz vsaz kuex lvp lot shaungx haz?’ ngoz tueq yvmx khoc lac nueyx yaq nguinx?

¹⁴Yehowa rueq lot muq phvnx vhttax haz? ngoz tueq wiz tueq. Ngaz rueq jungx tauk rulc rv-ngvlc yix maq yapix lex tvkuiuz htvmx ruiux ngaz yek kaz raungx, kvkaq Sara rueq vsaz miqwaz saz lvp shuex,” ngoz tueq jungx tueq.

¹⁵Sara kuex vhiz raz tueq, “Ngaz nueyx mauk doc,” ngoz tueq khawx tueq. Piq rueq, “Mnoz vsuing nueyx toq,” ngoz tueq tvralc tueq.

¹⁶Kvruex yimaq tsuingthuimx kuex kaz wvnc vtueq Sodom ghaq kvkhic yaq baung nuex httuiuc kaz tueq, Abraham muinz tsuingthuimx shvlc tvy kay kaz naungx tueq.

¹⁷Yehowa rueq, “Ngaz rueq shuimx vshaungx yauk shuimc kuex Abraham muex duimx puiuc shaungx rvmuq.

¹⁸Piq suiuz vsaz htenc kuex yungx luz wvnc vtueq hungc vlaungc mvrc yaq miqphvnx muex yaungx wvnc tuex, piq ningkhvnc nuex miqphvnx lotlaz muex ruimruimx kuq shaungx.

¹⁹Piq kuex vsaz hez nuiyc vsuiuz vsaz htenc rueq ngvy kvjaz kuex tay phvnx vtueq vlvmx nuiyc tvrac vlvmz yauk shuimc shuimx shuex lvmz nuex piq rueq nvrc lvp tvkoc ngaz rueq piq kuex thvl wvnc tauk. Ekvkhoc tsuingshiq rueq tay phvnx ruiux yuq, ngvy bomkhvmc rulc rv-ngvlc piq rawc nuex phvnx ruip saz kuex ngaz rueq shuimx kuq shaungx,” ngoz tueq kvmungx tueq.

²⁰Kvruex yimaq Yehowa rueq Abraham muex, “Sodom nuiyc Gomorra muex mvrax nyvnc yaq kuex miqhiz vsac nuiyc tsuingshiq mvrax muinz yunghvlc httax yaq.

²¹Ngaz rueq tay vshaungx mvrax tvgurc yaq lvmx htenc kuex vyaq shuex vlvmx lac tuiuz lot tvkoc httoarc helc kaz taungx,” ngoz tueq jungx tueq.

²²Kvruex wathuimx kvwawc wanueyc kuex Sodom kox nuex kaz wvnc tueq, yuq muinz Yehowa kuex Abraham rulc dvyx kvjungx kaz tueq.

²³Abraham kuex Yehowa kox nuex kvnvp kaz vtueq, “Mnoz rueq mvrax vguez miqsaz kuex mvrax vhttax miqsaz rulc vdvmz nuex vsuing tvbac gay haz dvnc vshuiux?

²⁴Mkhoc shoc maq ghaqyungx kvyuq mvrax vguez miq warok bv-ngac httax ruiux yuq; kvruex ghaqyungx wvghaq pumz kuex tvbac gay shuiux haz? Kvruex warok bv-ngac kuex tvmaung vtueq ghaqyungx kuex tvbac gay muq maq dvyx mvy muq haz?

²⁵Mnoz rueq mvrax vguez jix miq kuex mvrax vhttax jix miq rulc roc nuex thvt gay shuiux rvmuq! Mnoz rueq kvkhoc kuex ruez shuiux rvmuq. Mnoz rueq kvkhoc ruez ruiux yuq, mvrax vguez miqsaz kuex mvrax vhttax miqsaz rulc vdvmz murx gurc rvhumc tuex. Kvkhoc kuex rvmuq. Ghaq lotlaz muex khac phoc jix waz rueq tvrac vlvmz maq phox kuq shuex rvtueq,” ngoz tueq wiz tueq.

²⁶Yehowa rueq, “Sodom nuex mvrax vguez miqsaz warok bv-ngac ngaz rueq humc ruiux yuq, tsuingshiq ningkhvnc nuex wvghaq tuimx tvjungx gay shaungx,” ngoz tueq tvralc tueq.

²⁷Abraham rueq laukshiz hulawx, “Yehowa lex, mnoz muex khvmc thuinz httaz hvlc maq jungx thvt phaungx lvmx kuex mvrax nauk tvtsuingc kuq vkueq. Ngaz kuex miqsaz washiz rvtauk ningkhvnc nuex, yvmx jungphvnc vkhangx muinz lvp mauk waz rvtauk.

²⁸Yuq muinz mvrax vguez miq warok bv-ngac httax muq yuq muinz warok bvlic rac waz bv-ngac kuex httax tuex shvmx. Kvkhoc waz bv-ngac komc kaz ruiux hux mnoz rueq wvghaq tuimx tvbac gay shuiux haz?” ngoz tueq jungx yek tueq. Yehowa rueq, “Mvrax vguez miq warok bvlic rac waz bv-ngac httax ruiux yuq, ghaqyungx kuex tvbac gay mauk,” ngoz tueq tvralc tueq.

²⁹Abraham rueq laukshiz hulawx, “Mkhoc shoc maq rok bvlic dvyx httax ruiux hux,” ngoz tueq wiz yek tueq. Yehowa rueq, “Rok bvlic httax ruiux yuq kuex ngaz rueq tvbac gay mauk,” ngoz tueq tvralc tueq.

³⁰Abraham rueq, “Yehowa lex, thuinz nauk khaq kaz, yuq muinz laukshiz hulawx jungx yek ix. Mvrax vguez miq rok thuimx httax ruiux yuq, ghaqyungx kuex tvbac gay shuiux haz?” ngoz tueq wiz tueq. Vpiq rueq, “Mvrax vguez miq rok thuimx humc ruiux kuex tvbac gay mauk,” ngoz tueq jungx tueq.

³¹Abraham rueq, “Yehowa lex, ngaz rueq khvmc thuinz httaz hvlc maq jungx thvt phaungx vruex mvrax nauk tvtsuingc kuq vkueq. Mvrax vguez miq roknueyc dvyx httax ruiux yuq hux,” ngoz tueq wiz tueq. Vpiq rueq, “Mvrax vguez miq roknueyc humc ruiux yuq, ghaqyungx kuex ngaz rueq tvbac gay mauk,” ngoz tueq jungx tueq.

³²Abraham rueq laukshiz hulawx, “Yehowa lex, thuinz nauk khaq kaz, ngaz rueq tumc shiz rac jungx yek ix. Mvrax vguez miq rokshiz dvyx httax ruiux yuq, ghaqyungx kuex tvbac gay shuiux haz?” ngoz tueq jungx yek tueq. Vpiq rueq, “Mvrax vguez miq rokshiz httax ruiux yuq, ghaqyungx kuex tvbac gay mauk,” ngoz tueq jungx tueq.

³³Yehowa kuex Abraham rulc rvbomc lot rac waung wvnc tueq, Abraham muinz vyuimx nuex yek waung tueq.