Read Tase Naga VPHAUNGC VYAUNGC 20 Bible Online

VPHAUNGC VYAUNGC 20 - Tase Naga bible

VPHAUNGC VYAUNGC 20

¹Abraham kuex Mamre hong maq Kanaan mungx ghaqyaz kox nuex luiuz kay yix, Kadesh ghaq nuiyc Shur ghaq hvlwvl hong nuex httax tueq. Kvruex yimaq Gerar nuex httax tueq baunglaung,

²piq rueq vtaungx nyuiuz Sara kv-ngoc vshvlx nyuiuz ngoz tueq. Kvkhoc rvtueq Gerar hokhvmx Abimelek rueq Sara kuex lvmz tueq.

³Raungwvrx shiz nuex Tishox kuex piq muex kvkhic kaz vtueq, “Miq rueq lvmc yoalx shex vruex nyuiuz kuex mnoz rueq shvlx wvnc toq khuec nuex mnoz vthueyc rvtuiux,” ngoz tueq jungx tueq.

⁴Yuq muinz Abimelek kuex Sara rulc max woalc naungx shauk dvyx ningkhvnc nuex piq rueq, “Yehowa lex, ngaz kuex yaq mauk doc! Ngaz nuiyc ngvy miqsaz htenc kuex tvbac gay haz dvnc vphux?

⁵Abraham rueq ngoc vshvlx nyuiuz ngoz tueq jungx phuex, piq rueq muinz Abraham kuex vyungx waz ngoz tueq jungx phuex. Ngaz rueq kuex vhvlx lvmx maq raz tueq vkhoc kvmungx gay tauk, yuq muinz yaq mauk doc,” ngoz tueq jungx tueq.

⁶Piq maung nuex Tishox rueq, “Mnoz rueq vhvlx lvmx maq raz tueq vkhoc kvmungx gay toq lvmz kuex ngaz rueq tuiuz yaq; kvkhoc rvtueq mnoz rueq ngaz muex yaq gay muq tvkoc yalxjuik nyuiuz kvruex rulc nauk yaq kaz ngoz tueq ngaz rueq tvwanc vphaungx.

⁷Majuiuc muinz, kvruex nyuiuz kuex vtaungx waz kox nuex tvyek shuiuz. Piq kuex shvmmax waz rvtueq ningkhvnc nuex mnoz thueyc muq tvkoc piq rueq mnoz muex vjux thoz kuq kv-phux. Yuq muinz kvruex nyuiuz kuex tvyek muq ngoz ruiux kuex mnoz nuiyc mmiqsaz lotlaz thueyc tuinx,” ngoz tueq tvralc tueq.

⁸Nvp yix raungnuiyq raungnvp samaq Abimelek rueq piq miq vyungx vlaungx bix htenc kuex gvl vtueq, yaungx wvnc tueq lvmz htenc kuex jungx kuq koq tueq, tsuinghez kuex hiyaz kawc yawc wuez tueq.

⁹Kvruex yimaq Abimelek rueq Abraham kuex gvl vtueq, “Mnoz rueq nuiyshiq muex yvmx lac rvtonx? Mnoz muex ngaz rueq yvmx yaq kuy ningkhvnc nuex lac ngaz nuiyc ngvy mungtan nuex kuilc daz jamjaux kuex tvhttuiuc kuq vphux? Uraq muinz shuimc aungx muq yauk shuimc mnoz rueq ngaz muex ruez kuq vphux.

¹⁰Mnoz rueq yvmx ngoz tueq lac vkhoc ruez vshuiux?” ngoz tueq wiz tueq.

¹¹Abraham rueq, “Vruex hong wawc miq htenc kuex Tishox muex hiyaz wuez muq, itaungx nyuiuz kuex nyvlc wvnc tvkoc ngaz kuex thvt gay phuex, ngoz tueq tvmaung tauk.

¹²Piq kuex rvkhauk laz ishvlx nyuiuz rvtueq. Nvnueyc waz kuex vshiz dvyx, piq kuex pungnyuiuz saz, ngaz rueq vlvmz muinz rvtueq.

¹³Kvkhoc rvtueq Tishox rueq ngaz kuex iwaz yuimx maq mungtan vganc nuex tvkaz kay phuex kvkaq, ngaz rueq piq muex ngoc, ‘Mnoz rueq ngaz muex tvmtuing tvkhic tvkoc naungnueyc httuiuc wvnc tix baung ruip saz kvyuq, ngaz kuex mphux rvtueq ngoz tueq jungx shuiuz,’ ngoz tueq jungx tauk,” ngoz tueq.

¹⁴Kvruex yimaq Abimelek rueq Sara kuex Abraham muex yez kuq tueq, Abraham muex khelbuenx, manx nuiyc dax htenc muinz kuq tueq.

¹⁵Piq rueq Abraham muex ngoc, “Vruex ngvy mungtan rvtueq; mnoz rueq roc shuiux baung nuex httax kuiuz,” ngoz tueq jungx tueq.

¹⁶Piq rueq Sara muex, “Mnoz yaq muq lvmx mkung mkamz jix hez rueq tuiuz tvkoc hakhix muex m-yaungx kueq, ngaz rueq mphux muex kuimphox hingshiz kuq vshaungx; mnoz rueq mvrax yvmx muinz yaq muq lvmz uraq muinz mtuiuz wvnc shueq,” ngoz tueq jungx tueq.

¹⁷Abraham taungnyuiuz Sara nyvlc wvnc ningkhvnc nuex Abimelek hoc nuex httax yaq yalxjuik rulx htenc kuex suiuz vsaz lvp muq tvkoc Yehowa rueq rvgay tueq. Kvkhoc rvtueq Abraham rueq Abimelek tvkoc Tishox kox wawc vjux thoz kuq koq tueq, piq muex muinz vtaungx nyuiuz nuiyc vdax nyuiuz hez muex muinz Tishox rueq tvhvlc kuq koq tueq, tsuinghez rueq vsaz htenc lvp wvnc wuez tueq.