Read Tase Naga VPHAUNGC VYAUNGC 22 Bible Online

VPHAUNGC VYAUNGC 22 - Tase Naga bible

VPHAUNGC VYAUNGC 22

¹Kvruex yimaq Tishox rueq Abraham kuex taruiyx tueq; vpiq rueq, “Abraham!” ngoz tueq gvl koq tueq Abraham rueq, “Ayc, ngaz vyuq luez!” ngoz tueq tvralc tueq.

²Tishox rueq, “Mnoz rueq pinhtumc lungwawx vshuiux msaz Esak kuex shvlx wvnc vtueq Moria mungx nuex waung kuiuz. Ngaz rueq tvkhic phaungx kanx htauk kvmaq piq kuex shomc nawk kuy juing muex tvyaungc vtueq ngaz muex shomc kuq koq,” ngoz tueq jungx tueq.

³Nvp yix raungnuiyq raungnvp samaq Abraham rueq shomc nawk kuy tvkoc janx kuex htuimx vtueq loze htauk nuex tvdaungc ruiux, Esak nuiyc nvrc waz wanueyc kuex gvl wvnc vtueq, Tishox rueq jungx tueq baung kvyuq tvtsuingc vtueq kaz wvnc tueq.

⁴Raungnuiyq thuimx vngoz raungnuiyq Abraham rueq kvruex baung kuex vluz maq khiz tueq.

⁵Kvruex yimaq nvrc waz hez muex ngoc, “Nuimnueyc kuex vyuq lawx loze kvrulc vdvmz httax laz nguinz. Nvnueyc saqwaz kuex nuex kvruex baung kvyuq waung vtueq Tishox muex nawk palx kuy lot yix jix nuimnueyc kox nuex yek kaz rix,” ngoz tueq jungx shec tueq.

⁶Abraham rueq shomc nawk kuy tvkoc janx kuex Esak muex tvpic ruiux, piq rueq yaung nuiyc wvr tvsauz muex wvrhtaq kuex lvmz wvnc tueq. Tsuingnueyc vdvmz nuex waung yaq lvmx maq,

⁷Esak rueq, “Iwaz lay!” ngoz tueq gvl tueq. Piq rueq, “Yvmx lac isaz?” ngoz tueq tvralc tueq. Esak rueq, “Iwaz kox nuex wvr muinz vhttax, janx muinz vhttax, shomc nawk kuy juing khelbuenx saz kuex m-yuq lac tax?” ngoz tueq wiz tueq.

⁸Abraham rueq, “Tishox vpiq rueq phvnx shishiz tvhungx kuq phuex,” ngoz tueq tvralc tueq. Kvruex yimaq tsuingnueyc kuex vdvmz nuex khuemx wvnc yek tueq.

⁹Tishox rueq tvkhic kuq tueq baung kvyuq httuiuc waung vtueq, Abraham rueq shomrawx kuex tvhungx ruiux, janx kuex shomrawx htauk nuex phungc tueq. Vsaz kuex khvrc vtueq janx phungc htauk kvyuq tvwoalc tueq.

¹⁰Kvruex yimaq vsaz kuex thvy gay muex yaung kuex lvmz tueq.

¹¹Yuq muinz Yehowa raungkamx waz rueq, “Abraham, Abraham!” ngoz tueq raungx maq gvl tueq. Piq rueq, “Ayc, ngaz vyuq luez,” ngoz tueq tvralc tueq.

¹²Raungkamx waz rueq, “Nox kvruex nauk tuingc kaz, piq kuex yvmx muinz nauk ruez kaz. Msaz washiz lauklauk kuex vpiq muex kuy tvkoc mnoz rueq tvlvlc muq rvtoq ningkhvnc nuex, Tishox muex mnoz hiyaz tvtsanc nganc vtueq tay phvnx vshuiux kuex majuiuc ngaz rueq tuiuz tauk shex,” ngoz tueq jungx tueq.

¹³Abraham rueq kvroz lawc koq tueq, rumz ruix nuex vrungx maq kvrx thuiyc yaq khelbuenx pung vshiz kuex khiz tueq. Piq kaz vtueq khelbuenx pung waz kuex het wvnc vtueq, vsaz pumhttungx wvr maq jauk shomc kuq tueq.

¹⁴Abraham rueq kvruex baung kv-ngoc, “Yehowa rueq vtvyoalc[28] kuq,” ngoz tueq muingc tueq. Majuiuc nuex httuiuc laz miq rueq, “Kanx nuex Yehowa rueq tvyoalc kuq tueq,” ngoz tueq ngoz wuez ruiux yaq.

¹⁵Yehowa raungkamx waz rueq raungmungx maq Abraham kuex lauk nueyc ngoc yaungc gvl vtueq,

¹⁶“Ngaz rueq ngvy muingc maq kvtuemc vtueq Yehowa rueq jungx yaq vruex yauk shuimc kuex mnoz rueq shuimx kaz vtueq msaz vshiz lauklauk saz kuex ngaz muex kuy khvnnyvnx muq ningkhvnc nuex ngaz rueq mnoz muex hunghtaungx laz ruimruimx kuq phaungx,

¹⁷msuiuz msaz htenc kuex raungwawc ruiysuiyq htenc, rvmuq ngoz ruiux svmuktvrax kawx wawc kumtsvy htenc ikhoc ngaz rueq mnoz muex kuq phaungx. Msuiuz msaz htenc rueq tsuingshiq ralx htenc kuex khvt taungx gay shuex.

¹⁸Mnoz rueq ngvy kvjaz kuex phvnc ningkhvnc nuex msuiuz msaz htenc rueq ruimrix lvp shuex kvkhoc, miqphvnx ruip rawx rueq tsuingshiq muex ruimrix kuy tvkoc ngaz muex wiz wuez phuex,” ngoz tueq jungx tueq.

¹⁹Kvruex yimaq Abraham kuex nvrc waz nueyc kox nuex yek kaz vtueq, tsuinghez kuex miqmac httaz juing Bersheba nuex vdvmz yek waung wuez tueq.

²⁰Vkhing loayc hvlc lvy wvnc tueq yix maq Abraham rueq vnox Nahor taungnyuiuz Milka rueq vsaz waz tvjvt lvp tueq lvmz tay tueq.

²¹Vsaz hez kuex pekhux waz Uza, Buza, Aram waz Kemuel,

²²Kesed, Hazo, Pidash, Jidlap nuiyc Bethuel rvtueq,

²³Bethuel kuex Rebeka muex vwaz rvtueq. Abraham nox Nahor taungnyuiuz Milka rueq miqwaz sahez waz tvjvt jawx tueq.

²⁴Rema kuex Nahor taungnyuiuz nyuiuz ruinx jix rvtueq, Rema sahez kuex Teba, Gaham, Tahash nuiyc Maaka rvtueq.