Read Tase Naga VPHAUNGC VYAUNGC 23 Bible Online

VPHAUNGC VYAUNGC 23 - Tase Naga bible

VPHAUNGC VYAUNGC 23

¹Sara kuex rullungx wawc 127 nuex httuiuc laz httax tueq.

²Piq kuex Kanaan mungx Hebron ghaq maq thueyc kaz vtueq Abraham kuex yonzyex khoar tueq.

³Abraham kuex vtaungx nyuiuz maungx tvwoalc tueq kvwawc kvtenc vtueq Hitti miqsaz kox nuex kaz tueq,

⁴“Ngaz kuex nuimshiq kox nuex wuinz waz httaz dvyx httax vtaungx; itaungx nyuiuz maungx kuex luip muex ghaqphux baungshiz shaung kuq kuit,” ngoz tueq jungx tueq.

⁵Tsuingshiq rueq muinz,

⁶“Walaungx waz lex, nuiyshiq kvjaz kuex tay kuq koq. Mnoz kuex nuiyshiq nuex hungc vlaungc vhttax walaungx rvtoq; nuiyshiq luip ruiuz khux vhvlx pinhtumc baung nuex mtaungx nyuiuz maungx kuex luip shuiuz. Piq maungx luip tvkoc luip ruiuz khux kuex nuiyshiq rueq vkoz vkez maq kuq phix,” ngoz tueq tvralc tueq.

⁷Kvruex yimaq tsuingshiq khaungkac nuex Abraham kuex bumx vtueq,

⁸“Vruex baung vyuq itaungx nyuiuz maungx kuex luip muex nuimshiq rueq tay kuq ruiux kuex, kejux maq Zohar saz Ephron ghaqphux tvsuip nuex httax yaq,

⁹Makpela Ghaqluix kuex ngaz muex shaungc kuy tvkoc jungx kuq wuez kuit. Luip ruiuz khux baungshiz ngaz rueq lvp tvy shec tvkoc ghaqphux htawz vrawz aungx tuex tanc khvnc maq nuimshiq khaungkac nuex ngaz muex mshaung kuq phueq,” ngoz tueq jungx tueq.

¹⁰Ephron piq muinz vganc jix Hitti miqsaz rulc vdvmz ghaqyungx kaluix hep nuex rvtuimx yaq kvyuq ngaungc iruiux rvtueq; lotlaz rueq tay yaq nuex piq rueq tvralc tueq kuex,

¹¹“Walaungx waz lex, tay shuiuz; ghaqluix kvrulc nongx ghaqphux kvmuinz kuq phaungx. Mtaungx nyuiuz maungx kuex luip muex nuiyshiq phvnx vmaq miqsaz khaungkac nuex ngaz rueq mnoz muex kvruex kuq vphaungx,” ngoz tueq tvralc tueq.

¹²Yuq muinz Abraham kuex Hitti miqsaz khaungkac nuex bumx vtueq,

¹³miq lotlaz rueq tay laz juing Ephron muex ngoc, “Ngaz rueq tvtay jungx vphaungx kuex tay shuiuz. Ngaz rueq wvghaq phux tuimx ruiyx shaungx. Ghaq phux htawz vrawz kuex lvmz taq shuiuz, itaungx nyuiuz kuex kvruex ghaqphux kvyuq luip shaungx,” ngoz tueq jungx tueq.

¹⁴Ephron rueq tvralc tueq kuex,

¹⁵“Walaungx waz lex, ghaqphux htawz vrawz kuex kuimphox sawx shac bvlic aungx yaq, kvruex kuex mnoz nuiyc ngaz muex mjuc muinz rvmuq, mtaungx nyuiuz kuex luip shuiuz,” ngoz tueq.

¹⁶Abraham kuex raz naungx vtueq nuk waz khaungkac nuex Ephron rueq vhtawz vrawz htvp htaz tueq kuimphox shac bvlic kuex pvkac pvylvyc jix rueq shenc yaq kaqpex maq shenc tueq.

¹⁷Kvkhoc raz tueq Mamre ghaq maq shaldungc kox, Makpela nuex httax yaq Ephron ghaqphux kuex Abraham ghaqphux muex yaungx wvnc tueq. Piq rueq guimz yaq ghaqphux nuex ghaqluix nuiyc ghaqphux kvyuq kemz yaq pulx jungx htenc, ghaqphux tvsuip nuex httuiuc laz kemz yaq pulx jungx htenc muinz lomx yaq.

¹⁸Kvruex yuq rvtuimx ngaungc yaq Hitti miqsaz htenc rueq ghaqphux kvruex kuex Abraham ghaqphux shex ngoz tueq htvp htaz kuq wuez tueq.

¹⁹Kvruex yimaq Abraham rueq vtaungx nyuiuz Sara maungx kuex Kanaan mungx wawc ghaqluix nuex luip tueq.

²⁰Kvkhoc rvtueq Hitti miqsaz rueq guimz yaq ghaqphux nuiyc ghaqluix kuex Abraham rueq guimz yaq luip ruiuz khux muex yaungx kaz tueq.