Read Tase Naga VPHAUNGC VYAUNGC 25 Bible Online

VPHAUNGC VYAUNGC 25 - Tase Naga bible

VPHAUNGC VYAUNGC 25

¹Abraham rueq vmuingc Ketura ngoz yaq nyuiuz kuex lvmz yek tueq.

²Kvruex nyuiuz rueq Zimran, Jokshan, Medan, Midian, Eshbak nuiyc Shua kuex jawx tueq.

³Jokshan saz miqwaz saz tamx kuex Sheba nuiyc Dedan rvtueq. Dedan suiuz vsaz htenc kuex Asshurim, Letushim nuiyc Leummim rvtueq.

⁴Midian saz miqwaz saz tamx kuex Epha, Epher, Hanok, Abida nuiyc Eldaa rvtueq. Lotlaz kuex Ketura suiuz vsaz htenc rvtueq.

⁵Abraham rueq piq hup vsvmx httax yaq tsak jungx htenc kuex Esak muex kuq tueq;

⁶yuq muinz piq tvraungx httax tueq baunglaung vtaungx nyuiuz vganc jix rulc vlvp vsaz hez muex muinz yauk noalc kuq tueq. Kvruex yimaq vganc jix rulc vlvp sahez kuex Esak rulc vluz, shaldungc mungx nuex tvhttax tueq.

⁷Abraham kuex rullungx wawc 175 nuex httuiuc laz kuiux kawx vtueq, raungx ghaq yapix mvrc yix vthuiuz thuic htumx vtueq vjix vwaz rvtuimx yaq nuex httuiuc waung vtuex.

⁹Vsaz hez Esak nuiyc Eshmael hez rueq Mamre ghaq maq shaldungc kox nuex httax yaq Hitti miqsaz Zohar saz Ephron rueq guimz wvnc tueq ghaqphux wawc Machpela ghaqluix nuex vwaz maungx kuex luip tueq.

¹⁰Ghaq phux kuex Hitti miqsaz kox wawc Abraham rueq vruiyx ghaqphux rvtueq; Abraham nuiyc vtaungx nyuiuz Sara tsuingnueyc kuex kvyuq luip tueq.

¹¹Abraham thueyc kay yix, “Ngvy Khic jix Rullungx Tvraungx Waz yuix Tumz,” hep nuex httax yaq Esak muex Tishox rueq ruimruimx kuq tueq.

¹²Abraham nuiyc Sara piq dax nyuiuz Ejip shvlx Hagar rueq vlvp saz Eshmael suiuz vsaz htenc kuex vkhoc rvtueq,

¹³Eshmael saz pekhux waz maq raz tueq nox yix tvsuip waz nuex httuiuc laz muingc htenc kuex: Nebaiot, Kedar, Adbeel, Mibsam,

¹⁴Mishma, Duma, Masa,

¹⁵Hadad, Tema, Jetur, Naphish nuiyc Kedema rvtueq.

¹⁶Tsuinghez kuex miqphvnx phvnx rokshiz rac phvnx nueyc jix vwaz tamx muex yaungx vtueq, tsuingshiq httaz juing miqghaq nuiyc kez htenc kuex tsuinghez muingc kvruex tv-phvnc muingc tueq.

¹⁷Eshmael kuex rullungx wawc 137 nuex thueyc tueq.

¹⁸Eshmael suiuz vsaz htenc kuex Ejip mungx shaldungc kox Asiria mungx nuex kay juing lvmx wawc Hawila ghaq nuiyc Shur ghaq hvlwvl hong nuex httax tueq. Tsuinghez kuex Abraham suiuz vsaz rulc pungbaung rvbaung nuex httax tueq.

¹⁹Vruex kuex Abraham saz Esak kuiux waungc mvnphvnc rvtueq.

²⁰Esak kuex rullungx wawc rok bvlic httuiuc tueq nuex Mesopotamia mungx wawc Aramean miqsaz Bethuel saz yalxjuik saz, Laban shvlx nyuiuz Rebeka kuex lvmz tueq.

²¹Rebeka rueq vsuiuz vsaz lvp muq ningkhvnc nuex Esak rueq Yehowa kox wawc piq tvkoc suiuz vsaz thoz tueq. Yehowa rueq piq vjux thoz bomc kuex tay kuq vtueq, Rebeka kuex wvgvnz yaungx wvnc tueq.

²²Piq wvgvnz kuex nox vpop sanueyc rvtueq, kvruex sanueyc kuex max jawx nuex dvyx vnyuiuz wuk mungx nuex vdvmz dvmz rvkhel toal tueq. Kvkaq Rebeka rueq, “Ngaz nuex yvmx rvtueq lac vkhoc yaungx kaz tvnx?” ngoz tueq Yehowa muex wiz kay kaz tueq.

²³Yehowa rueq Rebeka muex ngoc, “M-wuk nuex miqphvnx phvnx nueyc httax yaq; Vdvmz dvmz rvlongx palx jix miqphvnx phvnx nueyc kuex mnoz rueq jawx shuiux. Phvnx shiz kuex vganc phvnx shiz htauk nuex muinz hungc vlaungc httaz hvlc; Vphuz kuex vnox waz nvrc waz muex yaungx tuex,” ngoz tueq jungx tueq.

²⁴Rebeka kuex nox wuic khic httuiuc wvnc vtueq miqwaz sanueyc vpop kuex jawx tueq.

²⁵Vphaungc jawx tueq saz kuex vshvmx vshawx raz tueq vmul vhtvy ningkhvnc nuex Esaw[29] ngoz tueq muingc tueq.

²⁶Yix wawc jix saz rueq Esaw yaz htuimx kuex phaungx duing shuimx iruiux jawx tueq ningkhvnc nuex Yaku[30] ngoz tueq muingc tueq. Vsaz nueyc jawx tueq kvkaq Esak kuex rullungx wawc rok tvruk shex rvtueq.

²⁷Miqwaz sanueyc peluz wvnc vtueq, Esaw kuex rumz nuex khuemc jix shvrvyx muex yaungx tueq. Yaku kuex yuimx nuex kuiyqshuik httaz jix waz rvtueq.

²⁸Esak rueq Esaw kuex lungwawx yaq, yvmx khoc lac ngoz ruiux lec Esaw rueq ngvmx thvt shuex wawc ngvmx kuex phauk vtueq vthuinz hvlx yaq, yuq muinz Rebeka rueq Yaku kuex lungwawx yaq.

²⁹Raungnuiyq shiz Yaku rueq phejalx wvyshuiuz lumc thvt yaq nuex, Esaw kuex ngvmx thuiyc ruix maq httuiuc waung tueq. Piq kuex rvmc svy maungx kuiyq rvtueq,

³⁰Yaku muex ngoc, “Ngvy rvmc sac hvlc phejalx wvyshuiuz vshawx kuex ngaz phauk phaungx,” ngoz tueq thoz tueq. (Kvkhoc rvtueq piq kuex Edom[31] ngoz tueq gvl tueq.)

³¹Kvkaq Yaku rueq, “Pekhux muingc jungc kuex kuq ruiux yuq, wvyshuiuz kuex kuq phaungx,” ngoz tueq.

³²Esaw rueq, “Ngaz pat wvnc vtaungx; pekhux muingc jungc kuex ngvy tvkoc yvmx vjux lac httax yaq nguinx? Lvmz laq shuiuz!” ngoz kuq tueq.

³³Yaku rueq, “Kvkhoc ngoz ruiux kuex pekhux muingc jungc ngaz muex kuy tvkoc kungkhux kvtuemc kuiuz,” ngoz tueq tvralc tueq. Esaw kvtuemc vtueq piq pekhux muingc jungc kuex Yaku muex kuq gay tueq.

³⁴Kvruex yimaq Yaku rueq wanx nuiyc phejalx wvyshuiuz kuex piq muex kuq koq tueq, piq rueq phauk saq lot vtueq kaz wvnc tueq. Ekvkhoc Esaw rueq piq pekhux muingc jungc kuex wvlc guez tvyaungc gay tueq.