Read Tase Naga VPHAUNGC VYAUNGC 29 Bible Online

VPHAUNGC VYAUNGC 29 - Tase Naga bible

VPHAUNGC VYAUNGC 29

¹Yaku kuex piq kay juing lvmx phvnc kaz wvnc vtueq shaldungc kox mungx nuex tvtsuingc kaz wvnc tueq.

²Piq kuex tvnx nuex yuix tumz vshiz httax yaq kvruex tvroz nuex khelbuenx kungthuimx rueq tvkomc bumx yaq baung kvyuq dung phawk httuiuc kaz tueq. Khelbuenx kung htenc muex kvruex yuix tumz kvwawc yuix tvnuingc yaq, yuix tumz kvruex lungkuiux maq puingc shec tueq.

³Khelbuenx kung htenc yuix tumz hep kvyuq httuiuc kaz ruiux yuq jix, vremc jix hez rueq lungkuiux kuex tvhttot vtueq khelbuenx htenc muex yuix tvnuingc ruiux yaq. Kvruex yimaq tsuingshiq rueq lungkuiux maq yuix tumz kuex puingc gay shex ruiux shuex.

⁴Yaku rueq khelbuenx remc jix hez muex, “Phunox bix lex, nuimshiq kuex mbaung jix lac?” ngoz tueq wiz tueq. “Haran maq vkaz,” ngoz tueq tvralc tueq.

⁵Piq rueq, “Nahor suiuz Laban kuex tuiuz vshuinx haz?” ngoz tueq wiz tueq. “Tuiuz vshix,” ngoz tueq tvralc tueq.

⁶“Piq gvnhttuingc haz?” ngoz tueq wiz tueq. “Piq vhvlx httax yaq,” ngoz tueq tsuinghez rueq tvralc tueq. “Lawc shuiuz, khelbuenx kung goalx vtueq kaz yaq kuex vsaz Rakhel kvnauz,” ngoz tueq jungx tueq.

⁷Yaku rueq, “Shalx vluz doc khelbuenx htenc kuex tvtuimx goalc wvnc jauz max httuiuc doc, nuimshiq rueq yvmx khoc lac yuix kuq laq shuinx? Kvruex htenc kuex vwvsvy juing nuex goalx laq shuinz,” ngoz tueq tsuinghez muex ngoz tueq.

⁸Tsuinghez rueq, “Nuiyshiq rueq kvkhoc kuex ruez ruiux miq, khelbuenx kung lotlaz vyuq rvtuimx kaz ruiux yuq jix lungkuiux kuex tvhttot gay ruiux raz tueq khelbuenx htenc muex yuix tvnuingc ruiux shix,” ngoz tueq tvralc tueq.

⁹Yaku kuex khelbuenx remc jix hez rulc rvbomc yaq nuex, vwaz khelbuenx kung remc jix Rakhel kuex khelbuenx kung rulc vdvmz kaz thuiyc yaq.

¹⁰Yaku rueq vguz Laban khelbuenx kung rulc vdvmz Rakhel httuiuc kaz koq tueq, yuix tumz nuex kaz vtueq lungkuiux kuex tvbanc gay ruiux, khelbuenx htenc muex yuix tvnuingc tueq.

¹¹Kvruex yimaq piq rueq Rakhel kuex shup vtueq vkokez svy muex vkhoarc rvtueq.

¹²Piq rueq yalxjuik saz kvmac ngoc, “Ngaz kuex Rebeka saz, m-waz muex taungnyuing shauk rvtauk,” ngoz tueq jungx tueq. Rakhel kuex yuz wvnc vtueq vwaz muex jungx waung tueq.

¹³Laban rueq vgek Yaku thaungc tay lvp vtueq, vyuz vbaz kaz ruiux Yaku kuex vhtaq maq vgot shup vtueq vyuimx nuex shvlx wvnc tueq. Kvkaq Yaku rueq yaungx wvnc tueq lvmz htenc jungphvnx kuq koq tueq,

¹⁴Laban rueq, “Mnoz kuex ngvy tvguiy nuiyc ngvy ngvmx shauk rvtoq,” ngoz tueq jungx tueq. Yaku muinz vguz yuimx nuex yapix lex shiz httax tueq.

¹⁵Laban rueq Yaku muex ngoc, “Mnoz kuex ngaz muex taungnyuing shauk ningkhvnc nuex ngvy tvkoc mauk guez htawz guez maq shuimc kuy aungx muq. Mnoz rueq yauk mauk mjuc thoz roc lac?” ngoz tueq wiz tueq.

¹⁶Laban kox nuex vsaz nyuiuz nueyc httax yaq; vnyaz nyuiuz muingc kuex Lea, vnox nyuiuz muingc kuex Rakhel rvtueq.

¹⁷Lea kuex muik poz muik kuimx svp hvlc, Rakhel kuex vshauk vgvnz vkvraz maq svp hvlc rvtueq.

¹⁸Yaku rueq Rakhel kuex roc ningkhvnc nuex, “Rakhel kuex kuq ruiux yuq, iguz muex wawc mvshix yauk shuimx kuq phaungx,” ngoz tueq jungx tueq.

¹⁹Laban rueq, “Rakhel kuex vganc jix muex tvwaungc ngoc mvnx, mnoz muex kuq ruiux waz vhvlx nauz, ngaz rulc vdvmz httax ix,” ngoz tueq tvralc tueq.

²⁰Yaku rueq Rakhel lvmc tvkoc wawc mvshix yauk shuimx kuq tueq, piq rueq Rakhel kuex roc lvy ningkhvnc nuex kvtanc wawc kuex vlosaz ikhoc dvyx tvmaung tueq.

²¹Kvruex yimaq Yaku rueq Laban muex ngoc, “Raungnuiyq httuiuc tueq shex; msaz kuex ngaz muex kuq koq,” ngoz tueq jungx tueq.

²²Kvkhoc rvtueq Laban rueq miqlvmc moalx kuex tvhungx vtueq, kvruex moalx kvyuq miq lotlaz gvl tueq.

²³Yuq muinz kvruex raungwvrx Laban rueq Rakhel pumhttungx Lea kuex Yaku kox nuex tvwaung tueq, piq kuex Lea rulc woalc naungx tueq.

²⁴(Laban rueq piq dax nyuiuz Zilpa kuex Lea shvlix lawx kuy tvkoc kuq gay tueq.)

²⁵Raungwuix wvnc tueq nuex jix Yaku piq taungnyuiuz kuex Lea rvtueq lvmz tuiuz tueq. Piq kuex Laban kox nuex kaz vtueq, “Yvmx ngoz tueq lac kvkhoc guirguenz phux? Ngaz rueq Rakhel lvp tvkoc yauk shuimx kuq wvnc phaungx. Ngaz kuex yvmx ngoz tueq lac laulawc phux?” ngoz tueq jungx tueq.

²⁶Laban rueq, “Vruex hong vyuq pekhux nyuiuz miq muex max waung nuex vnox nyuiuz miq muex tvwaungc htungx vguez.

²⁷Raungx mvshix bvmc yek shuiuz, kvruex yimaq mnoz rueq ngaz muex wawc mvshix hulawx yauk shuimx kuq yek ruiux yuq kuex, mnoz muex Rakhel kuex kuq phix,” ngoz tueq jungx tueq.

²⁸Yaku muinz raz naungx tueq, miq lvmc raungx mvshix kuex htumx yix, Laban rueq vsaz Rakhel kuex Yaku muex kuq tueq.

²⁹(Laban rueq piq dax nyuiuz Bilha kuex Rakhel shvlix lawx kuy tvkoc kuq tueq.)

³⁰Yaku kuex Rakhel rulc woalc naungx tueq, piq rueq Lea htauk nuex Rakhel kuex vroc lanc rvtueq. Kvruex yimaq piq rueq Laban muex wawc mvshix yauk shuimx kuq yek tueq.

³¹Yaku rueq Lea roc muq lanc lvmx Yehowa rueq tuiuz vtueq, Lea muex suiuz vsaz tvlvp kuq tueq, yuq muinz Rakhel rueq vsaz lvp muq.

³²Mtanc httax muq nuex Lea kuex wvgvnz yaungx vtueq vsaz miqwaz saz jawx tueq. Piq rueq ngoc, “Yehowa rueq ngaz kuilc daz taungx vruex khiz kuq phuex, kvkhoc rvtueq itaungx waz rueq ngaz kuex lungwawx phuex,” ngoz vtueq nox kuex Ruben [34] ngoz tueq muingc tueq.

³³Lea kuex wvgvnz hulawx yaungx yek vtueq, vsaz washiz jawx yek tueq. Piq rueq ngoc, “Itaungx waz rueq ngaz roc muq lvmz kuex Yehowa rueq tuiuz vtueq, nox vruex kuq yek phuex,” ngoz vtueq nox kuex Simeon[35] ngoz tueq muingc tueq.

³⁴Kvruex yimaq wvgvnz yaungx yek vtueq vsaz washiz hulawx jawx tueq. Piq rueq ngoc, “Itaungx waz muex vsaz wathuimx shex jawx kuq tauk ningkhvnc nuex piq kuex ngaz rulc thuinz kvnvp wvnc phuex shvmx,” ngoz vtueq nox kuex Lewi[36] ngoz tueq muingc tueq.

³⁵Kvruex yimaq wvgvnz yaungx yek vtueq vsaz washiz hulawx jawx tueq. Piq rueq, “Majuiuc lauk ngaz rueq Yehowa kejux kuex tvtsvmc shaungx,” ngoz tueq jungx ruiux vsaz kuex Yuda[37] ngoz tueq muingc tueq. Kvruex yimaq kuex vsaz jawx muq shex thauk kaz tueq.