Read Tase Naga VPHAUNGC VYAUNGC 32 Bible Online

VPHAUNGC VYAUNGC 32 - Tase Naga bible

VPHAUNGC VYAUNGC 32

¹Yaku kuex wuinz ghaq lvmx khuemx yaq nuex Tishox raungkamx waz hez wvyvmc rulc rvhumc tueq.

²Kvkaq raungkamx waz hez kuex khiz vtueq piq rueq, “Vruex kuex Tishox jerak rvtueq;” ngoz tueq kvruex baung kuex Mahanaim[50] ngoz tueq muingc tueq.

³Yaku rueq Edom mungx nuex httax yaq vphuz Esaw kox nuex thaungc jungc jix hez kuex kungkhux tvkaz tueq.

⁴Thaungc jungc jix hez muex tvjungc kaz tueq kuex: “Mkvjaz tay jix mnvrc waz, ngaz Yaku kuex Laban rulc vdvmz httax naungx vtueq majuiuc jix yek waung vraungx.

⁵Ngaz kox nuex manx htenc, mvre htenc, khelbuenx htenc, khelx htenc nuiyc dax htenc httax yaq. Mnoz kox wawc ngaz rueq htvlx phawc lvp shaungx ngoz tueq tvluimc vtueq, vkhoc kvjaz tvjungc laq vphaungx, ngoz tueq jungx shuinz,” ngoz tueq tvjungc kaz tueq.

⁶Thaungc jungc jix hez kuex Yaku kox nuex yek waung vtueq, “Nuiyhez kuex mphuz Esaw kox nuex waung tiq, piq muinz mnoz rulc rvhumc kay tvkoc kaz yaq. Piq rulc miq shac bvlic kaz naungx tueq,” ngoz tueq tvtay tueq.

⁷Yaku kuex pinhtumc hiyaz vtueq rvwvlc tvmaung tueq. Piq rulc lomx yaq miq htenc nuiyc khelbuenx, khelx, manx nuiyc kamel htenc kuex phungc nueyc muex tv-phvlc taq tueq.

⁸Piq kvmungx kuex, “Mkhoc shoc maq Esaw httuiuc kaz vtueq vphaungc phungc shiz jix kuex khvt ruiux yuq, vganc phungc shiz kuex luenx wvnc lvp tuex,” ngoz tueq tvmaung tueq.

⁹Kvruex yimaq Yaku rueq vjux thoz tueq, “Ijix Abraham Tishox nuiyc iwaz Esak Tishox lex, ngaz muex tay kuq koq! Yehowa mnoz rueq ngoc mmungtan nuex nuiyc mtaungx nyuing sanox kox nuex yek waung kuiuz, ngaz rueq mnoz muex tvhvlc tvyoalc moalc kuq phaungx, ngoz tueq jungx phux.

¹⁰Mnvrc waz, ngaz muex tvkhic kuq phux menjenc kejux nuiyc tvmtuing lvmx lotlaz kuex aungx muq shauk doc. Ngaz rueq Yodan ruilx rvp wvnc tauk nuex ngaz rulc ngvlhtulc vshiz dvyx lomx wvnc tauk vganc yvmx muinz vguez, yuq muinz majuiuc kuex vruex phungc nueyc rulc ngaz yek waung vtaungx.

¹¹Iphuz Esaw yauk wawc ngaz kuex palc wvnc koq, ngaz rueq vjux thoz vphaungx. Ngaz hiz vtaungx, piq kaz vtueq nuiyhez kuex khvt ruiux nuiyhez lotlaz muinz yalxjuik rulx nuiyc nosaz rulx htenc tauk khvt gay muex hiz vtaungx.

¹²Ngvy tvkoc phvnx ruip saz nuex hvlc wvnc muex muinz, ngaz kuex svmuktvrax kawx wawc vwvlc lot juing rvmuq paung yaq kumtsvy ikhoc suiuz vsaz htenc tvpux paung phaungx ngoz tueq muinz mnoz rueq bomkhvmc kuq phux kuex rvwvl shuiuz,” ngoz tueq thoz tueq.

¹³Yaku kuex kvruex hong kvyuq raungwvrx shiz yuip vtueq, vphuz Esaw muex yauk noalc kuy tvkoc piq nyvmx saz kung kvwawc khelx kuiux shac nueyc, vpung roknueyc, khelbuenx kuiux shac nueyc, vpung roknueyc, vsaz hez tauk nongx puix tvnuingc yaq kamel kuiux rok thuimx, manx kuiux rok bvlic, vpung rokshiz, loze kuiux roknueyc, vpung rokshiz kvruex htenc kuex thvl taq tueq.

¹⁶Nyvmx saz htenc kuex vkung maq vkung tv-phvlc vtueq, kung tek nuex piq nvrc waz vshiz phok muex tvlawc tueq. Piq rueq tsuinghez muex ngoc, “Nuimhez rueq kungshiz nuiyc kungshiz kuex tvhvl vtueq ngvy max nuex kaz wuez kuinz,” ngoz tueq nvr tueq.

¹⁷Piq rueq vphaungc wawc nvrc waz muex ngoc, “Iphuz Esaw kuex nuimhez rulc rvhumc vtueq, ‘Mjiyungx kuex ukhaq lac? Mkox nuex kay lac? Mkhaungkac wawc nyvmx saz kuex uraq lac guimz yaq nguinx?’ ngoz tueq wiz ruiux yuq,

¹⁸mnoz rueq vkhoc tvralc shuiuz, ‘Mnvrc waz Yaku rueq guimz yaq. Piq rueq vjiyungx waz Esaw muex yauk noalc vtvkuq kaz rvtueq. Yaku piq muinz yix nuex phvnx laq yaq,’ ngoz tueq jungx shuinz.”

¹⁹Kvrulc rv-ngvlc kungnueyc wawc waz muex muinz, kungthuimx wawc waz muex muinz, vganc kung lotlaz nuex phvnc jix hez muex muinz: “Vruex kuex nuimshiq Esaw rulc rvhumc ruiux yuq jungc juing kvjaz rvtueq.

²⁰Tsuinghez rueq, ‘Auex, mnvrc waz Yaku kuex nuiyshiq yix nuex kaz naungx yaq,’ ngoz tueq jungx shuinz,” ngoz tueq jungx kuq tueq. Yaku rueq, “Ngaz rueq kuq vshaungx yauk noalc htenc vruex ningkhvnc nuex iphuz piq thuinhvlx kaz vtueq, piq rulc rvhumc taungx kvkaq ngvy mvrax kuex dawc kuq gay phuex shvmx,” ngoz tueq thuinz maq tvmaung tueq.

²¹Piq rueq yauk noalc htenc kuex kungkhux tvlvmz laq ruiux, kvruex raungwvrx kuex jerak kvyuq dvyx yuip tueq.

²²Kvruex raungwvrx dvyx Yaku kuex kvtenc vtueq vtaungx nyuiuz nueyc nuiyc nyuiuz ruinx jix nyuiuz nueyc, vsaz hez rokshiz rac washiz kuex shvlx laq vtueq, Jabbok ruilx kuex tvyanz tueq.

²³Vjuik vsaz htenc rulc vdvmz hup vsvmx htenc kuex yuix ral kox nuex yvy tueq,

²⁴yuq muinz Yaku kuex piq lauk lauk dvyx kvjungx kaz tueq. Kvkaq miq washiz kaz vtueq raungx tvwuic khvmkhvmz piq rulc rvkhvrc tueq.

²⁵Piq rueq taungx muq lvmx kuex tuiuz vtueq Yaku wex nuex shuiuq koq tueq vthaq kv-nyiq kaz tueq.

²⁶Kvruex waz kvraq, “Ngaz kuex httvr koq; raungwuic shex,” ngoz tueq. Yaku rueq, “Ngaz muex ruimruimx kuq ruiux yuq jix httvr phaungx,” ngoz tueq.

²⁷Kvruex waz kvraq, “Mmuingc yvmx khoc lac?” ngoz tueq wiz tueq. Piq rueq, “Yaku,” ngoz tueq tvralc tueq.

²⁸Kvruex waz rueq, “Yix maq mmuingc Yaku ngoz tueq nauk kvmuingc kaz shex. Mnoz kuex Tishox rulc muinz, miq rulc muinz rvlongx palx vtueq taungx gay jix waz rvtoq; kvkhoc rvtueq mmuingc kuex Israel[51] rvtuex,” ngoz tueq jungx kuq tueq.

²⁹Yaku rueq, “Mmuingc kuex jungx kuq koq,” ngoz tueq. Yuq muinz kvruex waz rueq, “Mnoz rueq ngvy muingc kuex yvmx ngoz tueq tuiuz roc lac?” ngoz tueq wiz tueq. Kvruex yimaq Yaku muex ruimruimx kuq tueq.

³⁰Yaku rueq, “Ngaz rueq Tishox kuex htvlx rvhumc hungx khiz tauk, ngaz muinz vtvraungx shauk doc httax vtaungx,” ngoz tueq kvruex baung kuex Peniel [52] ngoz tueq muingc tueq.

³¹Yaku kuex Peniel maq kaz wvnc koq tueq shalx dung yaq shex rvtueq. Piq kuex vkhez tv-nyiq gay vtueq dawk shuex dawk maq kaz wvnc tueq.

³²Yaku kuex vwex phawc nuex shuy gay rvhumc tueq ningkhvnc nuex, majuiuc raungnuiyq nuex httuiuc laz Israel miqsaz rueq wex phawc wawc vthaq kuex phauk wuez muq.