Read Tase Naga VPHAUNGC VYAUNGC 35 Bible Online

VPHAUNGC VYAUNGC 35 - Tase Naga bible

VPHAUNGC VYAUNGC 35

¹Tishox rueq Yaku muex ngoc, “Bethel nuex lvmx lvy kaz wvnc vtueq httax kaz kuiuz. Mphuz Esaw ralx muex hiz vtueq yuz wvnc toq nuex mnoz kox nuex kvkhic kaz tueq Ngaz Tishox muex shomrawx vshiz tvhungx shuiuz,” ngoz tueq.

²Kvkhoc rvtueq Yaku rueq vyuimx wuinz htenc nuiyc piq rulc httaz naungc jix htenc muex ngoc, “Nuimshiq nuex httax yaq vganc tishox htenc kuex tuip gay wuez shuinz; miqmac shauk gvnz kuex kvsawc nawc wuez ruiux, khvy vsawc kuex kvlayc wuez kuinz.

³Naungshiq kuex vruex hong vmaq Bethel hong nuex kaz wvnc wuez ix, ngaz kuilc daz rvhumc tauk nuex ngaz palc wvnc vtueq, ngaz khuemx taungx tek nuex ngaz rulc vdvmz httax yaq Tishox muex shomc nawk kuy tvkoc kvruex hong nuex shomrawx tvhungx shaungx,” ngoz tueq jungx tueq.

⁴Kvkhoc rvtueq tsuingshiq kox nuex httax yaq vganc tishox htenc muinz, tsuingshiq rueq jic juing najic htenc muinz Yaku muex kuq tueq. Yaku rueq kvruex hup svmx htenc kuex Shekhem ghaq hep wawc khauk rauk jungx yaz nuex luip gay shec tueq.

⁵Yaku nuiyc vsaz hez kvmaq luiuz wvnc tueq nuex, kvruex tvroz nuex httax yaq ghaq wuinz htenc kuex pinhtumc hiyaz wuez vtueq, tsuinghez kuex yurc vtueq khvt khvmc muq.

⁶Yaku kuex piq miq htenc rulc vdvmz Kanaan mungx wawc majuiuc Bethel ghaq ngoz yaq Luza ghaq nuex httuiuc kaz tueq.

⁷Kvruex yuq shomrawx kuex tvhungx vtueq vphuz kox maq yuz wvnc tueq nuex kvruex yuq Tishox kuex piq muex kvkhic tueq ningkhvnc nuex Bethel ngoz tueq muingc tueq.

⁸Rebeka muex lawc mawc kuy jix Debora thueyc kaz vtueq, Bethel maq ghaqyaz kox nuex httax yaq khauk rauk jungx yaz kvyuq luip tueq. Kvkhoc rvtueq kvruex jungx kv-ngoc, “Muik phic ruk juing khauk rauk jungx,” ngoz tueq muingc tueq.

⁹Yaku kuex Mesopotamia maq httuiuc waung yek tueq nuex, Tishox kuex piq kox nuex laukshiz kvkhic kaz yek vtueq piq muex ruimruimx kuq tueq.

¹⁰Tishox rueq piq muex, “Mmuingc kuex Yaku rvtueq, yuq muinz majuiuc vmaq phaungc vtueq Israel ngoz tueq shex kvmuingc tuiux,” ngoz tueq jungx tueq. Kvkhoc rvtueq Tishox rueq piq muex Israel ngoz tueq muingc kuq tueq.

¹¹Lauk shiz hulawx Tishox rueq piq muex ngoc, “Ngaz kuex Tvphaungc Tvsuip Tishox rvtauk. Suiuz vsaz paunghvlc jawx shuiuz. Miq phvnx ruip rawx kuex mnoz maq pux paung dung wvnc tuex, msuiuz msaz phvnx wawc honoc hokhvmx dung wvnc wuez tuex.

¹²Ngaz rueq Abraham nuiyc Esak muex kuq tauk mungtan kuex mnoz muex muinz, msuiuz msaz phvnx muex muinz kuq phaungx,” ngoz tueq jungx tueq.

¹³Kvruex yimaq Tishox kuex piq kox maq waung wvnc tueq.

¹⁴Tishox kuex piq rulc rvbomc tueq baung kvyuq Yaku rueq tvtsuingc lungshungc vtueq, kvruex htauk kvyuq svpiq tix nuiyc olip puiz tix kuex shvy tueq.

¹⁵Piq rueq kvruex baung kuex Bethel ngoz tueq muingc tueq.

¹⁶Yaku nuiyc vyuimx wuinz htenc kuex Bethel maq kaz wvnc vtueq, Ephrat ghaq nuex max httuiuc, lvmx vshauk puq rvhvl yaq baung nuex httuiuc kaz vtueq, Rakhel kuex nox wuic khic tumc wvnc vtueq, nox wuic khic gvrc hvlc gvrx kaz tueq.

¹⁷Piq kuex nox wuic khic thuiuz hvlc rvhumc tueq, kvkaq nox tvjawc jix rueq piq muex ngoc, “Rakhel lex, nauk kawc yawc kaz; miqwaz saz vshiz lvp yek toq,” ngoz tueq jungx tueq.

¹⁸Yuq muinz piq kuex thuiuzthuic vpat wvnc nanac nuex nox kuex Benoni[55] ngoz tueq muingc tueq, yuq muinz vwaz rueq Benjamin[56] ngoz tueq muingc tueq.

¹⁹Rakhel thueyc kaz koq tueq majuiuc Betlehem ghaq ngoz yaq Ephrat ghaq nuex kay juing lvmx kawx nuex luip tueq.

²⁰Yaku rueq luip ruiuz khux htauk kvyuq tvtsuingc lungshungc tueq, majuiuc raungnuiyq nuex httuiuc laz kvruex ngoc Rakhel luip ruiuz khux ngoz tueq muingc yaq.

²¹Yaku kuex kaz wvnc yek vtueq Eder pvrrawx ral nuex jerak tec tueq.

²²Yaku kuex kvruex mungx kvyuq httax tueq nuex Ruben kuex vwaz taungnyuiuz vruinx jix Bilha rulc yaq gay tueq; Yaku rueq kvruex lvmx kuex tay vtueq thuinkhvy phuk tueq. Yaku sahez kuex rokshiz rac wanueyc rvtueq.

²³Lea rueq vjawx sahez kuex, Ruben (Yaku saz pekhux waz) Simeon, Lewi, Yuda, Issakar, nuiyc Zebulun rvtueq.

²⁴Rakhel sahez kuex Yosep nuiyc Benjamin rvtueq.

²⁵Rakhel dax nyuiuz Bilha sahez kuex Dan nuiyc Naphtali rvtueq.

²⁶Lea dax nyuiuz Zilpa sahez kuex Gad nuiyc Asher rvtueq. Vruex sahez kuex Mesopotamia mungx maq vjawx rvtueq.

²⁷Yaku kuex Abraham nuiyc Esak httax tueq Hebron ghaq hep wawc Mamre nuex httax yaq vwaz Esak kox nuex httuiuc kaz tueq.

²⁸Esak kuex rullungx 180 nuex httuiuc laz httax tueq,

²⁹piq kuex vrullungx sung vtueq thueyc kaz tueq, piq jix vwaz rvtuimx yaq nuex waung wvnc tueq. Vsaz nueyc Esaw nuiyc Yaku rueq piq kuex luip tueq.