Read Tase Naga 2 SAMUEL 10 Bible Online

2 SAMUEL 10 - Tase Naga bible

2 SAMUEL 10

¹Vshauk puq httvmx yix maq Ammon Hokhvmx Nahash thueyc kay yix, vsaz Hanun kuex hokhvmx yaungx tueq.

²Hokhvmx Dawid rueq, “Vwaz Nahash rueq ngaz muex kejux yauk shuimx kuq wvnc phuex rulc rv-ngvlc, Hanun rulc muinz kungjix yaungx layx ngaz rueq piq muex tvkhic juing,” ngoz tueq. Kvkhoc rvtueq piq rueq menjenc lvmz tvkhic kuy tvkoc kamx waz bix kuex Dawid rueq tvkaz tueq. Kvkaq Ammon nuex tsuinghez httuiuc waung koq tueq,

³Ammon miqsaz vyungx vlaungx bix rueq hokhvmx waz muex ngoc, “Mnoz muex menjenc lvmz tvkhic tvkoc vruex miq hez vruex Dawid rueq tvkaz tueq kuex, m-waz muex tvtsanc nganc vtueq shuimx kuq tueq ikhoc ngoz tueq haz mnoz rueq tvmaung vshuiux? Vsuing kvkhoc kuex rvmuq! Tsuinghez rueq naungshiq kuex khvt gay laz juing ngoz tueq, vruex ghaqyungx kuex sisunx helc tvkoc piq rueq tsuinghez kuex tvkaz tueq!” ngoz tueq tvtay jungx tueq.

⁴Hanun rueq Dawid kamx waz hez kuex lvp vtueq, kaqbanx kholak kuex sulx gay ruiux, wex jungx nuex httuiuc laz tsuinghez khoz vkhvy kuex gvnz gay vtueq tsuinghez kuex tvkaz gay tueq.

⁵Tsuinghez kuex yuimx nuex yek waungc tvkoc pinhtumc yvlc sac wuez tueq. Dawid rueq kvkhoc yaungx wvnc tueq thaungc kuex tay vtueq, nuimhez kaqmul tvluz laz Yerikho ghaq nuex dvyx httax kuinz, nauk yek waung vkueq shauk ngoz tueq tvjungc kaz tueq.

⁶Ammon miqsaz rueq Dawid kuex tsuingshiq ralx muex tvyaungc gay tueq lvmz helc lvp vtueq, Betharehob nuiyc Zoba wawc Siria nolaungx bix 20,000, Tob ghaq wawc miq 12,000, kvmaq Maaka hokhvmx waz kox wawc miq 1,000 tauk nuic tueq.

⁷Dawid rueq kvruex thaungc kuex tay vtueq tsuinghez kuex tvgap gawx tvkoc Joab nuiyc nolaungx bix lotlaz kuex tvkaz tueq.

⁸Ammon miqsaz kuex kaz wuez vtueq tsuingshiq ghaqnyuiuz jungx yaungx yaq Rabba ghaqyungx palx kaluix daungx maq bvmc tueq, vganc Siria miqsaz htenc nuiyc Tob nuiyc Maaka miqsaz htenc rueq kuex yaruix tvnx kox nuex jvp juing tvhungx lvmz wuez tueq.

⁹Joab kuex ralx htenc rueq piq vyix vmax maq khvt muex khuyx yaq kuex khiz vtueq, Israel nolaungx bix wawc vhvlx pinhtumc shvrvyx bix kuex httauk vtueq, Siria miqsaz kox nuex htvlx rvhumc taq tueq.

¹⁰Kvjungx yaq piq nolaungx bix kuex vnox Abishai rueq guimz yaq khung nuex taq ruiux, Ammon miqsaz rulc htvlx rvhumc taq tueq.

¹¹Joab rueq piq muex ngoc, “Siria miqsaz rueq ngaz kuex taungx wvnc khiz ruiux lec, ngaz muex romc kaz loq, Ammon miqsaz rueq mnoz taungx wvnc ruiux yuq ngaz rueq mnoz muex romc kuq kaz raungx.

¹²Hungc tsvnc vtueq khvmc wuez shuinz! Naungshiq miqsaz tvkoc nuiyc naungshiq Tishox ghaqyungx htenc tvkoc nuex phaungx duing maq khvt wuez ix. Yehowa thuinroc m-yaungx wvnc kueq!” ngoz tueq jungx tueq.

¹³Joab nuiyc piq nolaungx bix rueq kungkhux khvt tvkoc kvtenc kaz wvnc koq tueq, Siria miqsaz kuex vyuz rvwvnc tueq.

¹⁴Siria miqsaz yuz wvnc vtuex kuex Ammon miqsaz rueq khiz vtueq, tsuinghez muinz Abishai kox maq yuz wvnc vtueq ghaqyungx mungx nuex nyuip waung tueq. Kvkaq Ammon miqsaz rulc rvlungc yaq nuex Joab kuex yek vtueq Yerusalem nuex waung tueq.

¹⁵Israel miqsaz htenc rueq Siria miqsaz htenc kuex khvt taungx gay tueq lvmz tsuingshiq rueq helc vtueq, tsuingshiq nolaungx bix lotlaz kuex gvl tvtuimx tueq.

¹⁶Hokhvmx Hadadezer rueq Euphrat Ruilx maq shaldungc kox nuex httax yaq Siria miqsaz kuex gvl koq tueq, Zoba Hokhvmx Hadadezer piq nolaungx bix guimz jix nolaungx yungx Shobak rueq nvr tueq rulc rv-ngvlc Helam nuex kaz wvnc wuez tueq.

¹⁷Kvruex thaungc kuex Dawid rueq tay vtueq Israel nolaungx bix kuex tvtuimx ruiux, Yodan Ruilx kuex yanz wvnc vtueq Dawid rulc htvlx rvhumc nuex Siria miqsaz jex yaq Helam ghaq nuex kaz wvnc tueq. Kvkhoc rvlungc phaungc wvnc vtueq,

¹⁸Israel miqsaz rueq Siria nolaungx bix kuex tvyek yurc gay tueq. Dawid nuiyc piq miq hez rueq Siria mvre renc ruip jix miq 700 nuiyc mvre nuex ngaungc jix miq 40,000 kuex thvt gay tueq. Mvre nolaungx guimz jix vyungx Shobak muinz tsuinghez rueq tv-phiz gay koq tueq, rvlungc yaq baung nuex dvyx piq thueyc kaz tueq.

¹⁹Kvkaq Hadadezer khung nuex httaz jix hokhvmx bix kuex Israel miqsaz htenc ningkhvnc nuex tsuinghez sumx wvnc vtuex lvmz kuex tuiuz helc vtueq, tsuingshiq rulc nomic rvyaungc ruiux, tsuingshiq khung nuex yaungx wvnc wuez tueq. Kvkaq Siria miqsaz htenc kuex Ammon miqsaz htenc muex romc kuy kay tvkoc raungluingx muinz khvmc muq hiz kaz wuez tueq.