Read Tase Naga 2 SAMUEL 22 Bible Online

2 SAMUEL 22 - Tase Naga bible

2 SAMUEL 22

¹Yehowa rueq Dawid kuex Sholu nuiyc vganc ralx htenc yauk wawc palc wvnc tueq nuex, Dawid rueq vruex shic vmaq Yehowa muex tvkuiux kemz shix tueq:

²Yehowa kuex ngaz muex tvkhup wungx kuy jix waz; vpiq kuex phaungx ngaungx hvlc ngvy nolaungx ghaqshungc rvtueq.

³Ngvy Tishox kuex ngvy tvkhup wungx kuy jix waz rvtueq, vpiq rulc vdvmz ningkhvnc nuex ngaz kvguing vtaungx. Vpiq rueq ngaz kuex lak vshiz ikhoc tuinggawx kuq vtueq; vpiq rueq ngaz tvguing vtueq tvwungx taq yaq. Vpiq kuex ngaz palc daungc jix waz rvtueq; ngaz muex tvwungx kuq ruiux yauk laungc yalawx jix kox wawc palc wvnc phuex.

⁴Yehowa kuex ngaz rueq gvl koq tueq, ngaz kuex ngvy ralx hez yauk wawc vpiq rueq palc wvnc phuex. Yehowa muex tvtsvmc wuez shuinz!

⁵Vthueyc vmvy yuix daungx htenc rueq ngaz kuex tuimx ruiux; tvbac gay yaq yuix daungx htenc rueq ngvy htauk nuex luimz wvnc yaq.

⁶Vthueyc vmvy juing miqhiz vsac rueq ngaz kuex tuimx wvnc phuex, Wulumx mungx rueq ngaz kuex tsvnc yaq.

⁷Ngaz kuilc daz rvhumc tauk nuex Yehowa kuex gvl tauk; romc kuy tvkoc ngvy Tishox kuex ngaz rueq gvl tauk. Vpiq shomc yuimx mungx maq ngvy guyc kuex tay tueq; romc kuy tvkoc ngvy guyc kuex vpiq rueq tay tueq.

⁸Kvkaq ghaq kuex kv-khuirc vtueq kvbuilc tueq; Tishox thuinkhaq vtueq raungmungx ruingx jungx htenc kv-nguirx ngauk vtueq kvbuilc yaq!

⁹Vpiq khuiz wawc wvr khuiuq dung vtueq, vpiq nuix wawc wvr tsauz yaq nuiyc vkhamc rvyaq wvrluic yaq.

¹⁰Vpiq rueq raungx kuex juir vtueq svt kaz tueq, vpiq yaz khung nuex nyauk hvlc phuemx rvtueq.

¹¹Vpiq kuex kherubim nuex ngaungc ruiux baz vtueq; raungguil raungkungx htauk nuex vpiq khuemx yaq.

¹²Vpiq kuex raungx nyauk maq vshauk pumz kuex kvpuingc ruiux, htvy hvlc phuemx htenc nuiyc yuix htenc maq kvruk yaq;

¹³vpiq khaungkac wawc phelep yaq baung maq vkhamc rvyaq wvr tsauz yaq.

¹⁴Kvruex yimaq Yehowa rueq raungx maq raungx tvmuk koq tueq, Tvphaungc Tvsuip Tishox tvruingc kvtay tueq.

¹⁵Vpiq rueq vpiq laqsvnz htenc kuex gap koq tueq, vpiq ralx htenc kuex tvpanc gay tueq; raungx tvlep vtueq tsuingshiq kuex tvyuz gay tueq.

¹⁶Yehowa rueq piq ralx htenc kuex mulx ruiux, khaq vtueq tsuingshiq kuex ramc koq tueq, svmuktvrax phawx rawz kuex dung wvnc vtueq, ghaq jungx vruingx kuex dung wvnc tueq.

¹⁷Yehowa rueq raungx maq tvlanc vtueq ngaz kuex shuimx laq phuex; thuiuz hvlc yuix mungx wawc ngaz kuex het tvdung gay phuex.

¹⁸Vpiq rueq luimc vkawc hungc hvlc ngvy ralx hez kox wawc muinz, ngvy shuiuc pac jix lotlaz kox wawc muinz ngaz kuex palc wvnc phuex, tsuingshiq kuex ngvy tvkoc hungc hvlc yaungx yaq.

¹⁹Ngaz kuilc daz rvhumc tauk nuex, tsuingshiq rueq ngaz kuex khvt wuez phuex, yuq muinz Yehowa rueq ngaz muex tvwungx kuq phuex.

²⁰Vpiq rueq ngaz kuex kvhiz juing wawc tvdung romc kuq phuex; vpiq rueq ngaz kuex raungc raq ningkhvnc nuex ngaz kuex palc wvnc phuex.

²¹Ngaz rueq vlvmz shuimc ningkhvnc nuex Yehowa rueq ngaz muex yauk mauk kuq phuex; ngaz nuex mvrax kop muq rvtueq vpiq rueq ngaz muex ruimruimx kuq phuex.

²²Yehowa tvrac kuex ngaz rueq phvnc ningkhvnc nuex, ngvy Tishox kox wawc kvroz wvnc mauk.

²³Vpiq tvrac lotlaz kuex ngaz rueq phvnx vshaungx; vpiq rueq nvr yaq htenc kuex ngaz rueq tvlvlc gay mauk.

²⁴Ngaz kuex mvrax yaq gay mauk, ngaz rueq vyaq shuimx mauk lvmz kuex vpiq rueq tuiuz yaq.

²⁵Kvkhoc rvtueq ngaz rueq vlvmz rvkhauk shuimx vshaungx ningkhvnc nuex, ngaz kuex mvrax vguez rvtauk lvmz vpiq rueq tuiuz vtueq yauk mauk kuq phuex.

²⁶O Yehowa lex, mnoz kuex tvmtuing httaz jix waz muex tvmtuing httax vtuiux, hunghtaungx jix muex jvnc vtueq vhvlx lvmz tvkhic kuq vshuiux.

²⁷Mnoz rueq vsawc jix muex vsawc thuinz tvkhic kuq ruiux muinz, honc bac jix muex kuex ralx tvyaungx vshuiux.

²⁸Vpiq rueq thuinz tvyomz jix kuex palc wvnc tueq, yuq muinz ngamc vngax jix kuex mnoz rueq tvyomz gay tueq.

²⁹Yehowa lex, mnoz kuex ngvy raungwuic rvtoq; ngvy kox wawc raungx nyauk kuex mnoz rueq tvwuic kuq phux.

³⁰Mnoz rueq ngaz kuex ngvy ralx htenc khvt gay juing hungc vlaungc muinz, tsuingshiq jex yaq kuex tvbunx gay tvkoc luimc vkawc kuex ngaz muex kuq phux.

³¹Tishox vpiq rueq shuimx kaz yaq kuex hunghtaungx mvrc yaq, vpiq rueq jungx yaq kvjaz htenc kuex vkvmx juing doc ix! Vpiq rueq tvkhup wungx yaq kuex thuiyc jix miq lotlaz tvkoc vpiq kuex lak vshiz ikhoc rvtueq.

³²Yehowa dvyx Tishox rvtueq; Tishox dvyx naungshiq kvwungx juing rvtueq.

³³Vruex Tishox kuex ngvy kv-phaungx ngaungx juing baung rvtueq; vpiq rueq ngvy khuemc juing lvmx kuex tuimz guimz kuq yaq.

³⁴Vpiq rueq ngaz kuex jaw ngic huk ikhoc tv-phaungx ngaungx kuq vtueq; vpiq rueq ngaz kuex kanx htenc htauk nuex tuimz guimz taq yaq.

³⁵Vpiq rueq ngaz muex ralx lungc tvkoc tvluing kuq vtueq, hungc hvlc laq kuex ngaz rueq shuimx lot vshaungx.

³⁶O Yehowa lex, mnoz rueq ngaz kuex tvkhup wungx vtueq palc wvnc phux; mnoz rueq romc kuy ningkhvnc nuex ngaz yungx luz wvnc tauk.

³⁷Mnoz rueq ngaz kuex vkvlvp juing wawc tvguing kuy ningkhvnc nuex ngaz kuex mkaq muinz rul mauk doc.

³⁸Ngvy ralx htenc kuex ngaz rueq yurc vtueq khvt taungx gay tauk; tsuingshiq kuex tvbac gay lot nuex httuiuc laz ngaz rueq tvthauk gay shaungx rvmuq.

³⁹Ngaz rueq tsuingshiq kuex tvrul jek gay tauk ningkhvnc nuex kvtenc lot muq shex; tsuingshiq kuex ngvy max nuex rul wvnc wuez vtuex.

⁴⁰Mnoz rueq ngaz muex ralx lungc lot juing hungc kuq vtueq ngvy ralx htenc kuex tvtaungx gay phux.

⁴¹Mnoz rueq ngvy ralx htenc kuex ngvy kox wawc tvyuz gay ruiux; ngaz muex shuiuc pac jix hez kuex ngaz rueq tvbac gay tauk.

⁴²Romc kuy tvkoc tsuingshiq rueq thuiyx wuez tueq, yuq muinz tsuingshiq kuex uraq muinz palc wvnc muq; Yehowa kuex tsuingshiq rueq gvl tueq, yuq muinz vpiq rueq tvralc muq.

⁴³Bokkhuyx ikhoc yaungx laz juing ngaz rueq tsuingshiq kuex tvbunx jek gay tauk; lvmx laungx wawc bokbiq ikhoc tsuingshiq kuex nyet nuiuz gay tauk.

⁴⁴Mnoz rueq ngvy tvgap gawx jix miqsaz kox wawc palc wvnc phux, miqphvnx htenc kuex guimz tvkoc ngaz muex tvhungx kuq phux; ngaz rueq tuiuz mauk miqsaz htenc muinz ngaz rueq guimz yaq khung nuex httax yaq.

⁴⁵Pungnuk miqsaz htenc kuex ngvy khaungkac nuex bumx wuez yaq; ngaz rueq nvr shaungx kuex tsuingshiq rueq tay vtueq phvnx wuez yaq.

⁴⁶Tsuingshiq kuex khvmc thuinz vguez shex, tsuingshiq nolaungx ghaqshungc htenc nuex hiyaz kv-khuirc vtueq dung kaz wuez yaq.

⁴⁷Yehowa kuex tvraungx httax yaq! Ngvy kvguing juing waz muex tvtsvmc wuez shuinz! Ngaz muex palc daungc hungc vlaungc httaz hvlc Tishox yungx luz yaq lvmz kuex jungphvnx wuez shuinz!

⁴⁸Vpiq rueq ngaz muex ngvy ralx htenc kuex tvtaungx gay juing kuq phuex; miqphvnx htenc kuex ngvy yauk khung nuex taq shec tueq,

⁴⁹ngvy ralx htenc yauk wawc ngaz kuex palc wvnc phuex. O Yehowa lex, ngaz rueq ralx htenc kuex tvtaungx gay juing ngaz muex kuq phux nuiyc yauk laungc yalawx yauk shuimc tvdungc jix miq htenc yauk wawc tvkhup wungx kuq phux.

⁵⁰Kvkhoc rvtueq miqphvnx htenc htumc nuex ngaz rueq mnoz muex tvtsvmc vphaungx; ngaz rueq mnoz muex tvtsvmc shix vphaungx.

⁵¹Tishox rueq vpiq hokhvmx muex yunghvlc taungx wvnc lvmz kuq tueq; vpiq rueq vthvl taq waz ngoz yaq, Dawid nuiyc piq suiuz vsaz htenc muex pattup pat-sac lungwawc thuinz kuex tvkhic kuq tueq.