Read Tase Naga 2 SAMUEL 3 Bible Online

2 SAMUEL 3 - Tase Naga bible

2 SAMUEL 3

¹Sholu yuimx jix muex htuiz daungx kuy jix hez nuiyc Dawid muex htuiz daungx kuy jix hez hvlwvl nuex loayc hvlc rvlungc rv-khvt wuez tueq. Dawid kuex pinhtumc hungc vlaungc httax wvnc ruiux, piq tvgap gawx jix hez kuex pinhtumc nulx wvnc tueq.

²Hebron ghaq maq vjawx Dawid sahez waz tvruk kuex tsuinghez vjawc raungwuic tv-phvnc ngoz ruiux yuq: Jezreel ghaq wawc vnyuiuz Ahinoam saz Amnon;

³Karmel ghaq wawc Nabal taungnyuiuz mvntix nyuiuz Abigail saz Kileab, Geshur Hokhvmx Talmai saz yalxjuik saz Maaka saz Absalom;

⁴vnyuiuz Haggit saz Adonija, vnyuiuz Abital saz Shephatia,

⁵vnyuiuz Egla saz Ethream hez rvtueq. Vruex hez htenc lotlaz kuex Hebron ghaq maq vjawx rvtueq.

⁶Dawid miq hez nuiyc Sholu yuimx wuinz nuex lomx yaq hez hvlwvl nuex rv-khvt rvmulc kuex httax ruq dvyx ningkhvnc nuex, Sholu yix phvnc naungc jix miq wawc Abner kuex pinhtumc luimc vkawc httax wvnc tueq.

⁷Raungnuiyq shiz Sholu saz Eshboshet rueq Abner muex ngoc Sholu juik nyuiuz ruinx nyuiuz, Aia saz yalxjuik saz Rizpa rulc woalc naungx tueq ngoz tueq nyvnc tueq.

⁸Kvruex ningkhvnc nuex Abner kuex pinhtumc khaq vtueq piq muex ngoc, “Sholu muex ngaz rueq tvmtuing kv-phelc wvnc tueq ngoz tueq haz mnoz rueq tvmaung vshuiux? Yuda tvkoc ngaz rueq vsuingc suing lekuq vshaungx ngoz tueq haz tvmaung vshuiux? Ngaz kuex vphaungc maq phuex m-waz Sholu nuiyc piq phuz vnox hez nuiyc vkung vkamz jix htenc htauk nuex tvmtuing httax wvnc tauk, Dawid yauk mungx nuex httuiuc kaz muq laz juing ngaz rueq mnoz kuex palc wvnc phaungx; yuq muinz majuiuc raungnuiyq yalxjuik nyuiuz shiz ningkhvnc nuex mnoz rueq ngaz muex mvrax nyvnc vphux nyix!

⁹Dawid rueq Sholu nuiyc piq suiuz vsaz hez yauk wawc mungtan kuex lvmz wvnc ruiux, mungtan tvsuip kox maq samx kox nuex httuiuc laz Israel nuiyc Yuda mungx nueyc wvtaungx nuex hokhvmx tvyaungc muex Yehowa rueq Dawid muex bomkhvmc taq tueq. Majuiuc kuex kvruex lvmz vsuing yaungx wvnc muq ngoz ruiux yuq, Tishox rueq ngaz muex murx mtvgurc kuq phueq!” ngoz tueq ramc tueq.

¹⁰

¹¹Eshboshet kuex Abner muex pinhtumc hiz vtueq bomc poshiz muinz khawx lot muq.

¹²Abner rueq kvruex baunglaung Hebron[2] nuex httax yaq Dawid kox nuex kamx waz hez tvkaz vtueq, “Ngaz rulc vrungx vraz lvmz tvhungx ix, kvkaq mnoz kox nuex Israel miq lotlaz kvroz wvnc laz juing ngaz rueq romc kuq phaungx,” ngoz tueq tvtay jungx tueq.

¹³Dawid rueq, “Vhvlx! Yuq muinz tv-nyvnc juing lvmz vshiz maq raz tueq ngaz mnoz rulc rungx raz tvhungx taq shix: mnoz ngaz kox nuex rvhumc kaz ruiux kvkaq Sholu saz yalxjuik saz Michal ngaz kox nuex shvlx laq loq,” ngoz tueq tvralc tvyez jungx tueq.

¹⁴Dawid rueq Eshboshet kox nuex kamx waz bix tvkaz vtueq, “Ngvy taungnyuiuz Michal kuex yez kuq koq. Piq kuex lvmc tvkoc Philistin miqsaz khuix httoar shashiz maq ngaz rueq ruiyx shec tauk,” ngoz tueq tvjungc wvnc tueq.

¹⁵Rvkoq tueq Eshboshet rueq Michal kuex Laish saz vtaungx waz Paltiel kox wawc shvlx laq tueq.

¹⁶Paltiel kuex vhtaq maq vkhoar Bahurim ghaq nuex httuiuc laz phvnx laq tueq. Yuq muinz Abner rueq piq muex ngoc, “Yuimx nuex yek waung kuiuz,” ngoz koq tueq piq yek waung tueq.

¹⁷Abner kuex Israel vyungx vlaungx bix kox nuex kaz vtueq tsuinghez muex ngoc, “Nuimshiq rueq loayc hvlc shex Dawid kuex nuimshiq hokhvmx muex tvyaungc roc vshuinx.

¹⁸Majuiuc baung kuex nuimshiq tvkoc vhvlx pinhtumc baunglaung rvtueq. Yehowa rueq ngoc, ‘Ngvy miqsaz Israel htenc kuex Philistin miqsaz nuiyc vganc ralx htenc lotlaz yauk mungx wawc palc wvnc tvkoc ngvy nvrc waz Dawid muex tvshuimc rvwvl wuez shuinz,’ ” ngoz tueq jungx tueq.

¹⁹Abner rueq Benjamin phvnx miqsaz muex muinz jungphvnx kuq tueq, kvmaq Benjamin miqsaz nuiyc Israel miqsaz rungx raz tueq lvmz Dawid muex tvtay jungphvnc kuy kay ngoz tueq Hebron nuex kaz wvnc tueq.

²⁰Abner rueq miq warok nueyc shvlx laq vtueq Hebron ghaq nuex httax yaq Dawid kox nuex httuiuc kaz tueq, Dawid rueq tsuinghez muex phuiuz vsvy moalx tvhungx kuq tueq.

²¹Abner rueq Dawid muex ngoc, “Majuiuc ngaz kaz vtueq Israel miqsaz lotlaz kuex Taungjix hokhvmx waz kox nuex shvlx laq vraungx. Tsuingshiq rueq muinz mnoz kuex hokhvmx ikhoc lvp wvnc wuez shuex, kvkaq mthuinz roc httax yaq lvmz kuex mnoz rueq lvp wvnc vtueq, kvruex mungtan lotlaz kuex guimz wvnc shuiux,” ngoz tueq jungx tueq. Dawid rueq muinz Abner kuex tvkhup wungx kuy jix tauk raz tueq tvwaung tueq.

²²Kvruex yimaq Joab nuiyc Dawid piq vyungx vlaungx bix vganc kuex ralx lungc kay ruix maq yek wuez vtueq, hup vsvmx paunghvlc lvp wvnc tueq. Abner kuex Dawid rueq tvkhup wungx kuy jix tauk raz tueq tvwaungc gay ningkhvnc nuex Hebron ghaq nuex vguez shex.

²³Joab nuiyc piq rulc kay naungc jix piq miq htenc httuiuc waung koq tueq Abner kuex Hokhvmx waz Dawid kox nuex kaz vtueq, tvkhup wungx kuy jix tauk nongx piq kuex tvwaung gay tueq lvmz Joab muex tvtay jungx tueq.

²⁴Rvkoq tueq Joab kuex hokhvmx waz kox nuex kaz vtueq piq muex ngoc, “Mnoz rueq yvmx lac ruez tonx? Abner kuex mnoz kox nuex kaz tueq quez, piq kuex yvmx ngoz tueq lac kvkhoc dvyx tvyek gay tonx?

²⁵Piq vyuq kaz tueq kuex mnoz muex rot kaq vtueq, mnoz rueq shuimx kaz vshuiux phvnx ruip saz nuiyc mnoz khuemx tuiux ruip rawx kuex tuiuz tvkoc rvtueq. Kvruex mnoz rueq rvkhauk laz helc tuiuz shec raung rvtoq!” ngoz tueq jungx tueq.

²⁶Dawid kox maq waungc wvnc yix maq, Joab rueq Abner kuex tvgvlc kay tvkoc miq tvkaz tueq, tsuinghez rueq Abner kuex Sira yuix tumz wawc tvyez shvlx wvnc tueq; yuq muinz Dawid rueq kvruex lvmz kuex yvmx muinz tuiuz muq.

²⁷Abner kuex Hebron ghaq nuex httuiuc kaz koq tueq, Joab rueq palx kaluix hep nuex shvlx laq vtueq, jausuc maq rvbomc nyamc muex ikhoc raz tueq vwuk nuex yaung maq shuiuq gay tueq. Kvruex kuex Abner rueq Joab nox Asahel thvy gay ningkhvnc nuex rvtueq.

²⁸Kvruex thaungc kuex Dawid rueq tay vtueq piq rueq, “Yehowa kuex ngaz rueq htvp htaz tauk lvmz nuiyc Abner vthvy gay rvhumc tueq lvmz nuex ngaz nuiyc ngvy mungtan nuex mvrax nyvnc juing lvmz vguez kuex mtuiuz taq shueq.

²⁹Kvruex murx kuex Joab nuiyc piq yuimx wuinz miq lotlaz htauk nuex mruiuc kuq gay shueq! Piq yuimx taungx mungx nuex miq wvyvmc nuex pat tek tvjuiuz yvlx[3] jix muinz, vshungx vshoyx jix muinz, khekungc jix muinz, ralx nuex thvy gay rvhumc muinz, htemc vrvmc muinz mhttax kueq!” ngoz tueq tuemc kuq tueq.

³⁰Kvkhoc rvtueq Joab nuiyc vnox Abishai rueq Gibeon maq rvlungc tueq nuex tsuingc nox Asahel kuex Abner rueq thvt gay tueq ningkhvnc nuex phuiuq lvmz tueq.

³¹Dawid rueq Joab nuiyc piq kungjix hez muex ngoc khoz vkhvy htenc kuex juir gay ruiux ruiyhec khvy svmx vtueq Abner tvkoc khoarc nyerc rax ngoz tueq nvr tueq. Maungx luip tueq nuex Hokhvmx waz Dawid piq kuex maungx yix kox maq phvnx naungx tueq.

³²Abner kuex Hebron ghaq nuex luip tueq, luip ruiuz khux kvmaq hokhvmx waz kuex vguyc vsez khoar tueq, miq htenc lotlaz muinz khoar nyerx wuez tueq.

³³Dawid rueq Abner tvkoc vkhoc yonzyec shic shix tueq: “Abner kuex miqyaq washiz ikhoc yvmx ngoz tueq lac thueyc kaz tvnx?

³⁴Vyauk nuex muinz khvrc muq, vyaz nuex muinz buinc muq; layx bac waz yauk nuex thvy gay rvhumc tueq ikhoc piq thueyc kaz ix!” Kvkaq miq htenc kuex Abner laung nuex khoar nyerx wuez yek tueq.

³⁵Miq htenc rueq Dawid muex phvnx shishiz phuiuz svy tvkoc nuiyq tuimc jungphvnx wuez tueq, yuq muinz piq bomkhvmc taq tueq kuex, “Shalx max nyuip nuex ngaz rueq phvnx shishiz phauk saq ruiux yuq, ngaz kuex Tishox rueq mthvt gay phueq!” ngoz tueq kvtuemc tueq.

³⁶Kvkhoc honc vyaungc kuex khiz vtueq miq htenc rueq muinz raungc raq wuez tueq. Vsuing hokhvmx waz rueq shuimx yaq lvmz htenc kuex miq htenc rueq raungc raq wuez yaq.

³⁷Dawid piq miqsaz lotlaz nuiyc Israel miqsaz lotlaz rueq Abner thvt tueq kvyuq hokhvmx waz kuex raungluingx muinz lomx muq lvmz tuiuz wuez yaq.

³⁸Hokhvmx waz rueq piq vyungx vlaungx bix muex ngoc, “Israel mungx nuex vyungx vlaungx washiz thueyc kaz tueq kuex nuimhez rueq tuiuz vshuinx haz?

³⁹Ngaz kuex Tishox rueq vthvl taq hokhvmx waz rvtauk rvyruiux, majuiuc raungnuiyq ngvy hungc vlaungc yomx yaq. Zeruia sahez kuex ngvy tvkoc yauk laungc yalawx muex yaungx yaq. Vkhoc vkhuip vkhaq shuimc jix ningkhvnc nuex tsuinghez rueq lvp aungx yaq rulc rv-ngvlc Yehowa rueq murx mtvgurc shueq!” ngoz tueq jungx tueq.