Read Tase Naga 1 HOKHVMX 12 Bible Online

1 HOKHVMX 12 - Tase Naga bible

1 HOKHVMX 12

¹Rehoboam kuex ghaqkhux kox nuex httax yaq Israel miqsaz lotlaz rueq piq kuex hokhvmx tvyaungc tvkoc rvtuimx httax yaq Shekhem ghaq nuex kaz tueq.

²Hokhvmx Solomon kox wawc yuz wvnc vtueq Ejip mungx nuex httuiuc kaz tueq Nebat saz Jeroboam rueq kvruex thaungc kuex tay vtueq Ejip mungx maq yek waung tueq.

³Ghaqkhux kox phvnx htenc wawc miq htenc rueq piq kuex gvl vtueq, tsuingshiq lotlaz vdvmz nuex Rehoboam kox nuex kaz vtueq piq muex ngoc,

⁴“M-waz Solomon rueq nuiyshiq muex batac hvlc ruez kuq vtueq nuiyshiq htauk nuex liz hvlc gurc tvdaungc kuq wvnc phuex. Mkhoc shoc maq mnoz rueq kvruex gurc kuex tvjawz kuq vtueq, nuiyshiq tvkoc vhvlx lanc ruez kuq ruiux yuq nuiyshiq kuex mkhung nuex tvmtuing maq httax wuez tix,” ngoz tueq tvtay jungx tueq.

⁵Piq rueq, “Raungnuiyq thuimx vngoz nuex ngaz kox nuex kaz yek luit, kvkaq jix ngaz rueq nuimshiq muex tvyez jungx kuq phaungx,” ngoz tueq tvralc tueq. Kvkhoc rvkoq tueq tsuinghez muinz yek waung wuez tueq.

⁶Hokhvmx Rehoboam rueq vwaz Solomon pat nuex rvjungc rv-phvnc naungc jix rullungx nyuiuz waz rulx rulc rvjungc phvnc tueq. Piq rueq, “Kvruex miq hez kvmac tvralc kuy tvkoc nuimhez rueq ngaz muex yvmx khoc kvmungx tharc lac kuq lot phuinx?” ngoz tueq wiz tueq.

⁷Tsuinghez rueq, “Mnoz rueq kvruex miq hez kvmac vhvlx shuimc kuy roc ngoz ruiux kuex, tsuingshiq rueq thoz yaq kuex vhvlx maq tay kuq shuiuz, kvkaq tsuingshiq kuex mnoz nuex tvmtuing httax vtueq mkaq muinz shuimx lvmz kuq kv-phux,” ngoz tueq tvralc tueq.

⁸Yuq muinz piq kuex rullungx nyuiuz waz rulx rueq kvmungx tharc jungx kuq tueq kvjaz kuex wvlc guez tvyaungc ruiux, majuiuc jix piq muex rvjungc rv-phvnc yaungc jix yaungx yaq piq rulc vdvmz vpeluz wvnc yalxrox bix kox nuex kaz vtueq,

⁹“Nuimhez rueq ngaz muex yvmx khoc kvmungx lac kuq wuez phuinx? Tsuingshiq gurc kuex tvjawz kuq kuit ngoz tueq ngaz kox nuex jungc kay jix miq htenc muex ngaz rueq yvmx khoc jungc kuy juing lac?” ngoz tueq wiz tueq.

¹⁰Tsuinghez rueq, “Mnoz rueq tsuingshiq muex vkhoc jungx shuiuz, ‘Ngvy yaukshix saz kuex iwaz khez htauk nuex muinz vyungx!’

¹¹Tsuinghez muex ngoc, ‘Iwaz rueq nuimshiq htauk nuex gurc liq kuex tvdaungc kuq shec kv-phuinx; ngaz rueq kvruex htauk nuex muinz liz hvlc kuex jvt kuq yek phaungx. Piq rueq tsuingshiq kuex ruiyx pumz maq thvt tueq; ngaz rueq kuex ruiypvnc pumz maq thvt phaungx,’ ngoz tueq jungx shuiuz,” ngoz tueq jungx kuq tueq.

¹²Nuiyq thuimx yix maq piq rueq tsuingshiq muex khvmc kuq tueq rulc rv-ngvlc Jeroboam nuiyc mungx miqsaz lotlaz kuex Hokhvmx Rehoboam kox nuex kaz yek tueq.

¹³Hokhvmx waz kuex rullungx nyuiuz waz walaungx bix rueq kvmungx tharc jungx tueq kvjaz kuex wvlc guez tvyaungc ruiux,

¹⁴yalxrox bix kvmungx tharc jungx kuq tueq rulc rv-ngvlc miq htenc kvmac bomc laung maq, “Iwaz rueq nuimshiq htauk nuex liz hvlc gurc kuex tvdaungc kuq shec tueq; ngaz rueq kvruex gurc htenc kvyuq liz hvlc hulawx jvt kuq yek phaungx. Piq rueq tsuingshiq kuex ruiyx pumz maq thvt tueq; ngaz rueq kuex ruiypvnc pumz maq thvt phaungx!” ngoz tueq jungx tueq.

¹⁵Kvruex kuex Shilo ghaq wawc shvmmax Ahija maq raz tueq Nebat saz Jeroboam muex jungx kuq tueq kvjaz kuex yaungc wvnc tvkoc Yehowa thuinroc lvmx rvtueq. Kvkhoc rvtueq hokhvmx waz rueq mungx miqsaz kvjaz kuex wvlc guez tvyaungc tueq.

¹⁶Hokhvmx waz rueq tsuingshiq kvjaz tay kuq muq kuex miq htenc rueq khiz vtueq, tsuingshiq rueq, “Dawid nuiyc piq yuimx wuinz kuex legay ix! Naungshiq tvkoc tsuingshiq rueq yvmx shex lac rvkuq phvnx? Israel miqsaz htenc lex, yuimx nuex yek waung wuez ix! Rehoboam kuex piq pumz nuiyc piq mkvlawc kueq!” ngoz tueq guyc wuez tueq. Kvkhoc Israel miqsaz rueq khawx lvlx wvnc vtueq,

¹⁷Rehoboam kuex Yuda mungx nuex httax jix miqsaz htenc kvdvyx guimz lawc tueq.

¹⁸Kvruex yimaq Hokhvmx Rehoboam rueq yauk shuimc vgvrx lawc jix Adoniram kuex Israel miqsaz kox nuex tvkaz tueq, yuq muinz tsuinghez rueq piq kuex lung maq tuip thvt gay tueq. Kvkhoc rvkoq tueq Rehoboam kuex piq mvre renc nuex nyuip yuz wvnc vtueq Yerusalem ghaq nuex yuz wvnc tueq.

¹⁹Kvtanc jauz maq phaungc vtueq ghaqkhux kox wawc Israel miqsaz htenc rueq Dawid hokhvmx daungx kuex khawx lvlx wvnc tueq.

²⁰Jeroboam kuex Ejip mungx maq yek waung tueq thaungc Israel miqsaz htenc rueq tay vtueq, miq htenc rvtuimx yaq kvyuq kay tvkoc gvl ruiux piq kuex Israel hokhvmx muex tvyaungc tueq. Yuda phvnx dvyx Dawid suiuz vsaz hez htauk nuex tvmtuing httax wuez tueq.

²¹Rehoboam kuex Yerusalem nuex httuiuc kaz vtueq, Yuda nuiyc Benjamin phvnx htenc wawc vhvlx pinhtumc nolaungx bix 180,000 kuex tvtuimx taq tueq. Piq rueq ralx tvdung vtueq ghaqkhux kox wawc Israel phvnx htenc kuex piq rueq guimz yaq khung nuex tv-nyuip yek lvp tvkoc hangc taq tueq.

²²Yuq muinz Tishox rueq shvmmax Shemaia muex,

²³vruex bomjungc kuex Rehoboam muex muinz, Yuda phvnx nuiyc Benjamin phvnx htenc muex muinz kuy tvkoc jungx tueq:

²⁴“Israel miqsaz nuimshiq rueq nuimphuz nuimnox shauk kuex khvt mvy muq. Nuimshiq lotlaz yuimx nuex yek wuez kuinz. Yaungx wvnc tueq lvmz kuex ngvy thuinroc lvmx rvtueq.” Tsuingshiq lotlaz kuex Yehowa rueq nvr yaq kvjaz phvnx vtueq yuimx nuex yek waung wuez tueq.

²⁵Israel hokhvmx Jeroboam kuex Ephraim kuz Shekhem ghaq kuex palx ruk vtueq kvyuq vshauk puq httax waung tueq. Kvruex yimaq piq kaz wvnc vtueq Penuel ghaq palx ruk taq tueq.

²⁶Piq rueq, “Ngvy miqsaz htenc kuex Yerusalem nuex kaz vtueq majuiuc httax yaq taungx vwawc htenc vkhoc dvyx raz tueq kvyuq httax yaq Shomc Yuimx nuex, Yehowa muex shomc nawk kuy shomc kuq ruiux yuq, tsuingshiq kuex Yuda Hokhvmx Rehoboam kox nuex thuinz kop wvnc yek vtueq, ngaz kuex thvt gay phuex,” ngoz tueq piq thuinz vmungx maq tvmaung tueq.

²⁸Kvruex lvmz kuex tvmaung lot yix, kuimshawx maq manx pung vnueyc yac kuex tvyuimx lauz vtueq piq miq htenc muex ngoc, “Yerusalem nuex kaz vtueq nawk palx muex nuimshiq tvkoc lvmx vluz khuemc juing yaungx yaq. Kvkhoc rvtueq Israel miqsaz htenc lex, Ejip mungx wawc nuimshiq tvdungc shvlc wvnc jix nuimshiq tishox htenc kuex vruex yuq httax yaq!” ngoz tueq jungx tueq.

²⁹Piq rueq kuimshawx manx pung yac vshiz kuex Bethel nuex, vganc vshiz kuex Dan ghaq nuex taq tueq.

³⁰Kvkhoc rvtueq Bethel nuiyc Dan ghaq nuex kaz ruiux vtueq nawk palx kay ningkhvnc nuex miq htenc rueq mvrax yaq wuez tueq.

³¹Jeroboam rueq kankhux htenc nuex muinz nawk palx juing baung htenc tvhungx ruiux, Lewi phvnx wawc rvmuq yuimx taungx wawc shomc waz bix kuex piq rueq thvl taq tueq.

³²Jeroboam rueq Yuda mungx nuex moalx ruiux yaq moalx ikhoc yapix lex tvjvt raungx 15 nuex nawk palx htungx nuex seng yaq moalx vshiz kuex moalx tvkoc tvhungx taq tueq. Bethel ghaq wawc shomrawx htauk nuex tvhungx taq shec tueq kuimshawx manx pung yac htenc muex shomc nawk kuy shomc kuq vtueq, piq rueq vtvhungx nawk palx juing baung htenc nuex yauk shuimc jix shomc waz bix kuex Bethel ghaq nuex tvhttax tueq.

³³Piq rueq htvp htaz taq shec tueq yapix lex tvjvt raungx 15 raungnuiyq nuex, Bethel nuex piq kaz vtueq Israel miqsaz tvkoc piq rueq vtvhungx taq moalx nuex shomrawx htauk nuex shomc nawk kuy juing shomc kuq tueq.