Read Tase Naga 1 HOKHVMX 16 Bible Online

1 HOKHVMX 16 - Tase Naga bible

1 HOKHVMX 16

¹Yehowa rueq Hanani saz shvmmax Jehu muex kvjak vtueq Baasha tvkoc vruex bomjungc kuex piq muex kuq tueq:

²“Mnoz kuex yvmx rvmuq miq yaungx vtuiux, yuq muinz mnoz kuex ngvy miqsaz Israel walaungx muex tvyaungc phaungx. Majuiuc kuex Jeroboam ikhoc mnoz mvrax yaq vtueq, ngvy miqsaz htenc kuex mvrax lvmx nuex shvlx laq toq. Tsuingshiq rueq shuimx yaq mvrax htenc rueq ngvy thuinz tvkhaq yaq,

³Jeroboam muex ngaz rueq rvkuq tauk ikhoc mnoz nuiyc m-yuimx wuinz htenc ngaz rueq ruez shaungx.

⁴Ghaqyungx mungx nuex m-yuimx wuinz mruex jix dvyx thueyc ruiux muinz guyhex htenc rueq phuiuz gay rvhumc tuex, jumx khuix yaruix nuex mruex jix dvyx thueyc ruiux muinz lawtawx htenc rueq phuiuz gay rvhumc tuex.”

⁵Baasha rueq shuimx lvmz wvnc tueq phvnx ruip saz rvtueq piq rueq khvmc wvnc tueq yauk shuimc htenc kuex Yuda Hokhvmx bix Mvnphvnc Luik nuex wuiyq tvtsuingc shec tueq.

⁶Baasha thueyc kaz koq tueq Tirza ghaq nuex luip tueq, vsaz El kuex piq httungx nuex hokhvmx yaungx wvnc tueq.

⁷Yehowa muex yaq gay tueq Baasha mvrax htenc ningkhvnc nuex Baasha nuiyc piq yuimx wuinz htenc kuex khawc lvlc tvkoc Yehowa kox wawc dung tueq bomjungc kuex shvmmax Jehu maq tvlvy jungx kuq tueq. Piq max wawc Hokhvmx Jeroboam rueq ikhoc mvrax yaq wvnc tueq kvdvyx muinz rvmuq, Jeroboam yuimx wuinz htenc lotlaz muinz piq rueq thvy gay ningkhvnc nuex, Yehowa kuex piq muex thuinkhaq tueq.

⁸Yuda Hokhvmx Asa rueq guimz lawc wvnc tueq wawc 26 nuex Baasha saz El kuex Israel hokhvmx yaungx wvnc vtueq Tirza ghaq nuex guimz lawc wvnc tueq.

⁹Piq vyungx vlaungx washiz rvtueq Zimri kuex hokhvmx waz nolaungx renc htenc kholak kuex tvkuiux raz shunshvlc jix waz rvtueq. Piq kuex khawc lvlc muex kvmungx tueq. Raungnuiyq shiz nuex Tirza ghaq mungx wawc hoc yuimx nuex tvkuiux raz shunshvlc jix Arza yuimx nuex El kuex joal pawx rvtueq.

¹⁰Zimri kuex yuimx mungx kvyuq nyuip waung vtueq El kuex thvt gay ruiux, piq kuex hokhvmx muex yaungx tueq. Yuda Hokhvmx Asa rueq guimz lawc tueq wawc 27 nuex kv-khoc yaungx tueq.

¹¹Zimri kuex hokhvmx yaungx wvnc tueq rulc vdvmz Baasha yuimx wuinz htenc lotlaz thvt gay tueq. Vphvnx vmaq nuiyc vkung vkamz jix htenc wawc miqwaz rulx htenc kuex thvt gay tsuiyc tueq.

¹²Kvkhoc rvtueq Baasha nuex seng vtueq shvmmax Jehu maq raz tueq Yehowa rueq jungx tueq rulc rv-ngvlc Zimri rueq Baasha yuimx wuinz htenc lotlaz thvt gay tueq.

¹³Yac yuimx nawk palx htungx vlayx ningkhvnc nuex muinz, Israel kuex mvrax lvmx nuex lvmx shvlc tvyaq ningkhvnc nuex muinz, Baasha nuiyc vsaz El rueq Yehowa Israel Tishox thuinz tvkhaq tueq.

¹⁴El rueq shuimx lvmz wvnc tueq phvnx ruip saz kuex Israel Hokhvmx bix Mvnphvnc Luik nuex wuiyq tvtsuingc shec tueq.

¹⁵Yuda Hokhvmx Asa rueq guimz lawc wvnc tueq wawc 27 nuex, Zimri kuex Tirza ghaq nuex raungx mvshix dvyx hokhvmx yaungx tueq. Kvkaq Israel nolaungx bix kuex Philistin mungx wawc Gibethon ghaq kuex tuimx wvnc vtueq,

¹⁶Zimri rueq hokhvmx waz kuex khuyx vtueq thvt gay tueq thaungc kuex tsuinghez rueq tay vtueq, tsuinghez lotlaz rueq muinz tsuingshiq guimz lawc jix Omri kuex Israel hokhvmx muex tvyaungc tueq.

¹⁷Omri nuiyc piq nolaungx bix kuex Gibethon ghaq maq kvtenc waung wvnc vtueq Tirza ghaq kuex tuimz wvnc tueq.

¹⁸Kvruex ghaqyungx rul wvnc tueq kuex Zimri rueq khiz vtueq, hokhvmx hoc mungx nolaungx ghaqshungc mungx kvyuq nyuip waung vtueq hokhvmx hoc kuex jauk gay ruiux, piq muinz wvrluic yaq mungx kvyuq thueyc wvnc tueq.

¹⁹Kvruex kuex Yehowa muex khawx lvlx tueq mvrax ningkhvnc nuex rvtueq. Piq max wawc Jeroboam ikhoc Israel miqsaz kuex mvrax lvmx nuex lvmx shvlc tvyaq tueq piq mvrax htenc nuiyc Yehowa thuinz tvbac kuy ningkhvnc nuex kv-khoc yaungx wvnc tueq.

²⁰Zimri rueq shuimx lvmz wvnc tueq phvnx ruip saz rvtueq piq rueq khawx lvlx wvnc tueq yauk shuimc kuex Israel Hokhvmx bix Mvnphvnc Luik nuex wuiyq tvtsuingc shec tueq.

²¹Israel miqsaz htenc kuex rv-phvlc wvnc tueq: wvyvmc rueq Ginat saz Tibni kuex hokhvmx muex tvyaungc roc rvtueq, vganc phungc shiz rueq kuex Omri dvyx roc yaq.

²²Tvsuip nuex Omri miq hez rueq taungx wvnc tueq: Tibni kuex thueyc kaz ruiux Omri kuex hokhvmx yaungx tueq.

²³Kvkhoc rvtueq Yuda Hokhvmx Asa rueq guimz lawc wvnc tueq wawc 31 nuex, Omri kuex Israel hokhvmx yaungx vtueq wawc 12 tup guimz lawc tueq. Vphaungc wawc tvruk kuex Tirza ghaq maq guimz lawc ruiux,

²⁴kvruex yimaq piq rueq vmuingc Shemer ngoz yaq waz kox wawc Samaria kanx kuex kuimphox sawx 6,000 maq ruiyx tueq. Omri rueq kvruex kanx kvyuq nolaungx ghaqshungc tec ruiux miqghaq tec tueq, kvruex ngoc kungkhux wawc ghaq taungjix waz Shemer muingc tv-phvnc vtueq Samaria ghaq ngoz tueq muingc tueq.

²⁵Omri kuex piq max wawc phukhux walaungx bix htauk nuex jvnc vtueq Yehowa muex yaq wvnc tueq.

²⁶Piq max wawc Jeroboam rueq ikhoc piq rueq vshuimc tvyaq tueq mvrax htenc nuiyc miq htenc kuex mvrax lvmx nuex lvmx shvlc tvyaq ruiux, yac yuimx nawk palx htungx phvnx vtueq Yehowa Israel Tishox thuinz tvkhaq tueq.

²⁷Omri rueq shuimx lvmz wvnc tueq phvnx ruip saz nuiyc piq rueq tvlot shuimc wvnc tueq lotlaz kuex Israel Hokhvmx bix Mvnphvnc Luik nuex wuiyq tvtsuingc shec tueq.

²⁸Omri thueyc kaz koq tueq Samaria ghaq nuex luip tueq. Vsaz Ahab kuex piq httungx hokhvmx yaungx tueq.

²⁹Yuda Hokhvmx Asa rueq guimz lawc wvnc tueq wawc 38 nuex, Omri saz Ahab kuex Israel hokhvmx yaungx vtueq Samaria ghaq nuex wawc 22 guimz lawc tueq.

³⁰Piq muinz piq max wawc phukhux walaungx bix htauk nuex muinz vjvnc Yehowa muex yaq gay tueq.

³¹Hokhvmx Jeroboam rueq ikhoc mvrax shuimc kuex piq tvkoc hungx muq shauk muex yaungx tueq, kvkhoc rvtueq Sidon Hokhvmx Ethbala saz Jezebel kuex lvmz vtueq, Bala kuex nawk palx tueq.

³²Piq rueq Samaria ghaq nuex Bala tvkoc shomc yuimx vshiz guirx ruiux piq tvkoc shomrawx vshiz tvhungx vtueq kvruex shomc yuimx mungx nuex taq tueq.

³³Piq rueq Ashera tishox nyuiuz yac yuimx vshiz muinz tvhtuic guirx taq tueq. Piq kuex piq max wawc Israel hokhvmx bix lotlaz htauk nuex muinz vjvnc Yehowa Israel Tishox thuinz tvkhaq tueq.

³⁴Piq hokhvmx yaungx tueq baunglaung Bethel ghaq jix Hiel rueq Yerikho ghaq kuex tec yek tueq. Yehowa rueq Nun saz Yoshua muex tvluz nuex jungx wvnc tueq rulc rv-ngvlc, Yerikho ghaq tec phaungc wvnc tueq nuex vsaz pekhux waz Abiram thueyc kaz tueq, ghaq palx kaluix htenc guirx tueq nuex vsaz nox yix tvsuip waz Segub kuex thueyc kaz tueq.