Read Tase Naga 1 HOKHVMX 17 Bible Online

1 HOKHVMX 17 - Tase Naga bible

1 HOKHVMX 17

¹Gilead mungx Tishbe ghaq jix vmuingc Eliya ngoz yaq shvmmax washiz rueq Hokhvmx Ahab muex ngoc, “Yehowa muingc maq muinz, ngaz rueq shuimx kuq vshaungx vtvraungx httax yaq Israel Tishox maq muinz ngaz rueq jungx yek shaungx nuex httuiuc laz, vruex wawc nueyc wawc thuimx vyuq buing muinz dvy muq, raungx muinz yunx muq rvtuex kuex ngaz rueq mnoz muex jungx vphaungx,” ngoz tueq jungx tueq.

²Kvkaq Yehowa rueq Eliya muex ngoc,

³“Vruex ghaq vmaq kaz wvnc ruiux shaldungc kox nuex kvnvp kaz wvnc vtueq, Yodan ruilx maq shaldungc kox Kerit ruilx hep nuex mpumz kuex kvhttuiyq httax kaz kuiuz.

⁴Kvruex yuix saz ruilx rueq mnuingc juing yuix kuq kv-phux, ngaz rueq nvr shaungx rulc rv-ngvlc wuzkhax htenc rueq muinz kvyuq mnoz muex phuiuz vsvy lvmz kuq laq kv-phux,” ngoz tueq jungx tueq.

⁵Eliya kuex Yehowa rueq nvr yaq kvjaz kuex phvnx vtueq, Kerit yuix saz ruilx nuex httax kaz tueq.

⁶Wuzkhax rueq piq phuiuz svy juing wanx nuiyc jac kuex raungx nvp tek, raungyac tek lvmz kuq laq ruiux shuex, yuix saz ruilx wawc yuix kuex piq rueq nuingx lvp yaq.

⁷Vshauk puq httax tueq yix maq raungx ranx wvnc vtueq yuix saz ruilx kvmuinz ruic kaz tueq.

⁸Kvkaq Yehowa rueq Eliya muex ngoc,

⁹“Majuiuc mnoz kuex Sidon ghaq hep wawc Zarephat ghaq nuex httax kaz kuiuz. Kvruex ghaq wawc mvntix nyuiuz rueq mnoz muex kuy phuiuz svy tvkoc ngaz rueq nvr tauk,” ngoz tueq jungx tueq.

¹⁰Kvkhoc rvtueq Eliya kuex Zarephat nuex kaz wvnc tueq, palx kaluix nuex piq httuiuc kaz koq tueq, janx vhtuimx mvntix nyuiuz shiz kuex khiz tueq. Eliya rueq piq muex ngoc, “Kejux maq yuix vnuingc juing raungluingx kuq koq,” ngoz tueq.

¹¹Piq kuex yuix lvmc kay ngoz koq tueq Eliya rueq, “Kejux maq wanx muinz raungluingx lvmz laq loq,” ngoz tueq ramc jungx tueq.

¹²Piq rueq, “Ngaz kox nuex wanx phushiz muinz vguez lvmz kuex vtvraungx httax yaq Yehowa m-Tishox muex kvtuemc vtaungx. Panx nuex wansawx yauk khunc shiz saz nuiyc tuik nuex olip puiz raungluingx saz dvyx httax yaq. Kvruex kuex ngaz rueq vlvp lotlaz rvtueq, vruex wawc janx raungluingx kuex ngaz rueq htuimx ruiux yuimx nuex gurx wvnc vtueq isaz nvnueyc tvkoc raungluingx saz maq tvhungx vshaungx. Kvruex wanx kuex isaz nvnueyc tvkoc vtvsuip phuiuz svy shex rvtueq, kvruex yimaq kuex rvmc rueq thueyc juing dvyx shex rvtueq,” ngoz tueq jungx tueq.

¹³Eliya rueq piq muex ngoc, “Nauk tvmaung kaz, kungkhux waung vtueq nuimshiq phuiuz vsvy kuex tvhungx woz kuiuz. Yuq muinz mnoz rueq lvp toq wawc wanx raungluingx vphaungc tvhungx vtueq ngaz muex kuq kaz loq, kvruex yix maq jix nuimnueyc saq nyuiuz tvkoc wanx kuex tvhungx shuiuz.

¹⁴Yvmx khoc lac ngoz ruiux lec Yehowa Israel Tishox rueq vkhoc jungx yaq: ‘Ngaz, Yehowa rueq raungx max tvyunc wawwawx panx wawc wanx kuex rvpat tuex rvmuq, tuik wawc vpuiz tix muinz rvpat tuex rvmuq,’” ngoz tueq jungx tueq.

¹⁵Eliya rueq jungx tueq rulc rv-ngvlc mvntix nyuiuz rueq muinz tvhungx woz tueq, tsuinghez lotlaz rueq raungnuiyq paunghvlc tvkoc phuiuz svy hungx laz htaungx laz lvp taq shec tueq.

¹⁶Yehowa rueq Eliya maq bomkhvmc kuq tueq rulc rv-ngvlc panx wawc wansawx rvpat muq, tuik wawc vpuiz tix muinz rvpat muq.

¹⁷Httax tueq maq vluz nuex shex mvntix nyuiuz saz kuex vthuiuz rvkaz tueq; piq thuiuz hvlc thuiuz sac wvnc vtueq, vthueyc rvkaz tueq.

¹⁸Mvntix nyuiuz rueq Eliya muex ngoc, “Tishox miq waz lex, yvmx ngoz tueq lac vkhoc ngaz muex rvkuq phux? Tishox rueq ngvy mvrax kuex tvsvmz kuq ruiux, isaz kuex tvthueyc gay tvkoc vyuq mnoz httuiuc kaz ruiux nyix?” ngoz tueq.

¹⁹Eliya rueq, “Nox kuex ngaz muex kuq koq,” ngoz tueq. Eliya rueq vnyuiuz yauk wawc tenz pvmx ruiux, piq yuip chuing raungx htvp khok nuex pix wvnc vtueq woalchuing nuex tvwoalc tueq.

²⁰Kvruex yimaq piq rueq, “O Yehowa ngvy Tishox lex, mnoz rueq yvmx ngoz tueq lac vkhoc kawc yawc juing phvnx vruex mvntix nyuiuz vmac ruez kuq tonx? Piq rueq ngaz muex hungx laz tanc khvnc menjenc kuq vtueq ngaz muex lawc mawc kuq phuex, majuiuc mnoz rueq vsaz kuex thvt gay toq nyix!” ngoz tueq vjux thoz tueq.

²¹Kvruex yimaq Eliya rueq piq shauk pumz kuex nox htauk kvyuq lauk thuimx bumx vtueq, “O Yehowa ngvy Tishox lex, vruex nox vmac thuiuzthuic htawc kuq yek koq!” ngoz tueq vjux thoz tueq.

²²Yehowa rueq muinz Eliya vjux thoz bomc kuex tvralc kuq ruiux; nox nuex thuiuzthuic nyuip wvnc yek vtueq tvraungx wvnc yek tueq.

²³Kvkhoc Eliya rueq nox kuex tvjvp ruiux ghaq htvp nuex shvlx laq vtueq vnyuiuz muex ngoc, “Lawc shuiuz, msaz kuex vtvraungx!” ngoz tueq.

²⁴Piq rueq muinz, “Mnoz kuex Tishox miq waz rvtoq nuiyc Yehowa kuex mnoz maq vsuingc suing bomkhvmc httax yaq kuex majuiuc ngaz rueq tuiuz tauk shex!” ngoz tueq tvralc tueq.