Read Tase Naga 1 HOKHVMX 19 Bible Online

1 HOKHVMX 19 - Tase Naga bible

1 HOKHVMX 19

¹Hokhvmx Ahab kuex Eliya rueq shuimx wvnc tueq phvnx ruip saz nuiyc Bala shvmmax bix lotlaz thvt gay tueq lvmz kuex vtaungx nyuiuz Jezreel muex jungphvnx kuq tueq.

²Jezreel rueq Eliya muex bomjungc tvtay tueq: “Invp raungnvp vtanc jauz, shvmmax bix kuex mnoz rueq ruez toq kvrulc rv-ngvlc mnoz kuex ngaz rueq ruez mauk ngoz ruiux yuq, tishox htenc rueq ngaz kuex tvthueyc laz mthvt gay phueq.”

³Eliya kuex hiz vtueq piq rullungx luenx tvkoc yuz wvnc muex piq nvrc waz kuex shvlx laq vtueq Yuda mungx Bersheba ghaq nuex kaz wvnc tueq. Kvruex yuq vnvrc waz kuex taq ishec ruiux,

⁴Eliya kuex yaruix rumz nuex raungnuiyq nuiyq tuimc khuemx kaz wvnc tueq. Piq kuex pulx jungx vshiz buingc khung nuex ngaungc vtueq, piq vthueyc kay roc lvmz kuex thoz tueq. Piq rueq, “Yehowa lex, kvruex kuex vjvnc shex; ngvy thuiuzthuic kuex lvmz gay koq; ngaz kuex vthueyc raung dodoc rvtueq!” ngoz tueq vjux thoz tueq.

⁵Piq kuex pulx jungx yaz nuex woalc vtueq kv-tsoalx kaz tueq. Raungkamx waz kuex huingc rvhek maq piq kuex htuinc vtueq, “Kvtenc vtueq dungc saq shuiuz,” ngoz kuq tueq.

⁶Piq rueq tvroz nuex lawc koq tueq, vkhux kox nuex wanx poshiz rac yuix khvp rac httax yaq kuex khiz tueq. Piq rueq phauk saq ruiux kv-tsoalx wvnc yek tueq.

⁷Yehowa raungkamx waz kuex lauk nueyc ngoc yaungc kaz yek vtueq piq kuex tvsvmc ruiux, “Kvtenc vtueq dungc saq shuiuz, vruex lvmx khuemc kuex mtvkoc songhvlc rvtuex,” ngoz tueq jungx tueq.

⁸Eliya kuex kvtenc vtueq phauk saq ruiux, vsawc kanx ngoz yaq Sinai nuex raungx 40 tup lvmx khuemc tvkoc vruex phuiuz svy rueq piq muex hungc vlaungc hungx laz kuq tueq.

⁹Piq kuex raungwvrx tvlvy muex ngoz tueq, lungshaung vshiz nuex nyuip waung tueq. Kvkaq Yehowa kuex huingc rvhek maq httuiuc kaz vtueq, “Eliya lex, vruex yuq mnoz rueq yvmx lac ruez vshuiux?” ngoz tueq wiz tueq.

¹⁰Piq rueq, “Tvphaungc Tvsuip Yehowa Tishox lex, ngaz rueq mnoz washiz muex dvyx mkaq muinz shuimx kuq vphaungx. Yuq muinz Israel miqsaz htenc rueq mnoz rulc vtaq bomkhvrc kuex tvbac gay ruiux, mshomrawx htenc kuex httak gay vtueq mshvmmax htenc lotlaz thvt gay tueq. Ngaz dvyx shex kvjungx vtaungx, tsuingshiq rueq ngvy thvy gay tvkoc thuiyx wuez yaq,” ngoz tueq tvralc tueq.

¹¹Yehowa rueq piq muex ngoc, “Dung kaz vtueq kankhux htauk ngvy khaungkac nuex jvp kuiuz,” ngoz tueq jungx tueq. Kvruex yimaq Yehowa kuex lvy wvnc vtueq ghaqluimx htenc kuex tvkhoz tvbunx gay ruiux, lung rauk htenc tvbunx gay yaq raunghtiq raungguil kuex tvkaz tueq, yuq muinz Yehowa kuex raungguil nuex lomx yaq rvmuq. Raungguil thauk kay yix gaqyung mux tueq, yuq muinz Yehowa kuex gaqyung mux nuex lomx yaq rvmuq.

¹²Gaqyung mux yix maq wvr dung tueq, yuq muinz Yehowa kuex wvr nuex lomx muq. Wvr dungc yix maq nyenz taungtaung hvlc tvruingc kuex dung wvnc tueq.

¹³Eliya rueq kvruex tvruingc kuex tay vtueq, piq htvlx phawc kuex piq khvy maq puingc ruiux lungshaung kvlc nuex jvp kaz tueq. Kvkaq tvruingc vshiz rueq piq muex ngoc, “Eliya lex, vruex yuq mnoz yvmx lac ruez vshuiux?” ngoz tueq wiz tueq.

¹⁴Eliya rueq, “Tvphaungc Tvsuip Yehowa Tishox lex, ngaz rueq mnoz muex dvyx mkaq muinz shuimx kuq wvnc phaungx. Yuq muinz Israel miqsaz htenc rueq mnoz rulc vtaq bomkhvrc kuex tvbac gay ruiux, mshomrawx htenc kuex httak gay vtueq mshvmmax htenc lotlaz kuex thvt gay tueq. Ngaz dvyx shex kvjungx vtaungx, ngvy thvy gay tvkoc tsuingshiq rueq thuiyx wuez yaq,” ngoz tueq tvralc tueq.

¹⁵Yehowa rueq, “Damasku ghaq hep wawc yaruix rumz nuex yek kaz vtueq, kvruex yimaq ghaqyungx kvyuq nyuip ruiux, Hazael kuex Siria hokhvmx yaungc muex ruimruimx kuq shuiuz;

¹⁶Israel hokhvmx yaungc tvkoc Nimshi saz Jehu kuex ruimruimx kuq shuiuz, mpumz httungx muex shvmmax kuex Abel Mahola ghaq jix Shaphat saz Elisha kuex ruimruimx kuq shuiuz.

¹⁷Hazael yauk nuex thueyc juing wawc luenx wvnc jix ukhaq yuq muinz Jehu rueq thvt gay shuex. Jehu yauk wawc luenx wvnc jix ukhaq yuq muinz Elisha rueq thvy gay rvhumc tuex.

¹⁸Yuq muinz Bala muex bumx kuq muq nuiyc piq yac yuimx kuex shup muq maq, ngaz nuex tvmtuing httax yaq htenc lotlaz Israel mungx wawc miq 7,000 kuex ngaz rueq tvraungx taq yek shaungx,” ngoz tueq jungx tueq.

¹⁹Eliya kuex dung kaz koq tueq manx pung pangx shiz maq nax htuz yaq Elisha rulc rvhumc tueq; piq khaungx tvmax kox nuex manx pung pangx rokshiz rac vshiz httax yaq, piq kuex vtvsuip manx pung pangx kvmaq nax htuz yaq. Eliya rueq piq khvy kuex put vtueq Elisha htauk nuex tvsvmc kuq tueq.

²⁰Kvkaq Elisha rueq piq manx pung pangx htenc kuex taq gay shec ruiux, Eliya yix nuex phvnx wvnc naungx vtueq, “Inyuiuz nuiyc iwaz kuex shup vtueq rvbomc kaz phaungx, kvruex yimaq jix m-yix nuex phvnx naungx phaungx,” ngoz tueq tvralc tueq. Eliya rueq, “Vhvlx, yek woz kuiuz. Ngaz rueq mnoz muex tvwanc mauk!” ngoz tueq tvralc kuq tueq.

²¹Kvruex yimaq Elisha kuex piq manx pung pangx vshiz httax yaq kvyuq kaz wvnc vtueq kvruex htenc kuex thvt ruiux, htvyc htenc kuex janx muex tvyaungc vtueq ngvmx kuex lumc tueq. Piq rueq miq htenc muex lumc kuy ningkhvnc nuex tsuinghez rueq muinz kvruex phauk wuez tueq. Kvruex yimaq piq kuex Eliya muex romc kuy tvkoc piq yix nuex phvnx wvnc naungx tueq.