Read Tase Naga 2 HOKHVMX 13 Bible Online

2 HOKHVMX 13 - Tase Naga bible

2 HOKHVMX 13

¹Yuda hokhvmx Ahazia saz Joash rueq guimz lawc tueq wawc 23 nuex, Jehu saz Jehoahaza kuex Israel hokhvmx muex yaungx vtueq, Samaria ghaq nuex wawc 17 guimz lawc tueq.

²Piq max wawc Hokhvmx Jeroboam rueq ikhoc Yehowa muex yaq gay ruiux Israel miqsaz htenc kuex mvrax lvmx nuex shvlx tueq, piq rueq shuimx wvnc tueq layx bac yauk shuimc kuex mkaq muinz tuip gay lot muq.

³Kvkhoc rvtueq Yehowa kuex Israel muex thuinkhaq vtueq, Siria Hokhvmx Hazael nuiyc vsaz Benhadad muex lauk wvruip ruip tvtaungx gay tueq.

⁴Kvruex yimaq Jehoahaza rueq Yehowa kox wawc vjux thoz koq tueq, Israel miqsaz htenc Siria hokhvmx rueq mtanc khvnc lac guirguenz tuinghtuing yaq nguinx kuex Yehowa rueq khiz vtueq, piq vjux thoz bomc kuex tay kuq tueq.

⁵Yehowa rueq Siria miqsaz yauk wawc tsuingshiq kuex palx wvnc jix vyungx vlaungx washiz Israel kox nuex tvkaz koq tueq, kungkhux nuex ikhoc nomic maq httax tueq.

⁶Yuq muinz Israel miqsaz htenc muex lvmx shvlc tvyaq jix Hokhvmx Jeroboam mvrax kuex tsuingshiq rueq tuip gay lot muq, kvruex yuq tsuingshiq yaq ruq dvyx yaq vtueq, Ashera tishox nyuiuz yac yuimx kuex Samaria ghaq nuex httax hvt dvyx rvtueq.

⁷Siria hokhvmx rueq kvjungx yaq miq htenc kuex tvbac gay ruiux tsuingshiq kuex bokkhuyx ikhoc nyet nuiuz gay koq tueq, mvre nuex ngaungc jix waz 50, nolaungx renc rokshiz, yaz sawx maq khuemc jix nolaungx bix 10,000 dvyx shex tvjungx taq ruiux, vganc Jehoahaza nuex koz vlaq shuimc jix nolaungx ghaqshungc yvmx muinz lvp muq shex.

⁸Jehoahaza rueq shuimx wvnc tueq phvnx ruip saz ngoc juing piq shvrvyx nolaungx kvmungx lvmz htenc kuex Israel Hokhvmx Mvnphvnc luik nuex wuiyq tvtsuingc shec tueq.

⁹Piq thueyc kaz koq tueq Samaria ghaq nuex luip tueq, vsaz Jehoash kuex piq httungx nuex hokhvmx muex yaungx tueq.

¹⁰Yuda Hokhvmx Joash rueq guimz tueq wawc 37 nuex Jehoahaza saz Jehoash kuex Israel hokhvmx muex yaungx vtueq, Samaria ghaq nuex wawc 16 guimz lawc tueq.

¹¹Piq muinz Israel miqsaz htenc kuex mvrax lvmx nuex lvmx shvlc tvyaq jix Hokhvmx Jeroboam layx vbac honc vyaungc kuex phvnx vtueq Yehowa muex khawc lvlc mvrax pinhtumc yaq tueq.

¹²Jehoash rueq shuimx wvnc tueq phvnx ruip saz ngoc juing Yuda Hokhvmx Amazia kuex khvt tueq lauk wawc piq shvrvyx laqkongx yauk shuimc htenc kuex Israel Hokhvmx Mvnphvnc luik nuex wuiyq tvtsuingc shec tueq.

¹³Jehoash thueyc kaz koq tueq Samaria ghaq wawc hokhvmx luip ruiuz khux nuex luip tueq, vsaz Jeroboam II kuex piq httungx nuex hokhvmx muex yaungx tueq.

¹⁴Shvmmax Elisha kuex thueyc khvmkhvmz vmac vtsac maq thuiuz sac rvhumc tueq, piq kuex woalchuing nuex woalc hvt kvyuq Israel Hokhvmx Jehoash kuex piq lawc kay httuiuc kaz tueq. Kvkaq piq kuex vhtaq maq vkhoar, “Iwaz lex, iwaz lex! Mnoz kuex Israel tvkoc ngauz vngax hungc vlaungc maq tvkhup wungx kuy jix waz rvtoq!” ngoz tueq guyc sez jungx tueq.

¹⁵Elisha rueq, “Laq vshiz rac laqsvnz wvyvmc kuex lvmz laq loq,” ngoz tueq nvr tueq. Jehoash rueq muinz lvmz laq koq tueq,

¹⁶Elisha rueq piq muex laq kuex ngut shuiuz, ngoz koq tueq hokhvmx waz rueq ngut taq tueq. Kvkaq Elisha rueq vyauk kuex hokhvmx waz yauk htauk nuex tvdaungc tueq.

¹⁷Shvmmax waz rueq jungx tueq rulc rv-ngvlc hokhvmx waz rueq muinz Siria mungx kox nuex muiz yaq kox kvyuq katvnc puc kuex daz koq tueq Elisha rueq, “Laqsvnz kuex gap shuiuz!” ngoz tueq nvr tueq. Hokhvmx waz rueq laqsvnz kuex gap koq tueq shvmmax waz rueq, “Mnoz kuex Yehowa laqsvnz rvtoq, kvruex maq Siria mungx kuex taungx gay shuiux. Tsuingshiq kuex mnoz rueq taungx gay shuiux nuex httuiuc laz Siria miqsaz htenc kuex Aphek ghaq nuex mnoz rueq khvt gay shuiux,” ngoz tueq jungx tueq.

¹⁸Kvruex yimaq Elisha rueq hokhvmx waz muex laqsvnz vganc tauk tvlvmz vtueq, ghaq kvyuq wung shuiuz ngoz tueq. Hokhvmx waz rueq muinz ghaq nuex lauk thuimx wung ruiux taq gay tueq.

¹⁹Kvkhoc ningkhvnc nuex Elisha kuex vthuinz khaq vtueq hokhvmx waz muex ngoc, “Mnoz rueq lauk bv-ngac lauk tvruk wungc juing rvhvt maq, kvkhoc ngoz ruiux Siria miqsaz kuex lotlaz taungx gay khvmz toq; yuq muinz majuiuc kuex mnoz rueq tsuingshiq kuex lauk thuimx dvyx taungx shuiux,” ngoz tueq jungx tueq.

²⁰Elisha thueyc kaz koq tueq luip shec tueq. Moba miqsaz phungc shiz rueq Israel mungx kuex wawc tek khvt kaz ruiux tuex.

²¹Laukshiz miq maungx luip baunglaung nuex miq kungshiz kaz yaq kuex khiz vtueq, miq htenc rueq miq maungx kuex Elisha luip ruiuz khux nuex tuip gay shec ruiux yuz wvnc wuez tueq. Kvkaq kvruex miq maungx kuex Elisha ruk vrawz nuex kvtungc kvheq rac dvyx yuing wvnc vtueq kvtenc jvp kaz tueq.

²²Jehoahaza rueq guimz lawc wvnc tueq pat wvlex, Siria Hokhvmx Hazael rueq Israel miqsaz htenc kuex guirguenz wvnc tueq,

²³yuq muinz Abraham, Esak, Yaku hez rulc vtaq vpiq bomkhvrc ningkhvnc nuex Yehowa rueq tsuingshiq muex menjenc kuq tueq. Vpiq rueq tsuingshiq kuex tvbac gay tvrvhumc roc muq rvtueq tsuingshiq muex romc kuq tueq. Vpiq miqsaz kuex vpiq rueq mkaq muinz lauk gay muq.

²⁴Siria Hokhvmx Hazael thueyc kaz koq tueq, vsaz Benhadad kuex hokhvmx muex yaungx tueq.

²⁵Israel Hokhvmx Jehoash rueq Benhadad kuex lauk thuimx khvt taungx gay tueq, Jehoash waz Jehoahaza rueq guimz lawc tueq jauz Benhadad rueq vkhvt taungx gay ghaqyungx htenc kuex tvyez lvp yek tueq.