Read Tase Naga 2 HOKHVMX 15 Bible Online

2 HOKHVMX 15 - Tase Naga bible

2 HOKHVMX 15

¹Israel Hokhvmx Jeroboam II rueq wawc 27 guimz lawc tueq nuex Amazia saz Uzia kuex Yuda hokhvmx yaungx tueq,

²piq rullungx kuex wawc 16 rvtueq; piq rueq Yerusalem nuex wawc 52 tup guimz lawc tueq. Vnyuiuz kuex Yerusalem ghaq jix Jekolia rvtueq.

³Piq kuex vwaz honc vyaungc phvnx vtueq, Yehowa rueq raungc raq yaq lvmz kuex shuimx lvmz tueq.

⁴Yuq muinz yac yuimx muex nawk palx juing baung htenc kuex tvbac gay muq ningkhvnc nuex, miq htenc rueq kvruex htenc kvyuq shomc nawk kuq vtueq vhomc vtumc phvnx htenc jauk shomc wuez tueq.

⁵Yehowa rueq Uzia muex vshungx vshoyx thuiuz sac tvkop vtueq, piq vthueyc nuex httuiuc laz piq nuex kop tueq. Piq kuex yuimx vshiz nuex piq dvyx httax vtueq yauk shuimc kuex yvmx muinz gurx pix muq, vsaz Jotham rueq dvyx mungx kuex shuimx tueq.

⁶Uzia rueq shuimx wvnc tueq phvnx ruip saz lvmz htenc kuex Yuda Hokhvmx bix Mvnphvnc luik nuex wuiyq tvtsuingc shec tueq.

⁷Uzia thueyc kaz koq tueq Dawid Ghaqyungx wawc hokhvmx luip ruiuz khux nuex luip tueq, vsaz Jotham kuex piq httungx nuex hokhvmx yaungx tueq.

⁸Yuda Hokhvmx Uzia rueq guimz lawc tueq wawc 38 nuex, Jeroboam II saz Zecharia kuex Israel hokhvmx muex yaungx vtueq, Samaria ghaq nuex yapix lex tvruk guimz lawc tueq.

⁹Piq kuex piq max wawc phuz khux walaungx bix rueq ikhoc Yehowa muex mvrax yaq tueq. Israel muex mvrax lvmx nuex lvmx shvlc tvyaq jix Nebat saz Hokhvmx Jeroboam layx vbac lvmx kuex phvnx tueq.

¹⁰Jabesh saz Shallum rueq Hokhvmx Zecharia kuex vyumx maq khuyx vtueq Ebleam maq piq kuex thvt gay ruiux, piq httungx nuex hokhvmx yaungx wvnc tueq.

¹¹Zecharia rueq shuimx wvnc tueq phvnx ruip saz kuex Israel Hokhvmx bix Mvnphvnc luik nuex wuiyq tvtsuingc shec tueq.

¹²Kvkhoc rvtueq vkhoc yaungx wvnc tueq lvmz kuex Yehowa rueq Hokhvmx Jehu muex ngoc, “Msuiuz msaz htenc kuex pat bvlic nuex httuiuc laz[7] Israel hokhvmx htenc muex yaungx tuex,” ngoz tueq bomkhvmc kuex hungx wvnc tueq.

¹³Yuda Hokhvmx Uzia rueq guimz lawc tueq wawc 39 nuex, Jabesh saz Shallum kuex Israel hokhvmx muex yaungx vtueq Samaria ghaq nuex yapix lex shiz dvyx guimz lawc tueq.

¹⁴Gadi saz Menahem kuex Tirza ghaq maq Samaria nuex kaz vtueq Shallum kuex vyumx maq khuyx thvt gay ruiux, piq httungx nuex hokhvmx muex yaungx tueq.

¹⁵Shallum rueq shuimx wvnc tueq phvnx ruip saz kuex Israel Hokhvmx bix Mvnphvnc luik nuex wuiyq tvtsuingc shec tueq.

¹⁶Menahem kuex Tirza ghaq maq kaz wvnc yaq nuex Tappua ghaq nuiyc kvruex ghaqyungx wuinz htenc kuex piq khung nuex nyuip muq ningkhvnc nuex, kvruex ghaq nuiyc tvroz wawc miqghaq htenc kuex lotlaz tvbac gay tueq. Piq rueq wvgvnz nyuiuz tamx wuk htenc doc muinz gauk gay tsuiyc tueq.

¹⁷Yuda Hokhvmx Uzia rueq guimz lawc tueq wawc 39 nuex, Gadi saz Menahem kuex Israel hokhvmx muex yaungx vtueq Samaria ghaq nuex wawc rokshiz tup guimz lawc tueq.

¹⁸Piq rueq muinz Yehowa muex mvrax yaq gay ningkhvnc nuex piq thueyc kaz tueq raungnuiyq nuex httuiuc laz, Israel kuex mvrax lvmx nuex lvmx shvlc tvyaq jix Nebat saz Hokhvmx Jeroboam layx vbac honc vyaungc kuex phvnx tueq.

¹⁹Asiria honoc Tiglat Pileser rueq Israel mungx nuex nyuip vtueq khvt tueq nuex, Menahem rueq muinz mungtan kuex piq luimc vkawc maq guimz yaq nuex htuiz daungx hungc vlaungc kuy lvp laz juing ngoz tueq kuimphox kilogram 34,000 kuq tueq.

²⁰Menahem rueq Israel mungx wawc luiz waungx bix kox wawc kuimphox kuex tvhiz vtueq thoz tueq, washiz maq washiz kox wawc kuimphox sawx rok bv-ngac phok hic tueq. Kvkhoc rvtueq Tiglat Pileser muinz piq mungtan nuex yek waung tueq.

²¹Menahem rueq shuimx wvnc tueq phvnx ruip saz kuex Israel Hokhvmx bix Mvnphvnc luik nuex wuiyq tvtsuingc shec tueq.

²²Piq thueyc kaz koq tueq luip gay tueq, vsaz Pekahia kuex piq httungx nuex hokhvmx yaungx tueq.

²³Yuda Hokhvmx Uzia rueq guimz tueq wawc 50 nuex, Menahem saz Pekahia kuex Israel hokhvmx muex yaungx vtueq Samaria ghaq nuex wawc nueyc guimz lawc tueq.

²⁴Piq rueq muinz Yehowa muex mvrax yaq vtueq Israel kuex mvrax lvmx nuex lvmx shvlc tvyaq tueq Nebat saz Hokhvmx Jeroboam layx vbac honc vyaungc kuex phvnx tueq.

²⁵Piq vyungx vlaungx washiz rvtueq Remalia saz Peka kuex Gilead mungx wawc miq waz 50 rulc vdvmz vyumx maq kvmungx vtueq, Samaria wawc hokhvmx hoc mungx wawc Pekahia kuex khuyx vtueq thvt gay tueq. Piq kuex kvruex waz httungx nuex hokhvmx muex yaungx wvnc tueq.

²⁶Pekahia rueq shuimx wvnc tueq phvnx ruip saz kuex Israel Hokhvmx bix Mvnphvnc luik nuex wuiyq tvtsuingc shec tueq.

²⁷Yuda Hokhvmx Uzia rueq guimz lawc tueq wawc 52 nuex, Remalia saz Peka kuex Israel hokhvmx muex yaungx vtueq Samaria ghaq nuex wawc 20 guimz lawc tueq.

²⁸Piq rueq muinz Yehowa muex mvrax yaq vtueq, Israel kuex mvrax lvmx nuex lvmx shvlc tvyaq jix Nebat saz Hokhvmx Jeroboam layx vbac honc vyaungc kuex phvnx tueq.

²⁹Peka kuex hokhvmx muex yaungx yaq nuex Asiria honoc Tiglat Pileser rueq Ejon, Abel Bet Maaka, Janoa, Kedesh, Hazor ghaqyungx htenc nuiyc Gilead mungx, Galile nuiyc Naphtali mungx htenc kuex khvt lvp wvnc vtueq, miq htenc kuex Asiria mungx nuex thuq wvnc tueq.

³⁰Yuda hokhvmx Uzia saz Jotham rueq guimz lawc tueq wawc rok nueyc nuex, El saz Hoshea rueq Hokhvmx Peka muex khawx lvlx vtueq vyumx maq khuyx thvt gay ruiux, hokhvmx yaungx tueq.

³¹Peka rueq shuimx wvnc tueq phvnx ruip saz kuex Israel Hokhvmx bix Mvnphvnc luik nuex wuiyq tvtsuingc shec tueq.

³²Israel hokhvmx Remalia saz Peka rueq guimz lawc tueq wawc nueyc vngoz nuex, Uzia saz Jotham kuex Yuda hokhvmx muex yaungx tueq,

³³piq rullungx wawc 25 rvtueq, piq rueq Yerusalem nuex wawc 16 guimz lawc tueq. Vnyuiuz kuex Zadok saz Jerusha rvtueq.

³⁴Vwaz Uzia layx kuex phvnx vtueq, Yehowa rueq raungc raq yaq lvmz kuex Jotham rueq shuimx tueq.

³⁵Yuq muinz yac yuimx nawk palx juing baung htenc kuex tvbac gay muq doc ningkhvnc nuex, miq htenc rueq kvruex baung htenc kvyuq shomc nawk kuq ruiux vhomc vtumc phvnx htenc jauk vtueq shomc kuq wuez tueq. Piq rueq Shomc Yuimx Ghaqkhux kox Kaluix kuex guirx tueq.

³⁶Jotham rueq shuimx wvnc tueq phvnx ruip saz kuex Yuda Hokhvmx bix Mvnphvnc luik nuex wuiyq tvtsuingc shec tueq.

³⁷Piq hokhvmx yaungx hvt doc nuex Yehowa rueq Yuda mungx kuex khvt kay tvkoc Siria Hokhvmx Rezin nuiyc Israel Hokhvmx Peka kuex vphaungc lauk tvkaz tueq lvmz rvtueq.

³⁸Jotham thueyc kaz koq tueq Dawid Ghaqyungx wawc hokhvmx luip ruiuz khux nuex luip tueq, piq saz Ahaza kuex piq httungx nuex hokhvmx yaungx tueq.