Read Tase Naga 2 TVTSUINGC TVY 10 Bible Online

2 TVTSUINGC TVY 10 - Tase Naga bible

2 TVTSUINGC TVY 10

¹Rehoboam kuex piq kuex hokhvmx tvyaungc muex ghaqkhux kox nuex httax yaq Israel miqsaz lotlaz rvtuimx yaq Shekhem ghaq nuex kaz tueq.

²Hokhvmx Solomon kox wawc Ejip mungx nuex yuz wvnc tueq Nebat saz Jeroboam rueq kvruex thaungc kuex tay vtueq vyuimx nuex yek waung tueq.

³Ghaqkhux kox phvnx htenc wawc miq htenc rueq piq kuex gvl ruiux, tsuinghez lotlaz vdvmz maq Rehoboam kox nuex kaz vtueq,

⁴“M-waz rueq nuiyshiq htauk nuex gurc liz hvlc tvgurc wvnc phuex. Mkhoc shoc maq mnoz rueq kvruex gurc liz htenc kuex tvjawz kuq ruiux, nuiyshiq tvkoc vjawz lanc ruez kuq phux ngoz ruiux yuq, nuiyshiq kuex mkhung nuex tvmtuing maq httax tix,” ngoz tueq jungx wuez tueq.

⁵Rehoboam rueq, “Kvruex lvmz kuex tvmaung muex nuiyq thuimx tanc kuq kuit. Kvruex yimaq jix yek kaz luit,” ngoz tueq tvralc kuq tueq. Kvkaq tsuinghez muinz yek waung tueq.

⁶Hokhvmx Rehoboam rueq vwaz Solomon rulc rvjungc rv-phvnc jix nyuiuz waz rulc muex, “Kvruex miq hez muex tvralc jungc kuy tvkoc nuimhez rueq ngaz muex yvmx khoc tharc lac kuq lot phuinx?” ngoz tueq wiz tueq.

⁷Tsuinghez rueq, “Kvruex miq htenc kvmac mnoz rueq vhvlx waq menjenc vtueq, tsuingshiq rueq thoz yaq lvmz kuex raungc raq juing kvjaz vhvlx maq tvralc kuq shuiuz, kvkaq tsuingshiq kuex mnoz muex mkaq muinz tvmtuing httax wuez tuex,” ngoz tueq jungx tueq.

⁸Yuq muinz piq kuex nyuiuz waz rulx rueq tharc jungc kuy kvjaz kuex wvlc guez tvyaungc ruiux, piq rulc vdvmz peluz wvnc vtueq majuiuc piq rulc rvjungc rv-phvnc naungc jix yalxrox bix rulc rvjungc phvnx tueq.

⁹Piq rueq, “Nuimshiq rueq ngaz muex yvmx khoc kvmungx lac jungx kuq phuinx? Tsuingshiq muex gurc liz tvjawz kuy tvkoc ngaz muex jungx kaz phuex, ngaz rueq yvmx khoc tvyez jungc kuy juing lac?” ngoz tueq wiz tueq.

¹⁰Tsuinghez rueq, “Mnoz rueq tsuingshiq muex vkhoc jungx shuiuz: ‘Ngvy yaukshix saz kuex iwaz khez htauk nuex muinz yunghvlc!

¹¹Iwaz rueq nuimshiq htauk nuex gurc liq tvdaungc wvnc tueq; ngaz rueq kuex kvruex htauk nuex vliq tvdaungc kuq phaungx. Piq rueq nuimshiq kuex ruiyx saz pumz maq thvt kv-phuinx; ngaz rueq kuex ruiypvnc pumz maq thvt phaungx!’ ngoz tueq jungx kuq shuiuz,” ngoz tueq tvralc tueq.

¹²Nuiyq thuimx yix maq tsuinghez muex piq rueq jungx kuq tueq rulc rv-ngvlc Jeroboam nuiyc miq htenc lotlaz kuex Hokhvmx Rehoboam kox nuex kaz yek tueq.

¹³Hokhvmx waz kuex nyuiuz waz rulx rueq tharc jungc kuy kvjaz kuex wvlc guez tvyaungc gay ruiux,

¹⁴yalxrox bix rueq tharc jungx kuq tueq rulc rv-ngvlc miq htenc muex kaq laung maq jungx tueq. Piq rueq, “Iwaz rueq nuimshiq htauk nuex gurc liq tvdaungc wvnc tueq; ngaz rueq kuex kvruex htauk nuex muinz vliq tvrvp kuq yek phaungx. Piq rueq nuimshiq kuex ruiyx saz pumz maq thvt tueq; ngaz rueq kuex ruiypvnc pumz maq thvt phaungx!” ngoz tueq ngoz kuq tueq.

¹⁵Shilo ghaq jix shvmmax Ahija rueq Nebat saz Jeroboam muex jungx kuq tueq kvjaz kuex hungx wvnc tvkoc Yehowa Tishox thuinroc lvmx rvtueq. Kvkhoc rvtueq hokhvmx waz rueq mungx miqsaz htenc kvjaz kuex wvlc guez tvyaungc tueq.

¹⁶Hokhvmx waz rueq tsuingshiq kvjaz tay kuq muq kuex mungx miqsaz htenc rueq khiz vtueq, tsuingshiq rueq, “Dawid nuiyc piq yuimx wuinz htenc kuex tvdux gay ix! Tsuingshiq rueq naungshiq muex yvmx lac shuimx kuq yaq nguinx? Israel miqsaz htenc lex, yuimx nuex yek wuez ix! Rehoboam rueq piq pumz tvkoc dvyx mlawc shueq,” ngoz tueq ramc wuez tueq. Kvkhoc rvtueq Israel miqsaz htenc rueq khawc lvlc ningkhvnc nuex,

¹⁷Rehoboam kuex Yuda mungx nuex httax jix miqsaz htenc muex dvyx shex hokhvmx muex yaungx tueq.

¹⁸Kvruex yimaq Hokhvmx Rehoboam rueq yauk shuimc vgvrx lawc jix waz Adoniram kuex Israel miqsaz kox nuex tvkaz tueq, yuq muinz tsuingshiq rueq piq kuex lung maq tuip thvt gay tueq. Kvkhoc rvkoq tueq Rehoboam kuex piq mvre renc htauk nuex htat htat duiz vtueq, Yerusalem nuex yuz wvnc tueq.

¹⁹Kvtanc jauz maq phaungc vtueq ghaqkhux kox mungtan wawc Israel miqsaz htenc rueq Dawid hokhvmx phvnx vmaq kuex khawx lvlx wuez tueq.