Read Tase Naga 2 TVTSUINGC TVY 36 Bible Online

2 TVTSUINGC TVY 36 - Tase Naga bible

2 TVTSUINGC TVY 36

¹Yuda miqsaz rueq Josia saz Joahaza kuex thvl vtueq ruimruimx kuq ruiux Yerusalem nuex hokhvmx muex tvyaungc tueq.

²Joahaza kuex rullungx wawc 23 nuex Yuda hokhvmx muex yaungx vtueq, Yerusalem nuex yapix lex thuimx guimz lawc tueq.

³Ejip Hokhvmx Neko rueq piq kuex lvp vtueq khoktep miqsaz ikhoc shvlx wvnc tueq, Yuda miqsaz kox wawc kuimphox sawx kilogram 3,400 nuiyc kuimshawx kilogram 34 kuex hic tsaung tueq.

⁴Neko rueq Joahaza nox Eliakim kuex Yuda hokhvmx muex tvyaungc ruiux, piq muingc kuex Jehoiakim ngoz tueq layc tueq. Joahaza kuex Neko rueq Ejip mungx nuex shvlx laq tueq.

⁵Jehoiakim kuex rullungx wawc 25 nuex Yuda hokhvmx yaungx tueq, piq rueq Yerusalem ghaq nuex wawc 11 guimz lawc tueq. Piq rueq Yehowa piq Tishox muex mvrax yaq tueq.

⁶Babelon Hokhvmx Nebukhadnezar rueq Yuda mungx nuex nyuip khvt ruiux, Jehoiakim kuex lvp vtueq yanx ruiuz maq khvrc ruiux Babelon nuex shvlx laq tueq.

⁷Nebukhadnezar rueq Shomc Yuimx wawc tsak vnyvmx wvyvmc kuex lvmz wvnc vtueq Babelon wawc piq hokhvmx hoc nuex taq tueq.

⁸Jehoiakim rueq shuimx wvnc tueq phvnx ruip saz ngoc juing piq rueq vshuimx vshuy vshac lvmz htenc kuex Yuda nuiyc Israel Hokhvmx bix Mvnphvnc luik nuex tvtsuingc taq shec tueq. Vsaz Jehoiachin kuex piq kvlayc hokhvmx yaungx tueq.

⁹Jehoiachin kuex rullungx wawc 18[19] nuex Yuda hokhvmx yaungx tueq, piq rueq Yerusalem nuex yapix lex thuimx rac raungx rokshiz guimz lawc tueq. Piq muinz Yehowa muex mvrax yaq tueq.

¹⁰Raungluimc yac httuiuc wvnc koq tueq, Hokhvmx Nebukhadnezar rueq Jehoiachin kuex lvp vtueq Shomc Yuimx wawc taungx vwawx htenc rulc vdvmz Babelon nuex shvlx wvnc tueq. Kvruex yimaq Nebukhadnezar rueq Jehoiachin muex vwaungx[20] Zedekia kuex Yuda mungx nuex Yerusalem hokhvmx muex tvyaungc tueq.

¹¹Zedekia kuex rullungx wawc 21 nuex Yuda hokhvmx yaungx vtueq, Yerusalem nuex wawc rokshiz rac wawc shiz guimz lawc tueq.

¹²Piq rueq Yehowa muex mvrax yaq tueq, Yehowa bomjungc jix shvmmax Yeremia kvjaz kuex thuinz tvyomz vtueq tay muq.

¹³Zedekia kuex Tishox muingc maq piq muex tvtuemc vtueq tvkhvmc tueq Hokhvmx Nebukhadnezar kuex khawx lvlx tueq. Piq kuex thuinz kvlayc vtueq Yehowa Israel Tishox kox nuex kvyez tvkoc tvlvlc tueq.

¹⁴Kvdvyx muinz rvmuq, Yuda walaungx bix, shomc waz bix nuiyc mungx miqsaz htenc muinz tsuingshiq tvroz nuex httax yaq yac yuimx htenc nawk palx jix miqphvnx htenc mvrax layx kuex phvnx vtueq, Yehowa vpiq rueq tvsawc taq tueq Shomc Yuimx kuex tvshuy shac tueq.

¹⁵Yehowa tsuingshiq jix vwaz tamx Tishox rueq tsuingshiq kvmuinz, Shomc Yuimx kvmuinz tvjungx tvy roc vtueq, vpiq miqsaz htenc muex tvhonc tvsvmc tvkoc shvmmax bix kuex tvkaz tueq.

¹⁶Yuq muinz tsuingshiq rueq Tishox bomjungc jix hez kuex shummarc vtueq, vpiq kvjaz kuex wvlc guez waqguez tvyaungc ruiux, vpiq shvmmax bix kuex ngoz ngax nueykuic wuez tueq, kvkhoc rvtueq tvsuip nuex Yehowa rueq vpiq miqsaz htenc kuex dungc wvnc juing vguez laz juing khaq tueq.

¹⁷Kvkhoc rvtueq Yehowa rueq tsuingshiq kuex khvt kay tvkoc Babelon hokhvmx waz kuex tvkaz tueq. Hokhvmx waz rueq Shomc Yuimx mungx nuex httax yaq Yuda yalxrox bix nuex httuiuc laz thvt gay tueq. Piq rueq nyuiuz waz, nosaz, miqwaz yalxjuik, vthuiuz vsac jix, miq hvlx jix, ukhaq muex muinz menjenc muq. Tishox rueq tsuingshiq lotlaz kuex piq yauk nuex lekuq gay tueq.

¹⁸Babelon hokhvmx waz rueq Shomc Yuimx tsak vnyvmx taungx vwawx, hokhvmx waz nuiyc piq vyungx vlaungx bix taungx vwawx htenc phvnx ruip saz kuex khvt lvp vtueq Babelon nuex yek waung tueq.

¹⁹Piq rueq Shomc Yuimx nuiyc ghaqyungx muinz hokhvmx hoc tsak vnyvmx lotlaz kuex wvr maq jauk gay tueq, ghaqyungx palx ruk muinz tvrul tvbunx gay tueq.

²⁰Piq rueq tvraungx kvjungx yaq jix htenc lotlaz kuex Babelon mungx nuex shvlx wvnc vtueq, tsuingshiq kuex piq nuiyc piq suiuz vsaz htenc Persia Honoc mungtan yaungx wvnc tueq nuex httuiuc laz dax muex yaungx vtueq shuimx kuq tueq.

²¹Kvkhoc rvtueq shvmmax Yeremia maq raz tueq Yehowa rueq tvluz nuex jungx wvnc tueq kvjaz kuex, “Ghaq phux muex Nyec Tvkuiyq[21] kuy htungx tvrac phvnx muq ningkhvnc nuex, kvruex phvnc tvhungx yek tvkoc ghaqphux kuex wawc mvshix tup kuiyqshuik kuiyq khvmx yaungx wvnc tuex,” ngoz tueq jungx tueq.

²²Persia honoc Kiru kuex honoc[22] yaungx tueq vphaungc raungwawc shvmmax Yeremia maq raz tueq jungx tueq Yehowa kvjaz kuex hungx wvnc tueq. Kvkhoc rvtueq piq rueq vruex vnvrc bomc kuex wuiyq tvdung vtueq piq rueq guimz lawc yaq mungtan baung ruip saz nuex wvlc kuy tvkoc Kiru muex tvshuimc tueq. Kvruex kuex vkhoc rvtueq:

²³“Vruex kuex Persia Honoc Kiru rueq vnvr bomc rvtueq. Yehowa Raungmungx Tishox rueq ngaz muex mungkawx lotlaz tvguimz lawc vtueq, Yuda mungx Yerusalem ghaq nuex vpiq tvkoc shomc yuimx vshiz guirc muex yauk shuimc ngaz muex kuq phuex. Majuiuc kuex Tishox miqsaz rvtuit nuimshiq lotlaz kvyuq yek wuez kuinz, Yehowa nuimshiq Tishox kuex nuimshiq rulc vdvmz nuex mhttax kueq.”